سەمەي يادرولىق سىناق پوليگونىنان زارداپ شەككەن ازاماتتار زەينەتكە ەرتە شىعۋى مۇمكىن. ەگەر قوعام تاراپىنان سۇرانىس بولسا، 1992 جىلى قابىلدانعان پوليگون تۋرالى زاڭعا ءتيىستى وزگەرىس ەنگىزىلەدى. ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا سەمەيدە وتكەن ۇكىمەتتىك ەمەس ۇيىم مۇشەلەرىمەن كەزدەسۋىندە وسىلاي مالىمدەدى، دەپ حابارلادى «حابار 24» ارناسى.

ايتۋىنشا، قازىرگى ۋاقىتتا دەنساۋلىق ساقتاۋ جانە ەكولوگيا مينيسترلىكتەرىنىڭ وكىلدەرى يادرولىق سىناق تاقسىرەتىن تارتقان ايماق تۇرعىندارىنىڭ دەنساۋلىعىنا زەرتتەۋ جۇرگىزىپ جاتىر. سونىڭ نەگىزىندە زاڭعا ءتيىستى وزگەرىس ەنگىزىلۋى مۇمكىن.

«زاڭ ءوز ورنىندا قالادى. ەكىنشىدەن، وزگەرىس قاجەت بولسا، ارنايى ينستيتۋتتار ءوز ۇسىنىستارىن بەرەتىن بولسا ارينە وزگەرىستەر ەنگىزىلەدى. زاڭعا سايكەس سەمەي پوليگونىنان زارداپ شەككەن ازاماتتار 45 جاستان زەينەتكە شىعادى»، - دەدى باسشى.

Abai.kz