سوعىستى جاقتاعان رەسەيلىك تانىمال تۇلعالاردىڭ قازاقستانعا كەلۋىنە قاتىستى قازاقستاننىڭ سىرتقى ىستەر ءمينيسترىنىڭ ورىنباسارى رومان ۆاسيلەنكو جاۋاپ بەردى، دەپ حابارلايدى Abai.kz پورتالى Ulysmedia.kz-عا سىلتەمە جاساپ. 

سىرتقى ىستەر ءمينيسترىنىڭ ورىنباسارى قازاقستانعا قاتىستى ايتىلعان ءاربىر ءسوزدى «زەرتتەيمىز» دەپ وتىر.

«جالپى، ءبىز البەتتە، ءبىز رەسەي فەدەراتسياسىنىڭ رەسمي تۇلعالارىنىڭ سوزىنە تالداۋ جاساپ وتىرامىز. رەسەيدىڭ جەكەلەگەن ازاماتتارىنىڭ دا سوزىنە قارايمىز. مەملەكەت رەتىندە باسقا مەملەكەتتەردىڭ رەسمي مالىمدەمەلەرىنە باسا مەن بەرەمىز. ماسەلەن، رەسەيدە 140 ملن ادام تۇرادى. ەگەر سولاردىڭ ءاربىرىنىڭ سوزىنە قاتىستى پىكىر بىلدىرە بەرسەك، ول قانشالىقتى دۇرىس بولادى»، - دەدى سىرتقى ىستەر ءمينيسترىنىڭ ورىنباسارى رومان ۆاسيلەنكو.

جۋرناليستەر الەكس لەسلي دەگەن رەسەيلىك بلوگەردىڭ «ءبىز قازاقستاندا موبيليزاتسيالانامىز» دەگەن سوزىنە قاتىستى ۆاسيلەنكونىڭ پىكىرىن سۇراعان. رومان ۆاسيلەنكو ول ءسوزدى ەستىمەگەنىن، الايدا ءتيىستى شارالاردى قابىلدايتىنىن ايتتى.

«مۇنداي جاعدايدا اتالعان ادامعا قازاقستان اۋماعىنا كىرۋگە تىيىم سالۋدان باستاپ سول ەلدىڭ رەسمي تۇلعالارىمەن بىرگە جۇمىس جۇرگىزۋگە دەيىن شارالار قابىلدانادى. الايدا بىلۋىمشە، سىزدەر اتاعان ادام جاۋاپسىز سويلەگەن جەكە بىرەۋلەر بولۋى كەرەك. سول سەبەپتى بۇل ماتەريالدى زەرتتەپ، ءتيىستى شەشىمدى قابىلدايمىز»، - دەدى ول.

رومان ۆاسيلەنكودان «رەسەيدە سوعىستى قولداعان ادامداردىڭ قازاقستانعا كەلىپ، جۇرتتى جيناپ، كونتسەرت وتكىزگەنى نەمەسە فورۋمدارعا قاتىسقانى قانشالىقتى دۇرىس؟» دەگەن سۇراق قويىلعان. ۆاسيلەنكو بۇل سۇراققا دا «زەرتتەيمىز، ءباسپاسوز قىزمەتى ارقىلى جاۋاپ بەرەمىز» دەدى.

بۇعان دەيىن سوعىستى قولدايتىن رەسەيلىك ءانشى پولينا گاگارينانىڭ الماتىداعى كونتسەرتى كوپشىلىكتىڭ سىنىنا ۇشىراپ، وتپەيتىن بولدى. جاقىن ارادا تاعى دا رەسەيلىك تانىمال ءدىنتانۋشى ءشامىل الياۋتدينوۆتىڭ استانادا وتەتىن فورۋمعا قاتىساتىنى بەلگىلى بولدى. ول تۋرالى الەۋمەتتىك جەلى قولدانۋشىلارى الياۋتدينوۆتىڭ رەسەيدىڭ باسقىنشىلىعىن قولدايتىن مالىمدەمەسىن ءبولىسىپ، ونىڭ كەلۋىنە نارازىلىق بىلدىرۋدە.

ال رەسەيلىك بلوگەر الەكس لەسليگە  (شىن اتى الەكساندر كيريللوۆ) قازاقستان اۋماعىنا كىرۋگە تىيىم سالىندى.

Abai.kz