پرەزيدەنت قاسىم-جومارت توقاەۆ تۇركى مەملەكەتتەرى ۇيىمىنىڭ كەزەكتەن تىس سامميتىنە قاتىسۋ ءۇشىن انكاراعا جۇمىس ساپارىمەن كەلدى، دەپ جازادى اقوردا.

ساپار بارىسىندا مەملەكەت باسشىسى تۇركيا پرەزيدەنتىمەن كەزدەسۋ وتكىزەدى دەپ جوسپارلانىپ وتىر.

بىلتىر قاراشانىڭ 11-دە تۇركى ەلدەرى سامارقاندا باس قاسقان بولاتىن. سول جيىندا پرەزيدەنت قاسىم-جومارت توقاەۆ بيىل قازاقستاندا ءىى تۇركى ۋنيۆەرسياداسى ۇيىمداستىرىلاتىنىن ايتقان ەدى.

«ءبىز اكادەميالىق ۇتقىرلىقتى دامىتىپ، ستۋدەنتتەر اراسىندا مادەنيەتارالىق ديالوگ ورناتۋعا جاعداي جاساۋىمىز كەرەك. سونداي-اق جوعارى وقۋ ورىندارىنىڭ بىرىڭعاي ءبىلىم بەرۋ كەڭىستىگىن قالىپتاستىرۋ قاجەت. سوندىقتان 2023 جىلى تۇركى ەلدەرى ۋنيۆەرسيتەتتەرىنىڭ ورتاق جەلىسىن قۇرۋ مۇمكىندىگىن قاراستىرۋدى ۇسىنامىن. بۇل باستاما ستۋدەنتتەرىمىزدىڭ تۇركى تىلدەرىن ۇيرەنىپ، باۋىرلاس ەلدەردىڭ تىنىس-تىرشىلىگىمەن تانىسۋىنا جول اشادى»، – دەدى مەملەكەت باسشىسى.

2022 جىلعى تۇركى مەملەكەتتەرى ۇيىمى ءسامميتىنىڭ قورىتىندىسى بويىنشا بىرنەشە قۇجاتقا قول قويىلدى:

1. تۇركى مەملەكەتتەرى ۇيىمى ءسامميتىنىڭ دەكلاراتسياسى;

2. تۇركىتىلدەس مەملەكەتتەردىڭ ىنتىماقتاستىق كەڭەسىن قۇرۋ جونىندەگى ناحچىۆان كەلىسىمىنە وزگەرىستەر ەنگىزۋ تۋرالى حاتتاما;

3. تۇركى مەملەكەتتەرى ۇيىمى راسىمدەرىنىڭ ەرەجەلەرىن قابىلداۋ تۋرالى شەشىم;

4. تۇركى مەملەكەتتەرى ۇيىمىنىڭ باس حاتشىسىن جانە ونىڭ ورىنباسارلارىن، سونداي-اق تۇركى اكادەمياسىنىڭ پرەزيدەنتى مەن ۆيتسە-پرەزيدەنتىن تاعايىنداۋ تۋرالى شەشىم;

5. تۇركى ينۆەستيتسيالىق قورىن قۇرۋ تۋرالى شەشىم.

ايتا كەتەيىك، ورتاق تاريحى، ءتىلى، مادەنيەتتى ۇيىستىرعان تۇركى مەملەكەتتەرىنىڭ ۇيىمى بەيبىتشىلىك پەن تۇراقتىلىقتى نىعايتۋعا، ىنتىماقتاستىقتى دامىتۋعا جانە وعان مۇشە مەملەكەتتەر اراسىنداعى ورتاق دامۋ الەۋەتىن اشۋعا ۇمتىلادى.

تۇركى مەملەكەتتەرىنىڭ ۇيىمى (كەزىندە تۇركىتىلدەس مەملەكەتتەر ىنتىماقتاستىعىنىڭ كەڭەسى – تۇركى كەڭەسى دەپ اتالعان) 2009 جىلى تۇركى مەملەكەتتەرى اراسىنداعى جان-جاقتى ىنتىماقتاستىقتى ىلگەرىلەتۋ ماقساتىندا ۇكىمەتارالىق ۇيىم رەتىندە قۇرىلدى. ونىڭ نەگىزىن قالاۋشى ازەربايجان، قازاقستان، قىرعىزستان جانە تۇركيا بولىپ، ءتورت مەملەكەت بولدى. 2019 جىلدىڭ قازان ايىندا باكۋدە وتكەن 7-ءشى سامميت كەزىندە وزبەكستان تولىققاندى مۇشە رەتىندە قوسىلدى. ماجارستان 2018 جىلعى قىركۇيەكتە قىرعىز رەسپۋبليكاسىنىڭ شولپان-اتادا وتكەن 6-شى ءسامميتى كەزىندە ۇيىمدا باقىلاۋشى مارتەبەسىن الدى. 2021 جىلعى قاراشادا وتكەن 8-ءشى سامميتتە تۇرىكمەنستان ۇيىمعا باقىلاۋشى مۇشە رەتىندە قوسىلدى.

Abai.kz