بۇگىن استانا قالاسىندا «اق جول» دەموكراتيالىق پارتياسى جىل سايىن وتكىزەتىن «XXI عاسىرداعى الاشتىڭ اق جولى» جالپىۇلتتىق بايقاۋىنىڭ بيىلعى قورىتىندى كەزەڭى ءوتتى.

الاش قوزعالىسىنىڭ ساياسي تاجىريبەسىن، ەكونوميكالىق باعدارلاماسىن جانە رۋحاني مۇراسىن قازىرگى قازاقستان قوعامىن جاڭعىرتۋ كونتەكسىندە زەردەلەۋ مەن ناسيحاتتاۋدى ماقسات ەتكەن «XXI عاسىرداعى الاشتىڭ اق جولى» جالپىۇلتتىق بايقاۋى بيىل 11-ءشى رەت وتكىزىلىپ وتىر.

بايقاۋدىڭ اشىلۋ سالتاناتىندا «اق جول» پارتياسىنىڭ توراعاسى، ءماجىلىس دەپۋتاتى ازات پەرۋاشەۆ بايقاۋدىڭ يدەولوگيالىق ماڭىزى، الاش تاقىرىبىن كەڭىنەن ناسيحاتتاۋ پارتيانىڭ باستى ماقساتتارىنىڭ ءبىرى ەكەنىن ايتىپ ءوتتى.

- الاش يدەياسىنىڭ وزەگىندە ەكونوميكالىق قۋاتتىلىق، تاۋەلسىز مەملەكەتتى قۇرۋ، دەموكراتيا، پارلامەنتاريزم سەكىلدى بىرقاتار باعىتتار بار. الاش ارىستارى وسى باعىتتىڭ ارقايسىسىن دا تەڭ ۇستادى. ولاردىڭ يدەياسى ءالى دە ءوز قۇندىلىعىن جوعالتقان جوق، جوعالتپايدى دا. بۇگىندە بىرەۋلەر الاشتى تاريح، وتكەن زامان دەپ ەسەپتەيدى. مەن ولارمەن كەلىسپەيمىن. سەبەبى، الاش يدەياسى ءار قازاقتىڭ قانىندا بار. بۇل ءبىزدىڭ بۇگىنىمىز بەن بولاشاعىمىز. بۇل بايقاۋدىڭ پارتيامىز ءۇشىن دە ماڭىزدىلىعى جوعارى. الاش يدەياسى پارتيامىزدىڭ باسىم باعىتى بولىپ تابىلادى. سەبەبى، الاش مۇراسىنان ەلىمىزدىڭ ساياساتى مەن ەكونوميكاسىنا قاتىستى قاجەتتىنىڭ بارلىعىن تابۋعا بولادى. بۇل جالپىۇلتتىق بايقاۋ ءوز جالعاسىن تابا بەرەدى. وسى بايقاۋدىڭ ىرگەتاسىن سالۋعا ات سالىسقان تۇلعالارعا العىسىم شەكسىز. بۇگىن بايقاۋدا باق سىناپ وتىرعان جاستارعا ساتتىلىك تىلەيمىن. الاشتى زەرتتەۋ ارقىلى ءالى تالاي جاڭالىقتى اشاسىزدار. تەك قانا اق جول! - دەدى ازات تۇرلىبەكۇلى.

اتاپ ءوتۋ كەرەك، بۇعان دەيىن ورالدا وتكەن بيىلعى بايقاۋدىڭ ءىى كەزەڭىنە ساراپتاۋ كوميسسياسى بايقاۋعا تۇسكەن جۇمىستاردى تەكسەرىپ، 4 نوميناتسيا بويىنشا جالپى سانى 40 ۇزدىك جۇمىستى ىرىكتەپ، قىزۋ پىكىرسايىستىڭ ناتيجەسىندە اقتىق كەزەڭگە 13 ۇزدىك جۇمىس وتكەن بولاتىن.

ەلوردادا وتكەن بايقاۋدىڭ اقتىق كەزەڭىنە “Egemen Qazaqstan” باس ديرەكتورى، قر ۇعا اكادەميگى  ديحان قامزابەكۇلى توراعالىق ەتسە، ادىلقازىلار القاسى مۇشەلەرىنىڭ قاتارىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق ادەبيەتى كافەدراسىنىڭ پروفەسسورى، فيلولوگيا عىلىمدارىنىڭ دوكتورى ساعىمباي جۇماعۇل، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق ادەبيەتى كافەدراسىنىڭ مەڭگەرۋشىسى، فيلولوگيا عىلىمدارىنىڭ كانديداتى قايىربەك كەمەڭگەر مەن قر ۇعا كوررەسپوندەنت-مۇشەسى، فيلولوگيا عىلىمدارىنىڭ دوكتورى امانتاي ءشارىپ سەكىلدى بەلگىلى الاشتانۋشى عالىمدار بولدى.

ادىلقازىلار القاسىنىڭ شەشىمىمەن «ءححى عاسىرداعى الاشتىڭ اق جولى» جالپىۇلتتىق بايقاۋىنىڭ جۇلدەگەرلەرى مەن جەڭىمپازدارى بولىپ مىنا اۆتورلار تانىلدى:

 - «الاش يدەياسى جانە ەكىنشى رەسپۋبليكا» نوميناتسياسى بويىنشا:

I ورىن  قۇلدان سۇلەيمەن (ماڭعىستاۋ وبلىسى);

II ورىن وتەمىس ايگۇل (الماتى قالاسى);

III ورىن تورەقۇلوۆا كامشات (ماڭعىستاۋ وبلىسى);

- «قازىرگى زامان شىندىعى اياسىنداعى احمەت بايتۇرسىنۇلى مۇراسى» نوميناتسياسى بويىنشا:

I ورىن  سمان جانسايا (اقتاۋ قالاسى);

II ورىن ابدراحيم ميراس (الماتى قالاسى);

III ورىن ەرالىۇلى ماديار (تاراز قالاسى);

- «الاش قايراتكەرلەرىنىڭ ەكونوميكالىق كوزقاراستارى جانە كاسىپكەرلىكتى دامىتۋ» نوميناتسياسى بويىنشا:

I ورىن جىلقايداروۆا گۇلىم (استانا قالاسى);

II ورىن مۇحتاسارقىزى اقەركە (شقو);

III ورىن بۋتەەۆ باكتيار (قاراعاندى قالاسى);

- الاش تاريحىنىڭ «اقتاڭداقتارى» نوميناتسياسى بويىنشا:

I ورىن سيسەنوۆا دينارا (ماڭعىستاۋ وبلىسى، جاڭاوزەن قالاسى)

II ورىن قاميەۆا نۇرگۇل ەربولاتقىزى (اتىراۋ قالاسى);

III ورىن جاۋىنباي جىلقىبايۇلى (استانا قالاسى);

«احمەت بايتۇرسىنۇلى» اتىنداعى سىيلىقتىڭ يەگەرى جاستلەك ناديا (ورال قالاسى);

جاس الاشتانۋشىلاردى قۇتتىقتاي وتىرىپ، عىلىمي ىزدەنىس جولىندا ساتتىلىك تىلەيمىز!

Abai.kz