قاراشانىڭ باسىندا اقش-تىڭ ورتا مەرزىمدىك سايلاۋى وتكەنى بەلگىلى. سايلاۋ قورتىندىسى كورسەتكەندەي سىرتقى ساياساتتاعى ساتسىزدىككە، زات باعاسىنىڭ شارىقتاۋىنا قاراماستان امەريكالىقتاردىڭ بيلىكتەگى پارتياعا بولعان ىقىلاسى وزگەرمەگەن.

دەموكراتتاردىڭ قازىرگى باستى ۋايىمى ەكى جىلدان كەيىن بولاتىن پرەزيدەنت سايلاۋىنداعى جۇرتتىڭ داۋىسى ەمەس، پرەزيدەنت بايدەننىڭ جاسى ەكەن. وتكەن جەكسەنبى كۇنى، قاراشانىڭ جيىرماسىندا بايدەن سەكسەنگە تولدى. 2024-جىلى 82-گە كەلەدى، قايتا سايلانسا 86-عا تولعانشا پرەزيدەنتتىك بيلىكتە بولادى.

بايدەننىڭ جۇرت الدىنداعى ايتاتىن ءسوزىن ۇمىتىپ قالۋ، قايتىس بولىپ كەتكەن سەناتوردىڭ اتىن اتاپ شاقىرۋ سياقتى كەيبىر وقىس ارەكەتتەرى جۋرناليستەردىڭ قارتتىق اۋرۋىن زەرتتەيتىن ماماندارعا جۇگىنۋىنە مۇرىندىق بولعان. مامانداردىڭ بەرگەن جاۋابى دا ءارتۇرلى شىققان. بىرەۋى - بايدەن مەن بيىل 76-عا تولعان ترامپتى «ادەمى قارتايعانداردىڭ» قاتارىنا قوسىپ، الداعى سايلاۋدا ەكەۋىنىڭ باسەكەگە ءتۇسۋىن كورگىسى كەلەتىنىن جەتكىزگەن. ەندى بىرەۋى - بايدەننىڭ جوعارى ءبىلىم العانىن، وبەرەلى-شوبەرەلى ەكەنىن، جۇمىس باستى ەكەنىن العا تارتىپ، مۇنىڭ ءبارىن قارتايۋدى باياۋلاتاتىن فاكتورلار رەتىندە قاراستىرعان. ءبارىنىڭ پىكىرى ادامنىڭ جاسى جەكە دارا قاراستىراتىن ماسەلە ەمەس دەگەنگە سايادى.

كوپتەگەن عالىمدار جاسى ەگدە ادامدار ءۇشىن ۇمىتشاقتىق اۋرۋىنىڭ قالىپتى قۇبىلىس ەكەنىن تۇسىندىرگەن. ادامنىڭ جاسى 65-تەن اسقان سوڭ زەيىنى ءار بەس جىل سايىن السىرەي بەرەدى ەكەن. الەمنىڭ ماڭداي الدى باي ەلىندە تۇراتىن 80-84 جاس ارالىعىنداعى امەريكالىق قارتتاردىڭ ۇمىتشاقتىعى 10 پايىز بولسا، 85-89 جاس ارالىعىنداعى قارتتاردىڭ كورسەتكىشى 20 پايىز ەكەن. بايدەننەن باسقا سەكسەننىڭ سەڭگىرىنەن اسسا دا ساياساتتا جۇرگەن سەناتورلار، پروكۋرورلار كوپتەپ سانالادى ەكەن. ەكس-پرەزيدەنتتەر دە ۇزاق ءومىر سۇرەدى ەكەن. ۇلكەن بۋش 94-كە كەلىپ قايتىس بولسا، دجيمي كارتەر قازاننىڭ بىرىندە 98 جاسىن تويلاعان.

بايدەن وتكەن جىلى 79-عا تولۋ قارساڭىندا ونىڭ جەكە دارىگەرى كەۆين دوكتور ونىڭ دەنساۋلىق مالىمەتىن جاريالاپ، بايدەندى «دەنساۋلىعى مىعىم، قايراتى قايتپاعان، جاسى 78-دەگى ەر ازامات» دەپ سيپاتتاعان. بيىل دا الداعى ايلاردا تەكسەرىس ناتيجەسىن كوپكە ۇسىنباق ەكەن.

بايدەن تاياۋدا عانا ەل ىشىندەگى ساياسي ناۋقانداردان سىرت، ەگيپەت، كامبودجا، نيدونەزيا قاتارلى ءۇش ەلدە وتكەن حالىقارالىق جينالىستارعا قاتىسقان. وسىنىڭ ءوزى بايدەننىڭ دەنساۋلىعىنىڭ ءالى دە مىعىم ەكەنىن دالەلدەپ تۇرعانداي.

ەسبول ۇسەنۇلى

Abai.kz