رەسەي 14 كورشىسىنىڭ 8-مەن دوستىق قارىم-قاتىناستا. بۇل ەسەپتى ماسكەۋ ۇلتتىق كوممۋنيكاتسيالاردى دامىتۋ عىلىمي-زەرتتەۋ ينستيتۋتى (عزتكج) ۇسىنىپتى. «بۇل – ساياساتكەرلەردىڭ ەڭبەگى ەمەس، حالىقتىڭ كورشىلەرىنە دەگەن ءداستۇرلى جاقسى قارىم-قاتىناسىنا بايلانىستى مۇمكىن بولىپ وتىر. بىراق ۇزاققا سوزىلمايتىنى انىق. كەيبىر ەلدەرمەن ءالى دە بايلانىستى دامىتۋعا كۇش سالۋ كەرەك»،-دەيدى ساراپشىلار.

عزتكج جاريالاعان دوستىق مونيتورينگىنىڭ ناتيجەسى بويىنشا، ەستونيا، لاتۆيا، ليتۆا جانە ۋكراينا رەسەيدىڭ ناعىز جاۋلارىنىڭ قاتارىنا كىرگەن. گرۋزيا مەن مولدوۆا سالىستىرمالى تۇردە دوس ەلدەرگە جاتادى.

«مۇندا ساياسي كومپونەنت قانا ەمەس، سونىمەن بىرگە حالىقتىڭ رەسەيگە جالپى قاتىناسى دا ەسكەرىلدى. وتاندىق جانە شەتەلدىك ساراپشىلار قوزعالىس ەركىندىگى، ورىس تىلىنە دەگەن كوزقاراس، ەكونوميكالىق بايلانىستار، عىلىمي جانە مادەني كوممۋنيكاتسيالار، بۇۇ-دا داۋىس بەرۋ جانە ت. ب. سياقتى جالپى 68 كورسەتكىشتى تالدادى»،-دەيدى عزتكج ديرەكتورىنىڭ ورىنباسارى ۆالەنتينا كوملەۆا.

وتكەن جىلمەن سالىستىرعاندا رەيتينگتىڭ بارلىق قاتىسۋشىلارى ءوز پوزيتسيالارىندا قالدى، بىراق «ارنايى اسكەري وپەراتسيا» جاعدايىندا باتىستىڭ رەسەيگە قارسى سانكتسيالارىنىڭ كۇشەيۋى  «دوس» پەن «قاستىڭ» پولياريزاتسياسىن كۇشەيتە ءتۇستى، دەپ اتاپ ءوتتى زەرتتەۋ اۆتورلارى.

ساراپشىلار سونىمەن قاتار رەسەيگە قارسى سانكتسيالارعا قوسىلۋدان باس تارتقان جانە ەكونوميكالىق ىنتىماقتاستىق مۇمكىندىكتەرىن كەڭەيتىپ جاتقان گرۋزيامەن قارىم-قاتىناستىڭ جاقسارعانىن اتاپ ءوتتى.

رەسەيدىڭ ءنومىر ءبىرىنشى ادال دوسى – بەلورۋس. ودان كەيىن قىرعىزستان، وزبەكستان، تاجىكستان، تۇرىكمەنستان سياقتى دوستاس ەلدەرمەن قارىم-قاتىناس ديناميكاسى جاقسارعان. ال ارمەنيا مەن قازاقستان «قۇبىلمالى» كورشىلەر ساناتىنا كىردى. بۇل ەلدەرمەن رەسەيدىڭ قارىم-قاتىناس تاريحى قايتا قارالا باستادى، كوممۋنيكاتسيا ناشارلاعان جانە الداعى ۋاقىتتا ناشارلاي تۇسپەك. بارلىعى رەسەيدىڭ دۇرىس كوممۋنيكاتسيالىق ستراتەگيا تاڭداۋىنا بايلانىستى، دەدى ساراپشىلار.

Abai.kz