وسى جىلدىڭ باستى ساياسي ناۋقانى – ءماجىلىس سايلاۋىنىڭ وتۋىنە دە ساناۋلى ءسات قالدى. سايلاۋعا بايلانىستى ۇگىت-ناسيحات باستالعاننان بەرى ساياسي پارتيالاردىڭ وكىلدەرى ەلىمىزدىڭ بارلىق ءوڭىرىن ارالاپ، باعدارلامالارىن تانىستىرۋعا تىرىستى. «Qazaqstan» ۇلتتىق ارناسى مەن «كتك» تەلەارناسىنىڭ تىكەلەي ەفيرىندە پىكىرسايىسقا دا تۇسكەن ەدى. سوڭعى تەلەۆيزييالىق پىكىرسايىس كەشە «حابار» تەلەراناسىنىڭ تىكەلەي ەفيرىندە ۇيىمداستىرىلدى، دەپ جازادى قازاقپارات.

پىكىرسايىسقا «Amanat» پارتياسىنان ەرلان قوشانوۆ، «اۋىل» حالىقتىق دەموكراتيالىق پاتريوتتىق پارتياسىنان جيگۋلي دايراباەۆ، «Respublica» پارتياسىنان ايداربەك قوجانازاروۆ، «قازاقستان حالىق پارتياسىنان» وكسانا اۋباكىروۆا، قازاقستاننىڭ «بايتاق» جاسىلدار پارتياسىنان ازاماتحان امىرتاەۆ، «اق جول» قازاقستان دەموكراتيالىق پارتياسىنان ازات پەرۋاشەۆ، ال «جالپىۇلتتىق سوتسيال-دەموكراتيالىق پارتياسىنان» نۇرلان اۋەسباەۆ قاتىستى.

«Amanat» ميلليونداعان جاقتاس تاپتى»

«Amanat» پارتياسى وسى 1 ايدىڭ ىشىندە ارقالىقتان قوناەۆقا دەيىن، قىزىلجاردان قاراتاۋعا دەيىن، زايساننان قۇلسارىعا دەيىن ەلىمىزدىڭ ءتورت بۇرىشىن تۇگەل ارالاپ شىقتى. شالعاي اۋىلدارعا دەيىن باردىق. ەلدىڭ مۇڭىن دا، سىنىن دا تىك تۇرىپ تىڭدادىق. ميلليونداعان جاقتاس تاپتىق. حالقىمىزدىڭ پارتياعا ۇمىتپەن قاراپ، قولداپ وتىرعانىنا كوزىمىز جەتتى»، - دەدى ەرلان قوشانوۆ پىكىرسايىس بارىسىندا.

ونىڭ اتاپ وتۋىنشە، پارتيانىڭ سايلاۋالدى باعدارلاماسى – ناقتى ءىس-قيمىل جوسپارى. ونى جۇزەگە اسىرۋ ءۇشىن پارتيا بارلىق دەڭگەيدەگى كانديداتتاردى ۇسىنىپ وتىر. جالپى، پارتيا سايلاۋعا جالعان ۇرانسىز، بوس ۋادەسىز ءتۇسىپ جاتىر.

«سايلاۋشىلار ءبىزدىڭ ساياسي ادالدىعىمىزدى باعالايتىندىعىنا سەنىمدىمىز. بۇگىندە ءار ۋاقىتتا ءبىزدى سىناپ كەلگەندەر دە سەنىم ارتىپ وتىر. ءبىزدىڭ بارلىعىمىزدى وسىدان ءبىر جىل بۇرىن پرەزيدەنتىمىز الدىمىزعا قويعان ماقسات-مىندەتتەر بىرىكتىرەدى. اشىعىن ايتايىق، جىلدار بويى قوردالانعان، جۇرتتىڭ جۇيكەسىن جۇقارتقان ماسەلەلەر دە كوپ. حالقىمىز ولاردىڭ شۇعىل شەشىلۋىن كۇتىپ وتىر.

