قر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ كاسپي تەڭىزىندە يتبالىقتىڭ قىرىلۋىنا قاتىستى تۇسىنىك بەردى.

ونىڭ ايتۋىنشا قىرىلعان يتبالىقتىڭ سانى – 141. ول زەرتتەۋ جۇمىستارىنىڭ ءبىر اي ىشىندە جاريالاناتىنىن ايتتى. مينيستر يتبالىقتاردىڭ قىرىلۋىنا كۇكىرتتى سۋتەگىنىڭ ءبولىنۋى اسەر ەتكەن بولۋى مۇمكىن.

«ماماندار كۇكىرتتى سۋتەگىنىڭ ءبولىنۋى يتبالىقتارعا اسەر ەتۋى مۇمكىن دەگەندى ايتىپ وتىر. تىنىس الۋ ءۇشىن يتبالىقتار سۋ بەتىنە شىعادى. وسى ورايدا بۇل يتبالىقتاردىڭ ولىمىنە اسەر ەتكەن قانداي دا ءبىر گازدىڭ ءبولىنۋى بولۋى ىقتيمال. بىزدەگى مالىمەت بويىنشا كاسپي تەڭىزىندە 300 مىڭنان استام يتبالىق بار. ءبىز ءتيىستى قورىقتى قۇرۋ، سونداي-اق كاسپي تەڭىزى جانە بيوالۋانتۇرلىلىك ماسەلەلەرى جونىندەگى مەملەكەتتىك ينستيتۋتتى ۇيىمداستىرۋ جۇمىستارىن جۇرگىزىپ جاتىرمىز»، - دەدى مينيستر.

بۇدان بۇرىن كاسپي جاعالاۋىنان 100-دەن استام يتبالىقتىڭ ولەكسەسى تابىلعانى جاريالانعان بولاتىن.

Abai.kz