قازاقستاندا 50-دەن استام كوللەدجدىڭ 133 ماماندىق بويىنشا ليتسەنزياسى جويىلدى. بۇل تۋرالى  قر وقۋ-اعارتۋ مينيسترلىگىنىڭ ءباسپاسوز قىزمەتى حابارلادى.

«2022 جىلدىڭ باسىنان بەرى 57 قازاقستاندىق كوللەدج 133 ماماندىق پەن 164 بىلىكتىلىك بويىنشا ليتسەنزيالارعا قوسىمشالاردى قايتاردى. وقىتۋى ساپا ستاندارتتارىنا سايكەس كەلمەيتىن، كادرلار دايارلاۋعا جاعداي جاسالماعان نەمەسە نارىقتا سۇرانىسقا يە ەمەس ماماندىقتار بويىنشا ليتسەنزيالاردىڭ كۇشى جويىلدى»، – دەپ حابارلايدى وقۋ-اعارتۋ مينيسترلىگىنىڭ ءباسپاسوز قىزمەتى.

مىسالى، پەداگوگيكالىق كوللەدجدە زاڭگەرلەردى، ال ەكونوميكالىق كوللەدجدە مۇعالىمدەردى دايارلاۋعا ليتسەنزيانىڭ قوسىمشاسى بولعان. سونداي-اق كەيبىر كوللەدجدەر قاجەتتى وقۋ قۇرالدارىنسىز ماماندار دايىنداپ كەلگەن.

«وقۋ-اعارتۋ مينيسترلىگى كوللەدجدەردىڭ ءپروفيلى بويىنشا جۇمىستى جالعاستىرىپ جاتىر. كادرلاردى دايارلاۋ ءۇشىن جاعدايلار جوق بەيىندى ەمەس ماماندىقتاردىڭ ليتسەنزيالارىن قايتارۋ تجكب ۇيىمدارىنا «سۇرانىسقا يە» جانە بەيىندى ماماندىقتارعا نازار اۋدارۋعا مۇمكىندىك بەرەدى. بۇل تەحنيكالىق جانە كاسىپتىك ءبىلىم بەرۋ ساپاسىن ارتتىرۋ ءۇشىن قاجەت. ءبىلىم الۋعا قاجەتتى جاعداي جاسالماعان، قۇرال-جابدىقتار، شەبەرحانالار، مۇعالىمدەر مەن وقىتۋشىلار جوق كوللەدجدەردە ماماندىقتاردى قىسقارتۋ بويىنشا جۇمىستار جۇرگىزىلىپ جاتىر»، - دەدى وقۋ-اعارتۋ مينيسترلىگى ءبىلىم ساپاسىن قامتاماسىز ەتۋ كوميتەتىنىڭ توراعاسى ەرنۇر داۋەنوۆ.

Abai.kz