قازاقستانداعى تانىمال اۆتوموبيل ماركالارىنىڭ ديلەرلىك ورتالىقتارى رەسەي ازاماتتارىنا جاڭا ماشينالار ساتۋدان باس تارتتى، دەپ حابارلايدى Ulysmedia.kz Autonews پورتالىنا سىلتەمە جاساپ.

باق مالىمەتىنشە، قازاقستان رەسەيلىكتەر ءۇشىن اۆتوكولىك ساتىپ الۋ ءۇشىن ەڭ تانىمال نارىقتاردىڭ بىرىنە اينالدى: مۇندا قازىر ساتىلىمدا تابىلمايتىن جانە قوسىمشا وپتسيالار ءۇشىن باعاسى نەگىزسىز كوتەرىلمەگەن كولىك مودەلدەرى ۇسىنىلعان. الايدا كوپتەگەن ديلەرلەر كولىكتەردى رەسەيلىكتەرگە ساتۋدان باس تارتا باستادى.

– ساۋدا كومپانياسى رەسەي پاسپورتى بويىنشا Hyundai كولىگىن ساتۋدان ءۇزىلدى-كەسىلدى باس تارتتى. سونىمەن قاتار، ديلەرلىك كومپانيانىڭ قىزمەتكەرى مۇنداي شەكتەۋلەردىڭ سەبەبىن اتاي المادى. ساتۋشى رەسەي ازاماتتارىنا كولىك ساتىپ الۋدىڭ بالاما نۇسقالارىن ۇسىنۋعا تىرىسپادى. ءدال وسىنداي جاعداي باسقا HYUNDAI اۆتوسالونىندا دا بولدى. مۇنىڭ سەبەبىن ساتۋشى "كليەنتتىڭ ءوزى قۇجاتتاردى رەسىمدەۋ كەزىندە قيىندىقتارعا تاپ بولاتىندىعىمەن" ءتۇسىندىردى، - دەپ جازدى قازاقستاندا كولىك ساتىپ الۋعا تىرىسقان رەسەيلىك جۋرناليست.

رەسەيلىك تولقۇجات بويىنشا Kia برەندىنىڭ ماشيناسىن ساتىپ الۋدا دا قيىندىقتار بار. مەنەدجەر تۇسىندىرگەندەي، ولار شەتەلدىك ازاماتقا اۆتوكولىكتى تەك ونىڭ قازاقستاندا تۇرۋعا ىقتيارحاتى بويىنشا نەمەسە جسن تۋرالى دەرەكتەر كورسەتىلگەن قازاقستاننىڭ سالىق تولەۋشىسى رەتىندە تىركەلگەن كۋالىگى بويىنشا عانا ساتا الادى.

ال LADA ورتالىعىنىڭ مەنەدجەرى Granta جانە Niva ساتىلىمدا جوق ەكەنىن ايتىپتى. ورتالىقتا تەك Largus قانا ساتىلىپ جاتىر، الايدا رەسەيلىك تولقۇجاتپەن ونى الۋ مۇمكىن ەمەستىگى ەسكەرتىلگەن.

Chery اۆتوسالونىندا جانە Toyota, Volkswagen ديلەرلىك ورتالىقتارىندا دا وسىنداي جاعداي – ساتۋشىلار جۋرناليسكە كولىك ساتۋدان باس تارتىپتى.

Abai.kz