قازاقستاندىق كاسىپكەر جانە «قازاتومپروم» كومپانياسىنىڭ بۇرىنعى باسشىسى مۇحتار جاكىشەۆ ۋكراينءنىڭ تانىمال جۋرناليسءى دميتري گوردونعا سۇحبات بەرىپ، اڭگىمە بارىسىندا ۋكرايناداعى سوعىس قاشان اياقتالانىنى تۋرالى ويىن ءبىلدىردى.

«پۋتين سوعىسقا بار كۇشىن سالىپ، جەڭەتىن دە شىعار، بىراق ناعىز جەڭىسكە جەتە المايدى. باسىپ العان جەردى ۇستاپ تۇرۋ كەرەك، ال ول ۇستاپ تۇرا المايدى. ۋكراينا ەشقاشان كۇشپەن باسىپ ۇستاپ تۇرۋعا كونبەيدى.

مەن ۋكراينا تاۋەلسىزدىگىن ساقتاپ قالادى دەپ وتە قاتتى ۇمىتتەنەمىن. قالاي دەسەك تە، باتىستىڭ ۋكرايناعا جىبەرىپ جاتقان قارۋ-جاراعى، لەند-ليز اسەرىن بەرمەي قويمايدى. كەزىندە ناپولەونعا دەيىنگى ادامدار «سوعىس – اقشا، اقشا جانە اقشاعا تاۋەلدى» دەپ ايتىپ كەتكەن. ۋكرايناعا شەتەلدىڭ كومەگى بولماسا، ارينە، جاعدايى قازىرگى كەزدەن مۇشكىل بولار ەدى. نە دەگەنمەن رەسەيدىڭ ارتىندا ەسكى بولسا دا اسكەري-ءوندىرىس كەشەنى بار عوي. ەسكى قارۋ دا ادام ولتىرۋگە قاۋقارلى. ونىڭ ۇستىنە رەسەيدە ادام رەسۋرسى بارشىلىق. ءارى 20-30 ادام ولسە ارتىنان سۇراۋ سالىپ، داۋ تۋدىرىپ، جاۋاپكەرشىلىككە تارتاتىن دەموكراتيالى مەملەكەت تە ەمەس. مۇندا ميلليونداپ ادام ولسە دە، ءپۋتيندى ەشكىم جاۋاپقا تارتپايدى. سول ميلليونداعان ادامنىڭ باسىنا اقىل كىرىپ، ويلانبايىنشا، ولار سوعىسقا ءوز ەركىمەن كەتە بەرەتىن بولادى»، - دەدى جاكىشەۆ.

ونىڭ ايتۋىنشا، اۆتوريتارلى بيلىكتىڭ سەنەرى تەك – قارۋلى كۇشى.

«سول كۇشتىك قۇرىلىمدار، پوليتسيا:  مەن كىمدى، نەنى قورعاپ ءجۇرمىن؟ وزىمدە جوق ياحتالاردى ما، ءزاۋلىم سارايلاردى ما، الدە شەتەلدەگى اقشالاردى ما دەپ، ويلانىپ، تەك بيلىكتە وتىرعانداردى قورعاپ جۇرگەنىن تۇسىنگەن كەزدە، سونداي وي باسىنا كەلگەن كەزدە عانا، ولار حالىقتىڭ جاعىنا شىعادى. قۇقىعىن قورعاعان كوپشىلىكتىڭ ىشىندە بولادى. اۆتوريتار بيلىكتىڭ ناعىز قورقىنىشى دا – وسى»، - دەدى ول.

جاكىشەۆ سوعىستىڭ قاشان بىتەتىنىن بولجاۋ مۇمكىن ەمەس، تەك رەسەيدىڭ كۇش-قۋاتى سارقىلعاندا عانا اياقتالاتىنىن ايتادى.

«مۇنداي جاعدايدا سوعىستىڭ قاشانعا سوزىلاتىنىن بولجاۋ قيىن. رەسەيدىڭ ءال-دارمەنى كەتكەن كەزدە عانا بىتەتىن شىعار. قازىر موبيليزاتسيادان كەيىن قانشاما بىلىكتى ماماندار رەسەيدەن كەتتى. رەسەيدىڭ قارۋ مەن تەحنيكاسىن باسقاراتىن، شىعاراتىن ماماندار قالمادى. سوعىسقا كەرەك تانكىلەر مەن قارۋ-جاراقتاردى شىعاراتىن كاسىپورىندار توقىرايدى دەپ ۇمىتتەنەمىن. سىزدەرگە شىن جۇرەكتەن جەڭىس تىلەيمىن»، - دەدى كاسىپكەر.

ايجان تەمىرحان

Abai.kz