الەۋمەتتىك جەلىدە ۋكرايناداعى سوعىستا قولعا تۇسكەن ءبىر توپ رەسەيلىكتىڭ ۆيدەوسى تاراۋدا. "كۇندە تۇتقىنعا ءتۇسىپ جاتىر، ونىڭ نەسىن ايتارسىڭ" دەرسىز. الايدا ۆيدەودا قازاقستان حالقىن ەلەڭ ەتكىزگەن جايتتىڭ ءبىرى، تۇتقىنعا تۇسكەن ءبىر ساربازدىڭ "قازاقپىن" دەگەنى بولىپ تۇر. 

تۇتقىنعا تۇسكەن ساتتە، ۋكراين ساربازدارى ونى اۆتوماتتىڭ ۇڭعىسىمەن ۇرىپ جىبەرگەن ءساتى بەينەلەنگەن. "بۇل جاققا قالاي كەلدىڭ" دەگەن سۇراققا، "جۇمىستان الىپ كەتتى" دەپ جاۋاپ قاتتى.

الەۋمەتتىك جەلى قولدانۋشىلارى بۇل ۆيدەونى كورىپ، پىكىرلەرى قاق جارىلدى. ءبىر تاراپ "وسىعان دەيىن ۋكراينانى قولداپ كەلدىم، مىنا كورىنىستەن كەيىن قولدامايمىن" دەسە، ەندى ءبىرى "باسقىنشىنى اياۋدىڭ قاجەتى جوق" دەگەندى ايتۋدا. الايدا تۇتقىنعا تۇسكەن رەسەيلىكتىڭ شىن مانىندە كىم ەكەنى بەلگىسىز. كەي اقپارات كوزدەرى ونىڭ قازاق ەمەس، بۋريات بولۋى مۇمكىن ەكەنىن ايتادى. 2022 جىلدىڭ ناۋرىز ايىندا بۋچا قالاسىندا رەسەيلىك ساربازدار بەيبىت تۇرعىندارعا قان-قاساپ قىرعىن سالدى. جاۋىزدىقتى جاساۋشى جاساقتىڭ باسىم بولىگى بۋرياتتار دەگەن اقپارات تاراعان بولاتىن. مىنە، وسى وقيعادان كەيىن ۋكراينا ساربازدارىنا بۋرياتتاردى تۇتقىنعا الماي، اتىپ تاستاۋ تۋرالى بەيرەسمي بۇيرىق بەرىلۋى دە مۇمكىن دەيدى جەلى قولدانۋشىلارى. بۇل وقيعاعا دەيىن بىرنەشە مارتە بۋرياتتاردىڭ تۇتقىنعا تۇسكەن ساتتە وزدەرىن وزگە ۇلت دەپ تانىستىرعانى جايلى اقپاراتتار شىققان بولاتىن.

ۋكراينادا سوعىس باستالعالى بەرى ءجۇز ەلۋدەن استام رەسەيلىك ەتنيكالىق قازاق قازا تاپقانى جايلى اقپارات شىقتى. ال قىركۇيەك ايىندا رەسەيلىك تەلەگرام ارنالاردا باسقىنشى قولىنداعى ماريۋپول قالاسى مەن دونەتسككە جۇمىسقا شاقىرعان جارنامالار شىعا باستادى. وندا ورتالىق ازيا تۇرعىندارىن جالاقىسى جوعارى جۇمىسقا شاقىرىپ جاتقانى دا ايتىلعان ەدى. تۇتقىنعا تۇسكەن رەسەيلىك ازاماتتىڭ ورتالىق ازيادان جۇمىسقا كەتىپ، كەيىن ۇرىس دالاسىنان بىراق شىعۋى دا مۇمكىن دەگەن پىكىرلەر ايتىلۋدا.

بۇل ۆيدەوعا قاتىستى قازاقستان ءسىم ءالى پىكىر بىلدىرمەدى. "قازاقپىن" دەگەن تۇتقىن قازاقستان ازاماتى بولىپ شىقسا، زاڭ بويىنشا ونى قىلمىستىق جاۋاپكەرشىلىك كۇتىپ تۇر. قازاقستان زاڭناماسى بويىنشا وزگە ەلگە اتتانىپ، ۇرىس قيمىلدارىنا قاتىسۋعا تىيىم سالىنادى.

كا مىرزا

Abai.kz