رەسەيدەگى سوعىسقۇمار جەندەتتەر تاۋەلسىز ۋكراينانى تىزە بۇكتىرە الماعاننان كەيىن تازا ساۋەگەيلىككە كوشىپتى. بۇل ورايدا ءپۋتيننىڭ ەڭ جاقىن دوسى، جۇمىستان بوس ۋاقىتتارىندا اراقتان اۋزى بوسامايتىن، ال ماسايعاندا ءوزىنىڭ دوسى سەكىلدى كورشىلەرىنە كوز الارتپاسا، ىشكەنى بويىنا تارامايتىن دميتري مەدۆەدەۆ دەگەن شوۆينيست ەشكىمگە دەس بەرمەيتىن كورىنەدى.

قويان جىلى ەسىك اتتار-اتتاماستان-اق، وزىنشە ءبىر كورىپكەلدىك جاساپتى. شاماندىقتان ءۇمىتى مول ديمونننىڭ ساۋەگەيلىگى دەنى دۇرىس ادامنىڭ سوزىنەن گورى، پسيحيكالىق اۋىتقۋى بار جاننىڭ ساندىراعىنا ۇقسايدى. ايۋبايدىڭ بالاسى نە دەپ بولجايدى دەيسىز عوي؟

ورىندىقتى مىقتاپ ۇستاڭىز. ونىڭ ايتۋىنشا، كەلەسى قويان جىلى مۇناي باعاسى شارىقتاپ، ونىڭ ءبىر باررەلى 150 دوللاردى قۇرايتىن كورىنەدى. ال گازدىڭ ءاربىر تەكشە مەترى اناۋ-مىناۋ ەمەس، تۋرا 5000 دوللارعا كوتەرىلەدى-ءمىس. ياعني، ونىڭ سۇيىكتى رەسەيى مول بايلىقتىڭ استىندا قالاتىن ءتۇرى بار. مۇنى از دەسەڭىز، ءدال بيىل ەۋروپا مۇلدەم ىدىراپ، سان بولىككە ءبولىنىپ، ەل بولۋدان قالاتىن كورىنەدى. ال ولاردىڭ ەۋرو دەگەن اقشاسى ەشتەڭەگە قاجەتسىز قاعازعا اينالىپ قالاتىن سەكىلدى. ەندى بۇل ونىڭ تازا قيالى شىعار.

دەگەنمەن، ديمونننىڭ كوزدەگەنى بۇل ەمەس. ونىسى - قايتكەندە وزدەرىنە باقتالاس سانايتىن امەريكانى ءبىر مۇيىزدەپ ءوتۋ. وسى ورايدا ول اقش-تىڭ باسىنا قارا بۇلت ۇيىرەدى. ديمونعا سالساق، ءدال بيىل امەريكانى ۇلكەن اپات كۇتىپ تۇر. مۇندا اياق استىنان دۇربەلەڭ باستالىپ، اياعى ازاماتتىق سوعىسقا ۇلاسادى. وسىنىڭ ناتيجەسىندە ول ەلدىڭ پرەزيدەنتى بولىپ اتاقتى يلون ماسك سايلانادى ەكەن.

ال بۇل دەلقۇلىنىڭ جاڭاعىداي ساۋەگەيلىگىن الەمجەلىدەن وقىعان ماسك وعان كۇلكىدەن ەسىن جيا الماعان يمودز بەينەنى سالىپ، مازاق ەتىپ، كوڭىلى ءبىر كوتەرىلىپ قالعانعا ۇقسايدى. يلوننىڭ سوزىنە قاراعاندا مۇناي ەشبىر شىندىققا جاناسپايتىن ساندىراقتى ءبىرىنشى رەت ەستىپ وتىرعان كورىنەدى.

جالپى، ماسك الىستا عوي. رەسەي باسشىلىعىنداعى يمپەريالىق ساناسى ابدەن ۋلانعان جارىمەس جانداردىڭ ساندىراعىنا كوڭىل اۋدارماۋى دا مۇمكىن. ال ءبىز مۇنداي سوزدەرگە تىم سەزىكتەنە قارايمىز. ويتكەنى جان-جاعىنان جاۋ ىزدەگەن جانعا قانداي دا ساندىراق شىندىق بولىپ ەلەستەۋى ابدەن مۇمكىن.

ۋكراينادان رەسەيدىڭ تارتىپ العان وبلىستارىنا بارىپ بۇلىك شىعارىپ، ونىسىمەن قويماي، سول جەردە مالايزيانىڭ جولاۋشىلار ۇشاعىن اتىپ تۇسىرگەن، وسى قىلمىسى ءۇشىن گااگا سوتى ءومىر بويى تۇرمە جازاسىنا كەسكەن سترەلكوۆ-گيركين دەگەن «ورىس الەمىنىڭ قورعاۋشىسى» مەدۆەدەۆ سەكىلدى ارانداتۋشىلاردىڭ قاتارىنا قوسىلا كەتىپتى. بۇل اتاقتى قىلمىسكەر: «ءدال بيىل رەسەي قازاقستانعا مىندەتتى تۇردە سوعىس اشادى، ويتكەنى مۇندا ۇلتشىلدار مەن ناتسيستەر كوبەيە باستاپتى»، - دەپ كوكىدى. ياعني، بىزدە دە سول ۋكراينانىڭ جولىمەن كەتىپ بارا جاتقانعا ۇقسايمىز.

بىزدىڭشە، بۇل جالعان ساۋەگەيشىلەردىڭ كەزەكتى ساندىراعىنان گورى، كرەملدىڭ بەلگىلى ءبىر ارام ماقسات كوزدەگەن جىمىسقى ساياساتىنىڭ كورىنىسى سەكىلدى. ونىڭ بىرنەشە سەبەبى بار. ءبىر جاعىنان، رەسەيدىڭ ۋكرايناعا قارسى باسقىنشىلىق سوعىسىنان بۇكىل الەمگە جەككورىنىشتى اتانسا، ەكىنشى جاعىنان ۋكراين ساربازداردى مايدان دالاسىندا جەڭە الماي، تاعى دا مازاققا ۇشىراپ وتىر. ەندى وسىنىڭ بار ءوشىن ءوزىنىڭ ءالى كەلەتىن قازاقستاننان العىسى كەلۋى ابدەن مۇمكىن. ويتكەنى ءوزىن ۇلى ستراتەگ سانايتىن پۋتين ايتەۋىر ءبىر جەڭىسكە جەتۋى كەرەك. ءپۋتيندى قازاقستان ونىڭ ەڭ جاقىن سەرىكتەستىگى، اسكەري وداقتاسى سەكىلدى ۇساق-تۇيەك دۇنيەلەر ەش ۋاقىتتا بوگەي المايدى. بىزگە قاۋىپتىسى وسى.

جايبەرگەن بولاتوۆ

Abai.kz