قوستاناي وبلىسىندا ماڭدايعا بىتكەن جالعىز قازاق گازەتى بار. ول ­- ىرگەتاسىن بەيىمبەت مايلين مەن مۇحامەدجان سەرالين قالاپ كەتكەن «قوستاناي تاڭى» گازەتى. بيىل باسىلىم عاسىر تويىن تويلاپ، ۇلكەندى-كىشىلى ءتۇرلى شارالار وتكىزدى. مەرەيتويعا دەپ گازەت تاريحىنان سىر شەرتەتىن كىتاپ شىعاردى. كىتاپ دەگەن اتى بولماسا، زاتى سىن كوتەرمەيتىن دۇنيە. ونىمەن قوسا، باس رەداكتور ءوزىنىڭ سىنىپتاستارىنا ارناپ تاعى ءبىر كىتاپ باسقان كورىنەدى. ءجۇز جىلدىق پەن رەداكتوردىڭ جەكە ءومىرىنىڭ نە بايلانىسى بار ەكەنىن تۇسىنە المادىق. وسى ورىندى ءوزىنىڭ جەكە مەنشىگىندەي كورەتىن رەداكتورسىماقتىڭ وسى ۋاقىتقا دەيىن جارىق كورمەگەن قانشاما كىتابى رەداكتسيا ەسەبىنەن شىقتى. قانشا قاراجات جۇمسالعانىندا ەسەپ جوق.

مەنىڭ ايتايىن دەگەنىم بۇل دا ەمەس. ايتايىن دەگەنىم، وسى باسىلىمدا جانۇزاق ايازبەكوۆ زەينەتكەر بولسا دا قانشا جىل ساقالى ساپسيىپ ورنىن بەرمەي، ويىپ تۇرىپ وتىرىپ الدى. ول كەلگەلى ۇجىمنىڭ بەرەكەسى كەتىپ، گازەتتىڭ دە تيراجى تومەندەدى. ەندى جاڭا جىلعا ەكى اي قالىپ، جىل اياقتالعالى تۇرعاندا وبلىستىق اكىمدىك اياق استىنان رەداكتوردى ورنىنان الىپ تاستادى. ونىڭ ارتىنان اپتا وتپەي-اق ورىنباسارى جۇماتاي كاكىمجانوۆ تا زىتتى. ەكەۋى دە دىم بىتىرمەي رەداكتسيانى تاقىرعا وتىرعىزىپ، تايدى دا تۇردى.

وسى باسىلىمعا قوساقتالعان ەكى ۇيىم بار. ونىڭ ءبىرى - الەۋمەتتىك زەرتتەۋ ورتالىعى دا، ەكىنشىسى – وبلىستىق وڭىرلىك كوممۋنيكاتسيالار قىزمەتى ورتالىعى (رسك). بۇل ەكەۋىن كەزىندە وبلىستىق ىشكى ساياسات باسقارماسىنىڭ باسشىسى بولعان، مارقۇم ءجاندىلدا ماقانوۆ اشقان ەدى. ەكەۋى دە وسى رەداكتسيادان قارجىلاندىرىلادى. ولاردا ەڭبەك ەتەتىن كىم، نە ءىس تىندىرىپ جاتىر. ول جاعى دا قۇپيا. ال ەندى وسى الەۋمەتتىك زەرتتەۋ ورتالىعىندا ارنايى قور بار. ول نە قىلعان قور، وعان تۇسكەن قاراجات قايدا جۇمسالادى؟ بۇل جاعى دا قۇپيا.

ەندى مەنىڭ تاعى ءبىر ايتارىم ءمۇيىزى قاراعايداي باسىلىمنىڭ نەگىزگى وقىرمانى امانكەلدى جانە جانكەلدين اۋداندارى. بىراق وسى ەكى اۋداندا دا ارنايى تىلشىلەرى جوق. امانكەلدىدە بەيبىت دەگەن ستۋدەنت بالا جازىپ تۇرادى. ال تورعايدان ءبىر ءتىلشى بۇيىرماسا دا، سول ەلدىڭ ايگىلى «وليگارحى» كاكىمجان كاربوزوۆتىڭ قاتىنى ءراش ابىشەۆا تىركەلگەن ەكەن. ال ونىڭ گازەت بەتىنەن ءبىر اۋىز ماقالاسىن كورگەن ەمەسپىز. سوندا ول نە ماقساتتا جالاقى الىپ وتىر؟ الدە تورعايدى «اشسا الاقانىندا، جۇمسا جۇدىرىعىندا» ۇستايتىن  كاربوزوۆ وسى ۋاقىتقا دەيىن كەتكەن رەداكتوردىڭ اۋزىن مايلاپ كەلگەن بە؟

جالپى رەداكتسيا جىل سايىن مەملەكەتتىك تاپسىرىستى ورىنداۋعا ۇكىمەتتەن قىرۋار قارجى السا دا ءبىر جارىعان ەمەس.

قازاق گازەتىنىڭ جاي كۇيىن كەشە عانا كەتكەن وبلىس اكىمى ارحيمەد مۇحامبەتوۆ ءبىلدى مە ەكەن، الدە ونىڭ دا بۇل جەرگە قاتىسى بار ما؟ قازاق گازەتى قازاقتىڭ جانى مەن جايىن، ماسەلەسىن كوتەرەتىن باستى باسىلىم. ونى تەك قاراجات كوزى رەتىندە قول مايلىق نەمەسە مول بايلىق رەتىندە قولدانۋ ارسىزدىق. تەكسەرىس جۇرگىزىپ، دۇرىستاپ قابىلداپ الماعانىنا قاراعاندا، جاڭادان كەلگەن سۋ جاڭا رەداكتور حانىم دا سول كەتكەندەردىڭ ارتىن جابۋعا كەلدى مە، ءبىر قۇداي ءبىلسىن. ويتكەنى، جىلدا جىل اياعىندا بەرىلەتىن سىياقىدان دا ۇجىم قاعىلعالى وتىرعان كورىنەدى. ەستۋىمىزشە، كەتكەندەر رەداكتسيانى قارىزعا بەلشەسىنەن باتىرىپ كەتكەن. نە بولسا دا ماڭدايىمىزعا بىتكەن قازاق گازەتىنىڭ جاعدايى ءبىر وڭالماي-اق قويدى-اۋ...

سىدىق دايراباي

ەسكەرتۋ! Abai.kz ەركىن اقپارات الاڭى. مۇندا وي جارىستىرىپ، پىكىر الماستىرۋعا قازاقستاننىڭ كەز كەلگەن ازاماتى قۇقىلى. ماتەريالدا ەسىمى اتالاتىن جەكەلەگەن تۇلعالار رەداكتسياعا جاۋاپ بەرۋگە قۇلىقتى بولسا، الداعى ۋاقىتتا ولاردىڭ دا پىكىرىن جاريالاۋعا ءازىرمىز. 

Abai.kz