قاڭتار وقيعاسىنا بايلانىستى قامالعان 102 ادام راقىمشىلىققا ءىلىنۋى مۇمكىن. بۇل تۋرالى باس پروكۋروردىڭ ورىنباسارى اسەت شىنداليەۆ مالىمدەدى.

ونىڭ ايتۋىنشا، جازا ارقالاعانداردىڭ قىلمىسى اۋىر ساناتقا جاتپاسا، بوستاندىققا جىبەرىلۋى مۇمكىن. بىرقاتار ءىستى تەرگەۋ ورگاندارى ءالى دە تەكسەرىپ جاتىر. اۋىر جانە اسا اۋىر قىلمىس بويىنشا الدىن الا تەرگەۋ تولىعىمەن جۇرگىزىلەدى.  ايتا كەتسەك، كەشە پرەزيدەنت قاسىم-جومارت توقاەۆ «راقىمشىلىق جاساۋ تۋرالى» قازاقستان رەسپۋبليكاسىنىڭ زاڭىنا قول قويدى. قۇجاتقا سايكەس، 1,5 مىڭنان استام ادام امنيستياعا ىلىنەدى.

«راقىمشىلىققا ىلىنگەن ازاماتتاردىڭ ناقتى قاشان، قاي كەزدە بوساپ شىعاتىنىن ايتا المايمىز. ويتكەنى ءالى دە تەرگەۋ جۇمىستارى ءجۇرىپ جاتىر. ءىس سوتقا جىبەرىلەدى، وندا قارالادى جانە تەك ۇكىم شىعارىلعان كەزدە عانا سوت راقىمشىلىق اكتىسىن قولدانادى. زاڭدا ۋاكىلەتتى ورگاندار راقىمشىلىقتى ورىنداۋ ءۇشىن 6 اي ىشىندە بارلىق ۇيىمداستىرۋ ءىس-شاراسىن قابىلداۋى كەرەك دەگەن نورما بار. بارلىعى زاڭ ءتارتىبى نەگىزىندە ىسكە اسادى», – دەدى قر باس پروكۋرورىنىڭ ورىنباسارى اسەت شىنداليەۆ.

Abai.kz