بۇل ميسسيا ۋكراينا قارۋلى كۇشتەرى مەن اۋماقتىق قورعانىس كۇشتەرىن دايىنداۋعا كومەكتەسەدى.

"ميسسيا ماقساتى - ۋكراينا قارۋلى كۇشتەرىنىڭ اسكەري دايىندىعىن جەتىلدىرۋ", - دەپ جازىلعان ەۋرووداق كەڭەسىنىڭ مالىمدەمەسىندە.

ميسسيانىڭ شۇعىل شتابى بريۋسسەل قالاسىندا اشىلادى. وعان ۆيتسە-ادميرال ەرۆە بلەجان قولباسشىلىق ەتەدى. ميسسيا جۇمىسىنا ەۋرووداققا مۇشە ەلدەر، سونىمەن بىرگە باسقا دا حالىقارالىق ارىپتەستەر قاتىسادى. اتاپ ايتقاندا، ميسسيا ۇلىبريتانيا، اقش جانە كانادادا ۋكراين جاۋىنگەرلەرىن دايىنداۋمەن اينالىساتىن باسقا دا ورتالىقتاردىڭ جۇمىسىن ۇيلەستىرەدى.

ميسسيا جۇمىسى ازىرگە ەكى جىلعا ارنالعان. ۇيىم بيۋدجەتى - 106,7 ملن ەۋرو.

بۇعان قوسا، ەو ۋكرايناعا قارۋ-جاراق ساتىپ الۋعا 500 ملن ەۋرو ءبولۋ تۋرالى شەشىم قابىلدادى. وسىلايشا ەۋرووداقتىڭ ۋكرايناعا كومەگى 3,1 ملرد ەۋروعا جەتتى.

بۇنىڭ الدىندا اقش پرەزيدەنتى دجو بايدەن قۇراما شتاتتاردىڭ قورعانىس بيۋدجەتىندەگى 725 ميلليون دوللاردى ۋكراينا قورعانىسى مەن قاۋىپسىزدىگىنە كومەك رەتىندە بەرگەن. 2022 جىل باسىنان بەرى اقش ۋكرايناعا 50 ميلليارد دوللار كومەك بولسە، سونىڭ شامامەن 27 ميللياردى اسكەرگە اۋدارىلدى.

الدىندا عانا بريتانيا NASAMS جۇيەسىنە ارنالعان اۋە قورعانىسى زىمىراندارىن ۋكرايناعا بەرەتىنىن مالىمدەگەن. فرانتسيا بولسا اۋە شابۋىلىنان قورعانىس جۇيەسىن جەتكىزەتىنىن حابارلاعان. كانادا شامامەن 35 ملن دوللار اسكەري كومەك بەرەتىنىن مالىمدەگەن.

سونىمەن بىرگە، 13 قازاندا ەۋروپا وداعىنىڭ پارلامەنتتىك اسسامبلەياسى رەسەي فەدەراتسياسىن تەرروريستىك جۇيە دەپ تانيتىن قارار قابىلداپ، ۋكرايناعا ءوز اۋماعىن قورعاۋعا قاجەتتى قارۋ-جاراق جەتكىزۋدى توقتاتپاۋعا ۇندەگەن.

Abai.kz