اباي وبلىسىندا سەمەي قالاسىنا قاراستى وزەركي اۋىل وكرۋگى ورتكە وراندى.

22 قازان كۇنى ساعات 20:00-دە «سەمەي ورمانى» كەزەكشى ديسپەتچەرى «101» پۋلتىنە حابارلاسقان.

ايتۋىنشا، وزەركي اۋىل وكرۋگىندە قۇرعاق ءشوپ، بۇتالار جانىپ جاتىر.

وقيعا ورنىنا كەلگەن ازاماتتىق قورعاۋ ورگاندارىنىڭ قىزمەتكەرلەرى اقپاراتتى راستادى. ەرتىس ورمانشىلىعىنىڭ اشىق اۋماعىندا 30 گەكتار قۇرعاق ءشوپ جانىپ جاتتى.

كاشتاك ورمانشىلىعىنان 23 ادام، ونىڭ ىشىندە 5 بالا كاشتاك اۋىلىنا ەۆاكۋاتسيالاندى. ءورت 23 قازان تاڭعى ساعات 05:20-دا وقشاۋلاندى.

اباي وبلىسى تجد-دان ورمان ءورتىن سوندىرۋگە 32 قىزمەتكەر مەن 8 تەحنيكا، «سەمەي ورمانى» رەزەرۆاتىنان 40 ادام جانە 15 تەحنيكا، سەمەي قالاسى مەن وزەركي اۋىلدىق وكرۋگىنەن 13 ادام جانە 5 تەحنيكا، سونداي-اق، ءبىر پوليتسەي مەن اۆتوكولىك جۇمىلدىرىلدى.

قازىرگى ۋاقىتتا ءورتتىڭ اۋدانى 35 گەكتاردى قۇرادى، ونىڭ ىشىندە شامامەن 5 گەكتارى - ورمان.

دالا ءورتىن ءوشىرۋ ءۇشىن كاشتاك، تاليتسا، ەرتىس ورمانشىلىعىنان 17 قىزمەتكەر، 4 تەحنيكا جۇمىس ىستەپ جاتىر.

Abai.kz