بۇگىن، 27 ماۋسىمدا الماتى قالاسىندا مەملەكەت باسشىسى قاسىم-جومارت توقاەۆتىڭ اتىنان بۇقارالىق اقپارات قىزمەتكەرلەرى كۇنىنە وراي مەديا سالاسىنىڭ ماماندارىنا باسپانا كىلتى سالتاناتتى تۇردە تاپسىرىلدى.

اتاپ ايتقاندا، «Qazaqstan»، «حابار، «ەۋرازيا»، «كتك»، «ز1 ارنا» تەلەارنالارىنىڭ، «قازاق گازەتتەرى» جشس، «جاس الاش»، «ۆرەميا»، «قازاق ادەبيەتى»، «تۇركىستان» باسىلىمدارىنىڭ جانە «شالقار» راديوسىنىڭ قىزمەتكەرلەرىنە، بارلىعى 15 پاتەر بەرىلدى.

«Dara» پرەزيدەنتتىك باستامالار قورى ۇيىمداستىرعان ءىس-شاراعا پرەزيدەنت كەڭەسشىسى – ءباسپاسوز حاتشىسى ايبەك سمادياروۆ ارنايى قاتىسىپ، الماتىلىق ارىپتەستەردى جاڭا قونىسىمەن قۇتتىقتادى.

– وزدەرىڭىز بىلەسىزدەر، پرەزيدەنت وتاندىق جۋرناليستيكانىڭ دامۋىنا ۇدايى كوڭىل بولەدى. باق قىزمەتكەرلەرى كۇنىنە وراي اقوردادا وتكەن سالتاناتتى جيىندا مەملەكەت باسشىسى قاسىم-جومارت توقاەۆ ەل مەن ۇلت مۇددەسى ءۇشىن قىزمەت ەتىپ جۇرگەن جۋرناليستەردىڭ ەڭبەگىنە ەرەكشە توقتالىپ ءوتىپ: «ساپالى حابار تاراتىپ، قاجىرلى قىزمەت ەتىپ جۇرگەن ايماق تىلشىلەرىنىڭ ەڭبەگىن ەلەۋسىز قالدىرۋعا بولمايدى. سوندىقتان مەنىڭ تاپسىرماممەن وسى جىلى العاش رەت وبلىستاردا جۇمىس ىستەيتىن جۋرناليستەرگە دە پاتەر كىلتى تابىستالادى»، – دەپ ايتقان ەدى. وسى تاپسىرماعا سايكەس، بيىل الماتىلىق ارىپتەستەرىمىز دە جوبا يگىلىگىن كورىپ جاتىر. الماتى – قازاق ءباسپاسوزىنىڭ قاراشاڭىراعى. كوپتەگەن ءداستۇرلى اقپارات قۇرالدارىنىڭ تاريحى وسى شاھاردان باستاۋ الادى. مەملەكەت باسشىسى الماتى قالاسىنىڭ تىنىس-تىرشىلىگىن ارقاشان نازاردا ۇستاپ وتىرادى، – دەدى ايبەك سمادياروۆ.

بيىل باق قىزمەتكەرلەرىنە 66 پاتەر تابىستالادى. ونىڭ ىشىندە استانا قالاسىندا – 15, الماتى قالاسىندا – 15, قالعان 18 ايماقتا 2 پاتەردەن ءبولىندى.

باسپاناعا ۇمىتكەرلەردى انىقتاۋ، پاتەرلەردى دايارلاۋ جۇمىستارىن «Dara» پرەزيدەنتتىك باستامالاردى قولداۋ قورى، پرەزيدەنتتىڭ ءىس باسقارماسى، جەرگىلىكتى اتقارۋشى ورگاندار مەن باق رەداكتسيالارى بىرلەسە جۇرگىزدى.

اتاپ وتەرلىك جايت، وتكەن ءۇش جىلدا پرەزيدەنت اتىنان باق سالاسىنىڭ 200 قىزمەتكەرىنە باسپانا بەرىلدى.

Abai.kz