بەيجىڭ ۋكراينا ماسەلەسىن جانە يادرولىق قارۋسىزدانۋدى تالقىلاعىسى كەلمەيدى.

قحر توراعاسى شي جيڭپيڭ قاراشا ايىندا شەنچجەندە وتەتىن اتەس ءسامميتى اياسىندا ۇيىمداستىرىلۋى مۇمكىن اقش پرەزيدەنتى دونالد ترامپ جانە رەسەيلىك پۋتينمەن ۇشجاقتى سامميتكە قاتىسۋدان باس تارتۋى مۇمكىن. مۇنداي كەزدەسۋ ۋكراينا، يادرولىق قارۋسىزدانۋ جانە ەۋروپامەن قارىم-قاتىناستاعى پىكىر الشاقتىقتارعا بايلانىستى بەيجىڭدى ىنعايسىز جاعدايعا قالدىرۋى ىقتيمال، دەپ جازادى The Diplomat.

ماسكەۋ ديپلوماتيالىق وقشاۋلاۋدان شىعىپ، اقش پەن بەيجىڭمەن تەڭ دارەجەدە كورىنۋگە مۇمكىندىك بەرەتىن بۇل كەلىسسوزدەرگە وتە مۇددەلى. كرەمل ءۇشىن ەڭ قالاۋلى ناتيجە — كيەۆتىڭ تولىققاندى قاتىسۋىنسىز، 1945 جىلعى يالتا كونفەرەنتسياسىنىڭ ۇلگىسى بويىنشا ۋكراينانىڭ تاعدىرى تۋرالى كەلىسىمگە قول جەتكىزۋ بولار ەدى. ترامپ بولسا ۋكراينانى تالقىلاۋدان قازىردىڭ وزىندە باس تارتقان.

دەگەنمەن، بەيجىڭ ءۇشىن مۇنداي فورمات ۇلكەن تاۋەكەلدەر تۋدىرادى. قىتاي بۇعان دەيىن كەلىسسوزدەر پروتسەسىنە رەسەي دە، ۋكراينا دا قاتىسۋى ءتيىس دەپ باسا ايتقان بولاتىن. بۇل ەلدىڭ بولاشاعىن ۋكراين تاراپىنسىز تالقىلاۋ بەيجىڭنىڭ ۇستانعان بۇل پوزيتسياسىنا قايشى كەلەدى.

قوسىمشا تۇيتكىل تۋدىرىپ وتىرعان تاعى ءبىر ماسەلە — يادرولىق قارۋسىزدانۋ تاقىرىبى. ترامپ بۇل ماسەلەنى كەزدەسۋدىڭ باستى كۇن تارتىبىنە اينالدىرۋدى ۇسىنعان ەدى. ال بەيجىڭ ماسكەۋ جانە ۆاشينگتونمەن تەڭ جاعدايدا كەلىسسوز جۇرگىزۋدەن باس تارتادى، ويتكەنى ونىڭ يادرولىق ارسەنالى الدەقايدا از. قىتاي الدىمەن اقش پەن رەسەي ءوز قورلارىن ايتارلىقتاي قىسقارتۋى ءتيىس دەگەن تالاپ قويىپ وتىر.

«شيدە مۇنداي كەزدەسۋدەن قاشۋدىڭ ستراتەگيكالىق سەبەپتەرى بار»، — دەپ جازادى The Diplomat. سونىمەن بىرگە، بۇل سامميت اتەس-ءتىڭ باستى مىندەتى — ەكونوميكالىق ىنتىماقتاستىقتى جىلجىتۋ مەن قىتايدىڭ الەمدىك ەكونوميكاداعى ءرولىن كورسەتۋگە كولەڭكە ءتۇسىرۋى مۇمكىن.

ەگەر بەيجىڭ بۇل كەزدەسۋدەن باس تارتا الماسا، ونىڭ فورماتىن وزگەرتۋگە تىرىسۋى ىقتيمال. ياعني، ۋكرايناعا نەمەسە يادرولىق قارۋعا ارنالعان رەسمي سامميت ورنىنا، بۇلىڭعىر كۇن ءتارتىبى بار بەيرەسمي پىكىر الىسۋ تۇرىندە وتكىزۋى مۇمكىن.

ەۋروپا مەن بەيجىڭ ءۇشىن نەگىزگى ايىرماشىلىق — بۇل كەزدەسۋدىڭ جاي عانا پيكىر الماسۋ بولىپ كورىنۋى مە، الدە ءۇش دەرجاۆانىڭ ەۋروپا قۇرلىعىنىڭ تاعدىرىن وعان مۇشە ەلدەردىڭ قاتىسۋىنسىز شەشۋگە ۇمتىلىسى بولىپ قابىلدانۋى ما، سوندا جاتىر.

Abai.kz