رەسەيدە «ءىشىنارا موبيليزاتسيا» باستالعالى بەرى كەم دەگەندە 14 جاۋىنگەر قايتىس بولعان. كەي دەرەك ولاردىڭ سانى 17 ادام دەيدى. قايتىس بولعاندار تۋرالى اقپارات نەگىزىنەن تۋىستارى مەن جاقىندارى ارقىلى ايماقتىق باق-تا جاريالانادى. بيلىك بۇل وقيعالارعا قاتىستى پىكىر بىلدىرۋگە وتە قۇلىقسىز جانە كىنانى نەگىزىنەن زارداپ شەككەندەردىڭ وزدەرىنە جۇكتەيدى.

موبيليزاتسيالانعان ساربازدىڭ ءبىرى 27 قىركۇيەكتە كوز جۇمعانى بەلگىلى بولدى. زۆەزدنىي اۋىلىنىڭ تۇرعىنى بوريس شاۆاەۆ كاباردين-بالقاردا، اسكەري بازادا ساپقا تۇرۋ كەزىندە جۇرەك تالماسىنان كوز جۇمعان. 

قىركۇيەكتىڭ 28-ءى كۇنى تومەن ماڭىنداعى اندرەەۆسكي ەلدى-مەكەنىندە موبيليزاتسياعا شاقىرىلعان ەر ادام قايتىس بولدى. 11 قازاندا تومەن گارنيزونى بويىنشا تەرگەۋ كوميتەتىنىڭ اسكەري تەرگەۋ باسقارماسى ەر ادامنىڭ ولىمىنە قاتىستى قىلمىستىق ءىس قوزعالىپ، تەرگەلىپ جاتقانىن حابارلادى، بىراق ەگجەي-تەگجەي ناقتى اقپارات ايتىلمادى.

28 قىركۇيەكتە زابايكالە ولكەسىنىڭ وڭتۇستىك-شىعىسىنداعى اسكەري بولىمدە دە ەر ادامنىڭ ءمايىتى تابىلدى. ءولىم فاكتىسى اسكەري تەرگەۋ دەپارتامەنتىندە جۋرناليستەرگە راستالدى، بىراق سودان بەرى باسقا مالىمەتتەر ايتىلعان جوق.

3 قازاندا ءنوۆوسىبىر جوعارى اسكەري كوماندالىق ۋچيليششەسىندە موبيليزاتسيالانعان ەر ادامنىڭ قازا تاپقانى تۋرالى حابارلاندى. بۇل تۋرالى اقپاراتتى ءنوۆوسىبىر وبلىسىنداعى ادام قۇقىقتارى جونىندەگى ۋاكىل نينا شالاباەۆا راستادى. ونىڭ ايتۋىنشا، ەر ادام ۇيىقتاپ جاتقاندا قايتىس بولعان. كەيىنىرەك مارقۇمنىڭ 35 جاستاعى براتسك قالاسىنىڭ تۋماسى الەكساندر كولتۋن ەكەنى انىقتالدى.

3 قازاندا سۆەردلوۆ وبلىسىندا موبيليزاتسيالانعان ءۇش ادامنىڭ قايتىس بولعانى بەلگىلى بولدى. ەكى ادام پوروشينو اۋىلىنداعى قورعانىس مينيسترلىگىنىڭ وقۋ-جاتتىعۋ ورتالىعىنىڭ ەلان گارنيزونى اۋماعىندا كوز جۇمعان. تاعى بىرەۋى اۋىرىپ، ۇيىنە جىبەرىلگەننەن كەيىن قايتىس بولعان. بيلىك ۇشەۋىنىڭ ولىمىنە قاتىستى قىسقاشا عانا "تەرگەپ، زەرتتەپ جاتىرمىز" دەپ جاۋاپ قاتتى.

4 قازاندا باق ومبى اسكەري بولىمىندە موبيليزاتسياوانعان كراسنويارسك ازاماتى دميتري ۆ-نىڭ (اتى-ءجونى بەلگىسىز) قايتىس بولعانىن حابارلادى.

5 قازاندا موبيليزاتسيالانعانداردىڭ ءبىرى پەنزاداعى پوليگوندا وقۋ-جاتتىعۋ جيىندارى كەزىندە قايتىس بولدى. ءالى كۇنگە دەيىن 41 جاستاعى مارقۇمنىڭ اتى-ءجونى جاريالانعان جوق. 11 قازاندا پەنزا وبلىسىنداعى ادام قۇقىقتارى جونىندەگى ۋاكىل ەلەنا روگوۆا ربك-عا موبيليزاتسيالانعان ادامنىڭ قازا تاپقانىن راستادى.

6 قازاندا باق دەرەككوزدەرگە سىلتەمە جاساپ، لەنينگراد وبلىسىنىڭ كامەنكا قالاسىندا 28 جاستاعى اسكەرگە شاقىرىلعان ازاماتتىڭ قايتىس بولعانىن حابارلادى. وقيعا تۋرالى باسقا مالىمەتتەر مەن رەسمي مالىمدەمەلەر جوق. ال 7 قازاندا ءنوۆوسىبىر جوعارى اسكەري كوماندالىق ۋچيليششەسىندە موبيليزاتسيامەن شاقىۆرىلعان تاعى ءبىر ادامنىڭ ءمايىتى تابىلدى.

9 قازاندا ياكۋتيادا موبيليزاتسيالانعان ازاماتتىڭ قايتىس بولعانى تۋرالى اقپارات تارادى. ريا نوۆوستي اگەنتتىگىنىڭ دەرەككوزگە سىلتەمە جاساپ حابارلاۋىنشا، اسكەرگە شاقىرىلعان 1983 جىلى تۋعان ەر ادام كانگالاسسىداعى تاراتۋ پۋنكتىنىڭ تەرەزەسىنەن قۇلاپ، مەرت بولعان.

11 قازاندا چەليابى وبلىسىنىڭ بيلىگى سنەجينسكىدەن موبيليزاتسيالانعان 27 جاستاعى ماكسيم روديونوۆتىڭ ەكاتەرينبۋرگتەگى 32-ءشى اسكەري لاگەردە قايتىس بولعانىن حابارلادى.

بۇل موبيليزاتسيالانعانداردىڭ قايتىس بولعانى جايلى ناقتى اقپاراتتارى باق بەتىنە شىققان جايتتار عانا. ال بەلگىسىز، جابىق نەگىزدە قالعان وقيعالار سانى الدەقايدا كوپ بولۋى مۇمكىن. موبيليزاتسيالانعانداردىڭ اراسىندا ءولىم-ءجىتىمنىڭ كوپ بولۋى، ولاردىڭ دەنساۋلىعىنا دۇرىس قاراماۋ، ستاتيستيكاعا جۇمىس ىستەپ، جاپپاي موبيليزاتسيالاۋ. بۇل اسكەردىڭ ساپاسىن ءتۇسىرىپ، بيلىككە دەگەن سەنىمدى ازايتا بەرمەك.

كا مىرزا

Abai.kz