قىزىلوردا وبلىسىندا جاپپاي تارتىپسىزدىك كەزىندە قىلمىستىق قۇقىق بۇزۋشىلىق جاساعان 122 ادام راقىمشىلىققا ۇسىنىلدى. بۇل تۋرالى قىزىلوردا وبلىسىنىڭ قىلمىستىق-اتقارۋ جۇيەسى دەپارتامەنتى حابارلادى.

«راقىمشىلىق تۋرالى» زاڭعا سايكەس قىزىلوردا وبلىسى بويىنشا قاجد اۋداندىق جانە قالالىق پروباتسيا قىزمەتى 122 سوتتالعانعا قاتىستى راقىمشىلىق قولدانۋ تۋرالى سوتقا ۇسىنىس جولدادى. ولار جاپپاي تارتىپسىزدىك كەزىندە قىلمىستىق قۇقىق بۇزۋشىلىق جاساعان.

قازىرگى تاڭدا 9 سوتتالعاننىڭ ءىس-قۇجاتتارى قارالىپ، 7 سوتتالعاننىڭ نەگىزگى جازاسى تورتتەن ۇشكە قىسقارتىلىپ، ەكى سوتتالعاندى جازا مەرزىمىنەن بوساتۋ جونىندە سوت شەشىمىمەن قاۋلى شىعارىلدى. قاۋلى زاڭدى كۇشىنە ەنگەن جوق. ال، قالعان 113 سوتتالعاننىڭ ماتەريالدارى سوت وندىرىسىندە. وسىعان دەيىن ەسەپتەگى سوتتالعاندارعا تۇسىندىرمە جۇمىستارى جۇرگىزىلگەن. وندا قاڭتار وقيعاسىنا قاتىسقانداردىڭ بارلىعى بىردەي راقىمشىلىققا ىلىكپەيتىنى جونىندە ناقتى ايتىلدى»، - دەدى پروباتسيا قىزمەتىنە باسشىلىق جاساۋ توبىنىڭ باس مامانى، ادىلەت مايورى عالامات قۇلمانوۆ.

ەسكە سالايىق، 2 قاراشادا مەملەكەت باسشىسى قاسىم-جومارت توقاەۆ قاڭتار وقيعاسىنا قاتىسقاندارعا ءبىر رەتتىك راقىمشىلىق جاساۋ تۋرالى زاڭعا قول قويدى.

Abai.kz