تۇركياداعى جويقىن جەر سىلكىنىسىنەن كەيىن حابار-وشارسىز كەتكەن قازاقستاندىقتار سانى – ۇشكە جەتتى. ونىڭ ءبىرى – Astana Hub تەحنوپاركىنىڭ حالىقارالىق اگەنتى ميرۋس قۇرماشەۆ. بۇل تۋرالى ونىڭ ارىپتەسى مەن اعاسى مالىمدەگەن بولاتىن.

ەندى بۇگىن ميرۋس قۇرماشەۆتىڭ تۇركياداعى ءۇش ارىپتەسى بايلانىسقا شىقپاي قالدى. ولاردىڭ ەكەۋى قازاقستاندىقتار جانە ءبىرى – تۇركيا ازاماتى.

«ميرۋسپەن بىرگە ونىڭ ءۇش ارىپتەسى دە بايلانىسقا شىقپاي قالدى: ءادىل قادىربەكوۆ، سابينا مامادياروۆا، Kubilay Keskin.

ەگەر ءبىر اقپارات بولسا، +7(702)430-20-21 نومەرىنە جازۋلارىڭىزدى سۇرايمىز»، - دەپ جازدى Astana Hub باس ديرەكتورى ماعجان ماديەۆ Instagram پاراقشاسىندا.

قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ ايتۋىنشا، اپاتتان زارداپ شەككەن نە قازا تاپقان وتانداستارىمىز تۋرالى اقپارات جوق. بىراق سوڭعى تاۋلىكتە تۇركيادا وقيتىن بالالارىن ىزدەگەن بىرنەشە اتا-انا حابارلاسقان. ول اقپارتتىڭ تەكسەرىلىپ جاتقانىن ايتادى. مينيسترلىك وكىلى بۇگىن 19 قازاقستاندىق ستۋدەنت پەن تاعى 18 وتانداسىمىزدىڭ ەلگە قايتاتىنىن جەتكىزدى.

«مەرسين قالاسىنداعى قۇرمەتتى كونسۋل – تۇركيا ازاماتى احمەت بۋدان قازاقستاننىڭ 25 ازاماتىن، ونىڭ ىشىندە 19 ستۋدەنتتى قوناق ۇيمەن قامتاماسىز ەتتى. بۇگىن وسى 19 قازاقستاندىق ستۋدەنت قۇرمەتتى كونسۋلدىڭ ۇيىمداستىرۋىمەن انكاراعا جەتكىزىلدى جانە ولار بۇگىن كەشكە انكارا – استانا رەيسىمەن قازاقستانعا قايتادى... وسى بورتپەن ەلگە قايتۋعا نيەت بىلدىرگەن بىرقاتار ازاماتتارىمىزدى قازاقستانعا اكەلۋ جوسپارلانىپ وتىر. اتاپ ايتقاندا، ساعات 15:00-دەگى جاعداي بويىنشا، 18 ادام ەلگە قايتۋعا نيەت ءبىلدىردى. قازاقستاننىڭ 16 ازاماتى جانە قىرعىزستاننىڭ 2 ازاماتى بار. اتالعان بورت استاناعا كەلەدى دەپ كۇتىلىپ وتىر. ۇشۋ ۋاقىتى قوسىمشا حابارلانادى»، - دەدى ايبەك سمادياروۆ.

ءسىم مالىمەتى بويىنشا قازاقستاننىڭ 968 ازاماتى تۇركيادا كونسۋلدىق ەسەپتە تۇر. انكارادا - 498, ىستانبۇلدا – 45, انتاليادا -189 ادام. سوڭعى مالىمەت بويىنشا تۇركيادا 8219 قازاقستاندىق ستۋدەنت ءبىلىم الۋدا. ال تۇرىك ەلىنىڭ دەرەگىنشە، جالپى 75 مىڭعا جۋىق قازاقستاندىق تۇركيادا ءجۇر.

ايتا كەتەيىك، تۇركيانىڭ وڭتۇستىك-شىعىسىندا بولعان جەر سىلكىنىسىنەن قازا تاپقاندار سانى سوڭعى مالىمەت بويىنشا 7 مىڭنان اسادى. 40 مىڭنان اسا ادام جاراقات العان. زارداپ شەككەندەردى قۇتقارۋ جۇمىستارى ءالى جالعاسىپ جاتىر.

Abai.kz