كەشە ىستامبۇل كوشەسىندە جارىلىس جاسادى دەگەن كۇدىكتى ۇستالدى. بۇل تۋرالى تۇركيانىڭ ىشكى ىستەر ءمينيسترى سۋلەيمان سويلۋ حابارلادى.

سۋلەيمان سويلۋ كۇدىكتىنى قالانىڭ پوليتسيا باسقارماسىنىڭ قىزمەتكەرلەرى ۇستاعانىن ءمالىم ەتتى.

سونداي-اق سويلۋ بيلىكتە تۇركيادا تەرروريستىك ۇيىم رەتىندە تانىلعان كۇردىستان جۇمىسشى پارتياسىنىڭ وكىلدەرىنىڭ شابۋىلعا قاتىسقانى تۋرالى دالەلدەر بار ەكەنىن دە جەتكىزدى.

ەسكە سالساق، كەشە ىستامبۇلدىڭ بەيوگلۋ اۋدانىنداعى يستيكليال جاياۋ جۇرگىنشىلەر كوشەسىندە جارىلىس بولدى. جارىلىستان 6 ادام قازا تاۋىپ، 81 ادام زارداپ شەكتى.

قر ىستامبۇلداعى باس كونسۋلدىعى تۇركياداعى قازاقستاندىقتارعا، اسىرەسە ادامدار كوپ جينالاتىن جەرلەردە بارىنشا ساق بولۋعا كەڭەس بەرەدى. سونداي-اق، زارداپ شەككەن قازاقستان ازاماتتارى تۋرالى اقپارات جوق.

ىستامبۇلداعى قر باس كونسۋلدىعىنىڭ بايلانىس تەلەفونى +90 212 662 53 49.

Abai.kz