پولشا اۋماعىنا زىمىران ءتۇسىپ، ەكى ادام قازا تاپتى. بۇل اقپاراتتى بۇگىندە جۇمىر جەردەگى 8 ملرد ادامنىڭ تەڭ جارتىسى ەستىگەن بولار. سەبەبى اقپارات شىعا سالىسىمەن-اق باتىستىق مەديا ونى جارىسا جازدى. پولشا ناتو-نىڭ قۇرامىنداعى ەل بولعاندىقتان، الەم رەاكتسيا تەك ۆارشاۆادان ەمەس، تۇتاس ناتو بلوگىنان بولادى دەپ كۇتۋدە. 

زىمىران پولشانىڭ پشەۆودۋب ەلدى-مەكەنىنە تۇسكەن. سالدارىنان استىق قويماسىنا زاقىم كەلىپ، اۋىل شارۋاشىلىق تەحنيكالارى قيراعان، ەكى ادام كوز جۇمعان. 15-قاراشا كۇنى رەسەي ۋكراينا اۋماعىنا جۇزدەن استام زىمىران اتىپ، ينفراقۇرىلىم كەشەندەرىنە سوققى جاساۋعا تىرىستى. پولشا جەرىنە تۇسكەن زىمىران سولاردىڭ ءبىرى بولۋى ىقتيمال. الەمدىك باق ەكى ءتۇرلى اقپاراتتى جازۋدا: ءبىرى بۇل رەسەيلىك زىمىران دەسە، ەندى ءبىرى رەسەي زىمىرانىن قاعىپ سالۋعا تىرىسقان ۋكراينا اۋە قورعانىس كەشەنىنىڭ زىمىرانى بولۋى مۇمكىن دەيدى.

پولشا اۋماعىنا تۇسكەن زىمىرانعا قاتىستى بالتىق ەلدەرى بىردەن رەاكتسيا تانىتتى. "لاتۆيا جاقىن دوسىمىز پولشانى قاشاندا قولدايدى. ناتو وداقتاستارى اۋماعىمىز بەن حالقىمىزدى قورعاۋعا قاشاندا دايىن، ساقاداي ساي تۇر", — دەدى لاتۆيا پرەمەر-ءمينيسترى كريشيانيس كارينش.

لاتۆيا ءسىم باسشىسى ەدگار رينكەۆيچ زىمىران سوققىسىنا رەسەدى كىنالادى. "ناتو-عا مۇشە ەلدىڭ اۋماعىن زىمىرانمەن اتقىلاۋ - كرەمل تاراپىنان جاسالعان قاۋىپتى ەسكالاتسيا. لاتۆيا پولشانى قولدايدى جانە كەز كەلگەن ارەكەتى مەن شەشىمىن ماقۇلدايدى. رەسەي بۇل وقيعانى سالدارىنا جاۋاپتى بولماق", — دەدى.

"پولشا جەرىنە قۇلاعان ەكى زىمىرانعا قاتىستى ايتاتىن بولسام، ءبىز پولشانى تولىق قولدايمىز. ناتو-نىڭ ءار سانتيمەتر اۋماعى قورعالۋى ءتيىس!" — دەپ جازدى ليتۆا باسشىسى. ال ەستونيا ءسىم كەلەسىدەي مالىمدەمە جاسادى: "پولشادان كەلگەن سوڭعى اقپاراتتار ءبىزدى الاڭداتىپ وتىر. ءبىز قازىر پولشامەن جانە وزگە وداقتاستارىمىزبەن تىعىز بايلانىستامىز. ەستونيا ناتو-نىڭ ءار ءديۋيمىن قورعاۋعا دايىن. پولشانى تولىق قولدايتىنىمىزدى تاعى ءبىر مارتە ايتقىمىز كەلەدى".

پولشا قاۋىپتى جاعدايعا بايلانىستى شۇعىل ۇكىمەت جيىنىن وتكىزدى. ال پرەزيدەنت دۋدا ەلگە ۇندەۋ جاساپ، جاعدايدى مۇقيات تەكسەرىپ جاتقانىن ايتتى. اقش بيلىگى جاعدايعا بايلانىستى ناقتى اقپارات بەرمەدى، تەكسەرىس جۇرگىزىپ جاتقانىن ايتادى.

رەسەي "بۇل ءبىزدىڭ زىمىران ەمەس، ءبىز پولشا-ۋكراينا شەكاراسى ماڭىنا سوققى جاساعان جوقپىز، زىمىراندارىمىزدىڭ ۇشۋ تراەكتورياسىن كورسەتە الامىز" دەپ مالىمدەدى. ۆارشاۆا بۇل جاعدايعا بايلانىستى رەاكتسيا بولاتىنىن ايتتى، الايدا قانداي فورماتتا ەكەنىن ناقتىلامادى. بۇگىن رەسەيدىڭ پولشاداعى ەلشىسى زىمىران تۇسكەن اۋماققا شاقىرتىلدى.

Abai.kz