وتكەن اپتادا تۇركيادا، ىستامبۇلدا ينگۋشەتيا تاۋەلسىزدىگىن جاقتاۋشىلاردىڭ سيەزى ءوتتى. سول جيىندا «تاۋەلسىز ينگۋشەتيا كوميتەتى» قۇرىلدى. بۇل 7 قاڭتار ەدى. سۋ جاڭا قۇرىلعان كوميتەت قۇرامىنا يگنۋشتەردىڭ قوعام جانە ساياسات قايراتكەرلەرى مەن بەلسەندىلەرى كىرگەن. سيەزدى ۇيىمداستىرۋشىلار، كوميتەتتى قۇرۋشىلار وزدەرىن: «ساياسي پارتيا ەمەسپىز. قوعامنان ەشقانداي ارتىقشىلىق ستاتۋس كۇتپەيمىز»، - دەپ مالىمدەگەن.

كوميتەتتىڭ ماقساتى – تاۋەلسىزدىك يدەياسىن جاقتاۋشىلاردىڭ باسىن بىرىكتىرۋ، ينگۋشەتيانىڭ مادەني، ءدىني تامىرىن ساقتاپ قالۋ، ينگۋشەتيا تاۋەلسىزدىگىنىڭ نەگىزىن قالاۋ. «قاۋىپسىزدىك ماقساتىندا كوميتەت باسشىلىعىنىڭ ەسىمدەرى جاريالانبايدى. بىراق، ءبىز وزگە قاپقازدىق باۋىرلارمن بايلانىس ورناتىپ جاتىرمىز»، - دەيدى ۇيىمداستىرۋشىلار.

قازىرگى ەتاپتا كوميتەت اقپاراتتىق-ناسيحاتتىق، قوعامدىق-ساياسي باعىتتاردى جۇمىس جۇرگىزۋدە. ىستامبۇلداعى جيىندا ينگۋشەتيا تەرريتورياسىنداعى قوعامدىق-ساياسي، الەۋمەتتىك-ەكونوميكالىق جاعداي تۋرالى باياندامالار جاسالعان. كوميتەت ينگۋشەتيا قازىر وككۋپاتسيادا دەپ ەسەپتەيدى.

اتالعان جيىنعا قاتىستى ۋكراينا جوعارعى راداسىنىڭ دەپۋتاتى الەكسەي گونچارەنكو پىكىر ءبىلدىرىپ: «ينگۋشەتيا تاۋەلسىزدىك جولىنا ءتۇستى»، - دەدى.

وسىعان دەيىن:

- 2022 جىلدىڭ ماۋسىمىندا جوعارعى رادادا «ازات قاپقاز» دەپۋتاتتىق توبى قۇرىلعان. ونىڭ قۇرامىنا بيلىك پەن وپپوزيتسيا پارتيالارىنىڭ وكىلدەرى كىرگەن.

- ال بىلتىر مامىردا جوعارعى رادا يچكەريا تاۋەلسىزدىگى مەن چەركەستەردىڭ گەنوتسيدىن مويىنداۋ تۋرالى باستاما كوتەرگەن.

- بىلتىر قازاندا رادا شەشەنستاندى «رەسەيدىڭ ۋاقىتشا وككۋپاتسيالاپ العان تەرريتورياسى» دەپ مويىنداعان.

- ال قازاننىڭ سوڭىندا ويرات-قالماق كونگرەسسى «قالماقيا رەسپۋبليكاسىنىڭ تاۋەلسىزدىگى تۋرالى» ارنايى دەكلاراتسيا قابىلداعان.

- بۇل رەسەي ۋكرايناعا سوعىس اشقاننان بەرگى بوداندىقتاعى رەسپۋبليكالاردىڭ العاشقى باس كوتەرۋى ەمەس. ۆارشاۆادا، پراگادا، گدانسكىدە رەسەيدىڭ ەركىن حالىقتارى فورۋمدارى وتكەن. كيەۆتە رەسەيدەگى كرەمل رەجيمىنەن قىساتىق كورگەن ەتنوستاردىڭ جيىنى دا ۇيىمداستىرىلعان.

- ەۋپوپاداعى شەشەن دياسپورالارى قاراشا ايىندا 2 رەت يچكەريا تاۋەلسىزدىگىن جاقتاۋشىلاردىڭ سيەزىن وتكىزگەن. ءبىرىن – فرانتسيادا سۇلەيمەنوۆ باستاعان توپ وتكىزسە، ەكىنشىسىن – بەلگيادا مويىندالماعان يچكەريا رەسپۋبليكاسىنىڭ پرەمەرى احمەد زاكاەۆ وتكىزگەن.

وسىدان بىرنەشە كۇن بۇرىن امەريكالىق «Atlantic Council» («اتلانتيكالىق كەڭەس») زەرتتەۋ ورتالىعى حالىقارالىق ساياسات بويىنشا ساراپشىلار اراسىندا ساۋالناما جۇرگىزگەن. ونىڭ ناتيجەسى «Financial Times» باسىلىمىندا جاريالاندى. ساۋالناماعا قاتىسقان 167 ساراپشىنىڭ تەڭ جارتىسى الداعى 10 جىل ىشىندە رەسەي بىرنەشە بولىككە ىدىرايتىنىن ايتقان.

رەسپوندەنتتەردىڭ 40 پايىزعا جۋىعى: «رەسەيدە رەۆوليۋتسيا، ازاماتتىق سوعىس نەمەسە دەزينتەگرايا سالدارىنان داعدارىس بولادى»، دەپ ەسەپتەيتىن بولسا، ەۋروپالىق ساراپشىلار (49 پايىزى): «رەسەي ءسوزسىز ىدىرايدى»، دەپ پىكىر بىلدىرگەن.

ساۋالناماعا قاتىسۋشى ساراپشىلاردىڭ 14 پايىزى: «رەسەي الداعى 10 جىلدا يادرولىق قارۋ قولدانۋى مۇمكىن»، دەسە، تاعى 10 پايىزى: «سول 10 جىلدا رەسەي مەملەكەتى زاڭدىق تۇرعىدا جويىلاتىنىن»، ايتقان. سول 10 پايىز ساراپشىلار: «رەسەي ىدىراۋىنان كەيىن بىرقاتار اۆتوكراتتىق مەملەكەتتەر دەموكراتيالىق جولعا تۇسەدى»، دەپ بولجاعان.

Abai.kz