14 ناۋرىزدا رەسەيلىك سۋ-27 جويعىش ۇشاعى اقش-تىڭ MQ-9 درونىمەن قارا تەڭىز ۇستىندە سوقتىعىستى.  

ەۋروپاداعى اقش اسكەري-اۋە كۇشتەرى قولباسشىلىعىنىڭ مالىمەتى بويىنشا، سۋ-27 امەريكالىق MQ-9 درونىنىڭ ءۆينتىن زاقىمداعان. ناتيجەسىندە اقش درونىن اتىپ ءتۇسىرىپ، ول حالىقارالىق سۋعا قۇلاعان. بولعان وقيعاعا بايلانىستى رەسەي فەدەراتسياسىنىڭ ۆاشينگتونداعى ەلشىسى اقش مەملەكەتتىك دەپارتامەنتىنە شاقىرىلعان.

«قارا تەڭىز ۇستىندەگى حالىقارالىق اۋە كەڭىستىگىندە تاپسىرما ورىنداپ جۇرگەن اقش اسكەري-اۋە كۇشتەرىنىڭ MQ - 9 ۇشقىشسىز بارلاۋ ۇشاعىن رەسەيدىڭ ەكى سۋ-27 ۇشاعى قاۋىپتى جاعدايدا قالدىرىپ، كاسىبي ەمەس تۇردە ۇستادى»، - دەلىنگەن كوماندالىق حابارلامادا.

اقش اۋە كۇشتەرىنىڭ ەۋروپا مەن افريكاداعى قولباسشىسى دجەيمس حەككەر: «ءبىزدىڭ MQ-9 اپپاراتىمىز حالىقارالىق اۋە كەڭىستىگىندە ادەتتەگى وپەراتسيالاردى جۇرگىزگەن، ونى رەسەيلىك ۇشاق ۇستاپ الىپ، اتىپ ءتۇسىردى. سونىڭ كەسىرىنەن MQ-9 جويىلدى. شىندىعىندا، كاسىبيلىكتەن ماقۇرىم رەسەيلىكتەردىڭ ارەكەتى وزدەرىنىڭ ۇشاعىن دا وپات قىلا جازدادى»، - دەدى.

اق ءۇيدىڭ مالىمەتى بويىنشا، بۇل جاعداي ماسكەۋمەن تالقىلاناتىن بولادى.

اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى دجەيك سالليۆان: «مەملەكەتتىك دەپارتامەنت رەسەيلىك ارىپتەستەرىمەن وسى قاۋىپتى ءارى كاسىبي ەمەس قيمىلى تۋرالى تىكەلەي سويلەسەدى»، - دەدى.

ال رەسەي جاعى بولعان وقيعاعا اقش-تىڭ ءوزى كىنالى دەدى.

رەسەي فەدەراتسياسىنىڭ قورعانىس مينيسترلىگىنىڭ مالىمدەۋىنشە، سۋ-27 امەريكالىق درونعا جاقىنداماعان، ەشقانداي شابۋىل جاساماعان.

«اقش-تىڭ درونى سيگنالعا جاۋاپ رەتىندە سيگنال جىبەرەتىن قابىلداعىش قۇرىلعىسىن ءوشىرىپ، ارنايى اسكەري وپەراتسيانى جۇرگىزۋ ءۇشىن بەلگىلەنگەن اۋە كەڭىستىگىنىڭ شەكاراسىن بۇزا وتىرىپ ۇشقان. MQ-9 باسقارۋ قابىلەتىن جوعالتىپ، سۋعا بارىپ قۇلادى»، - دەيدى رەسەي قورعانىس مينيسترلىگى.

CNN مالىمەتى بويىنشا، بۇل – سوعىس باستالعالى رەسەي مەن اقش اسكەري ۇشاقتارىنىڭ العاشقى سوقتىعىسۋى.

اشىق دەرەككوزدەردە، MQ-9 درونى شامامەن 10,5 ميلليون دوللار تۇرادى.

ايجان تەمىرحان

Abai.kz