ءبىرىنشى – حالىقتىڭ تۇرمىسىن جاقسارتۋ. ءبىز ازاماتتاردىڭ تابىسىن ارتتىرۋ ءۇشىن ناقتى ءىس-شارالار قابىلدايمىز. جۇمىسسىزدىقپەن جۇيەلى تۇردە كۇرەسەمىز. ەكىنشى - جەمقورلىق پەن ادىلەتسىزدىك. ءبىز ۇرلانعان، شەتەل اسقان ميللاردتاعان قارجىنى ەلگە قايتارامىز. سوت پەن پروكۋرور، پوليتسيا، اكىمدەر مەن شەنەۋنىكتەر ازاماتتارىمىزعا قوجايىن ەمەس، قورعان بولۋى ءتيىس. بۇل سالاعا تۇبەگەيلى رەفورما جاسايمىز. ءۇشىنشى – ءتارتىپ پەن قاۋىپسىزدىك. حالىق مەملەكەتتىڭ تاۋەلسىزدىگى مەن تۇراقتىلىعى ءۇشىن، قوعام كوشە مەن اۋلاداعى ءتارتىپ ءۇشىن، اتا-انا وقۋداعى، اسكەردەگى بالالارىنىڭ قاۋىپسىزدىگى ءۇشىن الاڭداماۋى ءتيىس. «Amanat» پارتياسى وسى تۇيتكىلدى ماسەلەلەردى شەشۋگە بار كۇشىن سالادى»، - دەدى پارتيا توراعاسى.

«تازا تابيعاتتا ءومىر سۇرۋگە جاعداي جاسالادى»

ال، «بايتاق» جاسىلدار پارتياسىنىڭ توراعاسى ازاماتحان امىرتاەۆ پارتيانىڭ نەگىزگى ماقساتى ادامداردىڭ دەنساۋلىعى مەن قۇقىقتارىن قورعاۋعا، تازا ەنەرگەتيكانى دامىتۋعا ەرەكشە ءمان بەرۋ ەكەندىگىن ايتادى.

«بايتاق» پارتياسىنىڭ نەگىزگى ماقساتى – ازاماتتاردىڭ قۇقىقتارىن قورعاۋ، حالىقتىڭ دەنساۋلىعى مەن ءوندىرىستىڭ زاماناۋي تازا تەحنولوگيالارىنا باعىتتالعان قۋاتتى ەكونوميكا قۇرۋ. ءبىز ءۇشىن ادىلدىكتىڭ جوعارى كورىنىسى – ادامنىڭ ءومىرى مەن دەنساۋلىعىن ساقتاۋ. پارتيا جاقىندا تىركەلسە دە، قوزعالىس رەتىندە 10 جىلدىق تاجىريبەسى بار. ءبىزدىڭ كانديداتتارىمىز تابيعي رەسۋرستاردى اشكوزدىكپەن اياۋسىز يگەرۋگە قارسى»، - دەدى ازاماتحان امىرتاەۆ.

وسى ورايدا، ول پارتيا قۇرامىندا بارلىق سالانىڭ ماماندارى قامتىلعانىن ايتتى.

«ءبىزدىڭ پارتيامىزدا ەكولوگيانى قورعاۋشىلار، عالىمدار، زاڭگەرلەر، ەكونوميستەر، مەنەدجەرلەر، كاسىپكەرلەر، قوعام قايراتكەرلەرى، دارىگەرلەر، مۇعالىمدەر بار. سونىمەن قاتار، ءار وڭىردەگى قوعام بەلسەندىلەرى ءبىزدىڭ پارتيامىزدىڭ مۇشەسى بولىپ وتىر. ءبىزدىڭ كانديداتتار قالىڭ بۇقارامەن سايلاۋ ناۋقانىندا 3 700 جينالىس، كەزدەسۋ وتكىزدى»، - دەدى پارتيا توراعاسى.

ونىڭ ايتۋىنشا، پارتيا وكىلدەرى الەۋمەتتىك جەلىلەر ارقىلى 4,5 ملن ادامدى قامتىعان.

«پارتيا مۇشەلەرى حالىققا پلاتفورمانى ءتۇسىندىردى. حالىقتىڭ تالاپتارى نەگىزىندە ءماجىلىس پەن ماسليحاتتارداعى پارتيانىڭ ءىس-قيمىل جوسپارىن جاساپ قويدىق. ادامداردىڭ دەنساۋلىعى مەن قۇقىقتارىن قورعاۋعا، قورشاعان ورتانى لاستاۋدى تەجەۋگە، تازا ەنەرگەتيكا مەن ونەركاسىپتى دامىتۋعا، جاڭا تەحنلوگيالار مەن ينۆەستيتسيالاردى تارتۋعا مىندەتتىمىز. اتاپ ايتقاندا، بالالاردىڭ تازا تابيعاتتا ءومىر سۇرۋىنە جاعداي جاساۋ – بارشامىزدىڭ مىندەتىمىز»، - دەدى ول.

«اگروبانك قۇرۋ كەرەك»

«اۋىل» حالىقتىق دەموكراتيالىق پارتياسى توراعاسىنىڭ ورىنباسارى جيگۋلي دايراباەۆ ەلىمىزدە وتاندىق اۋىل شارۋاشىلىعى تەحنيكاسىن قۇراستىرۋعا باسىمدىق بەرۋ كەرەكتىگىنە توقتالدى.

