قازاقستاندىق ۆاينەرلەر مەيىرجان تورەباەۆ پەن مەيىرحان شەرنيازوۆتى قاماۋدا ۇستاۋ مەرزىمى تاعى ءبىر ايعا ۇزارتىلدى. بۇل تۋرالى الماتى قالالىق سوتىنىڭ ءباسپاسوز قىزمەتى مالىمدەدى.

«الماتى قالاسىنىڭ مامانداندىرىلعان اۋدانارالىق تەرگەۋ سوتىنىڭ حابارلاۋىنشا، 18 قاراشادا سوت شەشىمىمەن كۇدىكتى مەيىرجان تورەباەۆتىڭ قاماۋدا ۇستاۋ مەرزىمىن قىلمىستىق ءىس ماتەريالدارىمەن تانىسۋ كەزەڭىندە ءبىر ايعا، ياعني 18 جەلتوقسانعا دەيىن سانكتسيالاۋ تۋرالى تەرگەۋ ورگاندارىنىڭ ءوتىنىشى قاناعاتتاندىرىلدى. شەشىم زاڭدى كۇشىنە ەنگەن جوق»، - دەپ حابارلادى الماتى قالالىق سوتىنىڭ ءباسپاسوز قىزمەتى.
سونداي-اق، سوت شەرنيازوۆقا قاتىستى قاۋلى شىعاردى. ونىڭ قاماۋعا الۋ مەرزىمى دە تاعى ءبىر ايعا ۇزارتىلدى.
«سوت شەشىمى بويىنشا، كۇدىكتىنى قىلمىستىق ءىس ماتەريالدارىمەن تانىسۋ كەزەڭىندە قاماۋدا ۇستاۋ مەرزىمىن ءبىر ايعا، ياعني 19 جەلتوقسانعا دەيىن سانكتسيالاۋ تۋرالى تەرگەۋ ورگاندارىنىڭ ءوتىنىشى قاناعاتتاندىرىلدى»، - دەپ اتاپ ءوتتى سوت وكىلدەرى.
ەسكە سالا كەتەيىك، مەيىرجان تورەباەۆ، ازيزجان سايدباەۆ جانە مەيىرحان شەرنيازوۆتىڭ ۇستىنەن قر قىلمىستىق كودەكسىنىڭ 217-بابى (قارجى پيراميداسىن قۇرۋ جانە ونى باسقارۋ) بويىنشا قىلمىستىق ءىس قوزعالعان بولاتىن.

Abai.kz