قىرعىزستان پرەزيدەنتى سادىر جاپاروۆ 12 قازاندا استاناعا ۇشادى، ول جاقتا بىرقاتار حالىقارالىق شارالارعا قاتىسىپ، رەسەي پرەزيدەنتى ۆلاديمير پۋتينمەن كەزدەسپەك.

بۇل جونىندە قىرعىز پرەزيدەنتى اكىمشىلىگىنىڭ وكىلى مۋراتبەك ازىمباكيەۆ حابارلادى.

قىرعىز پرەزيدەنتى 13 قازاندا ازياداعى ءوزارا ىقپالداستىق جانە سەنىم شارالارى كەڭەسىنىڭ 6-سامميتىنە، 14 قازاندا تمد مەملەكەت باسشىلارىنىڭ سامميتىنە جانە "ورتالىق ازيا - رەسەي" فورماتىنداعى سامميتكە قاتىسپاق.

وسىنىڭ الدىندا بىرقاتار رەسەيلىك باق رەسەي پرەزيدەنتىنىڭ ءباسپاسوز حاتشىسى دميتري پەسكوۆتىڭ سوزدەرىنە سىلتەمە جاساپ، استانادا سادىر جاپاروۆ پەن ۆلاديمير پۋتين كەزدەسۋى جوسپارلانعان دەپ حابارلاعان.

7 قازاندا قىرعىز پرەزيدەنتى سانكت-پەتەربۋرگتە وتكەن تمد مەملەكەت باسشىلارىنىڭ بيرەسمي كەزدەسۋىنە قاتىسپاعان. بىرقاتار رەسەيلىك باق وندا رەسەي جانە تاجىكستان پرەزيدەنتتەرىنىڭ 70 جاسقا تولعان مەرەيتويى اتاپ وتكەنىن جازعان.

Abai.kz