قاسىم-جومارت توقاەۆ رەسپۋبليكالىق قوعامدىق شتابقا بارىپ، كەزەكتەن تىس پرەزيدەنت سايلاۋىنداعى «اشىق قوعام» ايماقتىق زەرتتەۋلەر حالىقارالىق ينستيتۋتى جۇرگىزگەن Exit poll-دىڭ قورىتىندىسىمەن تانىستى.

Exit poll-دىڭ ناتيجەسى جاريالانعاننان كەيىن رەسپۋبليكالىق قوعامدىق شتاب مۇشەلەرىنىڭ الدىندا سويلەگەن سوزىندە قاسىم-جومارت توقاەۆ بۇگىن ەرەكشە، تاريحي ناۋقان وتكەنىن اتاپ ءوتتى.

– بۇل ناۋقاننىڭ ءبىزدىڭ تاريحىمىزدا قالاتىنى ءسوزسىز. Exit Poll-دىڭ الدىن الا ناتيجەسى شىقتى. ارينە، رەسمي قورىتىندىنى كۇتەمىز. دەگەنمەن قازىردىڭ وزىندە حالقىمىز ماعان پرەزيدەنت رەتىندە جانە بارشاڭىزعا ۇلكەن سەنىم ارتتى دەپ ايتۋعا بولادى. حالىقتىڭ سەنىمى – بۇل ەڭ قۇندى نارسە. سوندىقتان حالىقتىڭ سەنىمىن ءبارىمىز اقتاۋىمىز كەرەك. بۇگىن، مىنە 21 قاراشادان باستاپ ءبارىمىز جۇمىسقا كىرىسۋىمىز قاجەت، – دەدى قاسىم-جومارت توقاەۆ.

سونىمەن قاتار مىقتى مەملەكەت قۇرامىز دەسەك، ەڭ الدىمەن، ادىلدىك ورناتۋ قاجەت ەكەنىن، ونسىز ەشقانداي دا رەفورما بولمايتىنىن ايتتى. ونىڭ ايتۋىنشا، ءبارىمىز ءبىر ۇلت، ءبىر قوعام بولىپ ىسكە كىرىسۋىمىز قاجەت.

قاسىم-جومارت توقاەۆ وزىنە ۇلكەن سەنىم ارتقانى ءۇشىن كواليتسياعا ريزاشىلىعىن ءبىلدىردى.

– قوعامدىق شتابقا، سەنىمدى وكىلدەرىمە، ەرىكتىلەرگە راقمەت ايتامىن. سىزدەر ەلىمىزدىڭ ءار تۇكپىرىنە باردىڭىزدار. اۋىل-ايماقتار، شالعاي ەلدى مەكەندەر نازاردان تىس قالعان جوق. ەل اراسىندا ۇگىت-ناسيحات جۇرگىزدىڭىزدەر. بۇل – ۇلكەن جۇمىس. ونى مەن ەشقاشان ۇمىتپايمىن. سول سەبەپتى بۇگىنگى كورسەتكىش – بارىمىزگە ورتاق جەڭىس، – دەدى قاسىم-جومارت توقاەۆ.

ونىڭ پىكىرىنشە، سايلاۋ زاڭعا سايكەس ءوتتى. قازاقستان رەسپۋبليكاسىنىڭ پرەزيدەنتتىگىنە ۇمىتكەرلەرگە بىردەي مۇمكىندىك بەرىلدى.

– ولار ايماقتاردى ەمىن-ەركىن ارالادى. سايلاۋشىلارمەن كەزدەسىپ، ۇگىت-ناسيحات جۇرگىزدى. ياعني، ەشكىمگە شەكتەۋ قويىلعان جوق. ءاربىر سايلاۋشىعا ءوز تاڭداۋىن جاساۋىنا ەركىندىك بەرىلدى. سوندىقتان بۇل ناۋقان ەرەكشە ءادىل، اشىق ءوتتى، – دەدى قاسىم-جومارت توقاەۆ.

قاسىم-جومارت توقاەۆ پرەزيدەنت سايلاۋى جاڭا ساياسي داۋىرگە جول اشاتىنىن ايتىپ، الداعى ۋاقىتتا باستى بيلىك ينستيتۋتتارى تۇگەل جاڭعىرتىلاتىنىن جەتكىزدى.

– كونستيتۋتسيالىق رەفورمانى تولىعىمەن جانە ناقتى جۇزەگە اسىرامىز. ەلىمىزدىڭ ساياسي قۇرىلىسىن جاڭا قالىپقا تۇسىرەمىز. ەكونوميكانى تۇبەگەيلى وزگەرتەمىز. حالقىمىزدىڭ ءال-اۋقاتىن ارتتىرامىز. سونىڭ ءبارىن ويداعىداي اتقارۋ ءۇشىن بىزگە بىرلىك كەرەك. سوندىقتان ءاردايىم بىرگە بولايىق! – دەدى قاسىم-جومارت توقاەۆ.

ءسوزىنىڭ سوڭىندا ول شاراعا قاتىسۋشىلاردى جاڭا، ادىلەتتى قازاقستاندى بىرگە قۇرۋعا شاقىرىپ، باق-بەرەكە تىلەدى.

Abai.kz