مەملەكەت باسشىسى قاسىم-جومارت توقاەۆ ەرەۆاندا وتكەن ۇقشۇ ۇجىمدىق قاۋىپسىزدىك كەڭەسىنىڭ وتىرىسىنا قاتىستى. ارمەنيا پرەمەر-ءمينيسترى نيكول پاشينياننىڭ توراعالىعىمەن وتكەن سامميتكە بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سادىر جاپاروۆ، رەسەي پرەزيدەنتى ۆلاديمير پۋتين جانە تاجىكستان پرەزيدەنتى ەمومالي راحمون كەلگەن.

ارمەنيا جۇرتى رەسەي پرەزيدەنتى ءپۋتيندى جىلى قاباقپەن قارسى المادى. جۇزدەگەن ارميان مەن رەسەيلىك يمميگرانتتار ەرەۆان ورتالىعىندا «پۋتين – قانىشەر»، «سوعىس بولماسىن» دەگەن ۇراندار جازىلعان پلاتكاتتارمەن كوشەگە شىقتى. ولار ءپۋتيننىڭ ەلگە كەلۋىنە قارسىلىق تانىتىپ، ەكى كۇندىك نارازىلىققا شىققان.

ورتالىق ازياداعى پوستسوۆەتتىك ەلدەر مەن تاياۋ شىعىس، كاۆكاز ەلدەرىن ءالى دە ۋىسىنان شىعارماي، بيلەپ-توستەگىسى كەلەتىن رەسەيدىڭ ۋكرايناداعى جەڭىلىسى ءپۋتيندى الەم ساحناسىنان ودان ءارى الىستاتتى. كوپتەگەن ارمياندار بۇرىن جاقىن جاقتاسى ساناعان رەسەيدىڭ ەرەۆان-باكۋ كيكىلجىڭىندە كومەكتەسپەگەنى ءۇشىن ايىپتايدى.

شەرۋگە شىققان 64 جاستاعى تۇرعىن يۋري تاتەۆاسيان «The Moscow Times» باسىلىمىنا «رەسەي ءبىزدى قورعايمىز دەپ ءسوز بەرگەن، بىراق ءبارى كەرىسىنشە بولدى. ءبىز ورىس ۇلتىنا قارسى ەمەسپىز، بىراق ءبىز كرەملدىڭ قۇلى بولعىمىز كەلمەيدى. ءبىز ارمەنيانىڭ تاۋەلسىز، دەموكراتيالىق ەل بولعانىن قالايمىز»،-دەپ جاۋاپ بەرگەن.

پۋتين ۋكرايناعا سوعىس باستاعالى بىرنەشە رەت شەتەلگە ساپارعا شىعىپ، باتىس ەلدەرى مەن حالىقارالىق ۇيىمداردىڭ سىنىنا قالعان. اي باسىندا الەمنىڭ 20 جەتەكشى يندۋستريالدى ەلدەرى باس قوسىپ، رەسەيدىڭ سوعىسىن قاتاڭ ايىپتاعان جيىنعا پۋتين قاتىسقان جوق.

كارنەگي قورىنىڭ اعا عىلىمي قىزمەتكەرى اندرەي كولەسنيكوۆتىڭ ايتۋىنشا، پۋتين ۋكراينادا سوعىس باستاعانى ءۇشىن ۇقشۇ-داعى «قاتارىنىڭ الدى بولۋ» ستاتۋسىن جوعالتتى، بىراق ايماقتىڭ كوشباسشىلارى ءالى دە كرەملگە ساقتىقپەن قارايدى.

ۇقشۇ-عا مۇشە ەلدەر جينالعان جيىندا قازاقستان پرەزيدەنتى  قاسىم-جومارت توقاەۆ جيىندا رەسەي مەن ۋكراينانى بىتىمگە كەلۋگە شاقىردى.

«ۋكراينا ماسەلەسىنە كەلەر بولساق، بەيبىتشىلىك فورمۋلاسىن بىرلەسە قاراستىراتىن ۋاقىت كەلدى دەپ ويلايمىن. كەز كەلگەن سوعىس بەيبىت كەلىسسوزبەن اياقتالادى. بىتىمگە كەلۋدىڭ كەز كەلگەن مۇمكىندىگىن پايدالانۋ كەرەك. ستامبۇلداعى كەلىسسوز راۋندى ءۇمىت سىيلاعان ەدى، بىراق ءتۇرلى سەبەپتەرمەن كەلىسىم ىسكە اسپادى. ونداعان، جۇزدەگەن جىلدارعا سوزىلاتىن وكپە-رەنىشتەن باۋىرلاس ورىس جانە ۋكراين حالىقتارى اراسىنىڭ الشاقتاۋىنا جول بەرمەۋ كەرەك»، – دەدى پرەزيدەنت.

ستامبۇلدا بيىل ناۋرىز ايىندا رەسەي مەن ۋكراينا وكىلدەرى اراسىندا كەلىسسوز باستالعان. بىراق كوپ ۇزاماي كەلىسسوزدەر توقتاپ قالدى. رەسەي دە، ۋكراينا دا كەلىسىمدى ورىندامادى دەپ ءبىر-ءبىرىن كىنالادى.

Abai.kz