«اۋىل» پارتياسى ىرگەلى ساياسي ۇيىم ەكەنى بەلگىلى. قازىر پارلامەنت ءماجىلىسى دەپۋتاتتارىن سايلاۋ ناۋقانىنا قاتىسىپ جاتىرمىز. قاتارىمىزعا ەلدى، جەردى سۇيەتىن ناعىز پاتريوت ازاماتتار بىرىككەن»، - دەدى جيگۋلي دايراباەۆ.

وسى ورايدا، ول پارتيادا مىڭداعان ادام قامتىلعانىن جانە پىكىرسايىسقا وسى ازاماتتاردىڭ سەنىمىن ارقالاپ كەلگەنىن ايتتى.

«ءبىزدىڭ پارتيا بارلىق اۋدان مەن قالالاردا تۇراقتى جۇمىس ىستەپ كەلەدى. وسى سايلاۋدا پارتيا ناتيجەسى جوعارى بولاتىنىنا سەنىمدىمىز. پارتيانىڭ پوزيتسياسى ايقىن – قوعامداعى نەگىزگى ساياسي كۇشكە اينالۋ»، - دەدى پارتيا وكىلى.

بۇل تۇرعىدا ول «اۋىل» پارتياسى ازىق-تۇلىك قاۋىپسىزدىگىنە جانە اۋىلداردى دامىتۋعا ەرەكشە نازار اۋدارىپ وتىرعانىن جەتكىزدى. پارتيا ماجىلىسكە وكەن جاعدايدا، ءتيىستى زاڭداردى قابىلداۋعا ۇلەس قوسىپ، ءادىل جۇمىس اتقارۋعا دايىن.

«حالقىمىز بانك جۇيەسىنەن دە زارداپ شەگىپ وتىر. سەبەبى، نەسيەنىڭ پايىزدىق ۇستەمەسى تىم جوعارى، حالىق قارىزعا ابدەن باتقان. سونىمەن قاتار، الەۋمەتتىك سالادا قوردالانعان ماسەلە كوپ. اتاپ ايتقاندا، ماجىلىسكە وتكەن جاعدايدا، ازىق-تۇلىك قاۋىپسىزدىگى تۋرالى زاڭدى حالىقپەن اقىلداسا وتىرىپ قابىلدايمىز. اۋىلدىڭ ينفراقۇرىلىمى توزدى، سوندىقتان ەلدى مەكەندەردەگى جەلىلەردى قالپىنا كەلتىرۋ كەرەك. سالانى تىعىرىقتان شىعارۋ ءۇشىن 100 پايىز مەملەكەتتىك كاپيتالمەن اگروبانك قۇرۋ ماسەلەسىن شەشەمىز. بۇدان بولەك، اۋىل شارۋاشىلىعى تەحنيكاسىن جاڭارتۋ ماقساتىندا وتاندىق تەحنيكانى قۇراستىرۋعا باسىمدىق بەرەمىز»، - دەدى جيگۋلي دايراباەۆ.

«اق جول» قيالي ۋادە ەمەس، ناقتى ءىس اتقارادى»

«اق جول» دەموكراتيالىق پارتياسىنىڭ توراعاسى ازات پەرۋاشەۆ پارتيانىڭ پارلامەنتتەگى باستى جەتىستىكتەرىنە توقتالدى.

«اق جول» دەموكراتيالىق پارتياسى – وتاندىق ونىدىرىسشىلەر مەن ۇلتجاندى ازاماتتاردىڭ پارتياسى. باسقالار ءوز قيالىمەن ۋادەنى ءۇيىپ-توكسە، ءبىز ناقتى نە ىستەگەنىمىزدى جانە بۇل جۇمىستى ءارى قاراي قالاي جالعاستىراتىنىمىز تۋرالى ايتامىز. ءبىزدىڭ باسىمدىقتار، ۇلتتىق ۇستانىمدار – ەركىن ەكونوميكا مەن وتاندىق وندىرۋشىلەردى قولداۋ، پارلامەنتتىك رەسپۋبليكا، دەوفشوريزاتسيا مەن كاپيتالدى ەلگە قايتارۋ»، - دەدى ازات پەرۋاشەۆ.

ونىڭ ايتۋىنشا، «اق جول» فراكتسياسى پارلامەنتتەگى جۇمىسى كەزىندە زاڭ جوبالارىنا 10 مىڭنان استام ۇسىنىس، 600-دەن استام دەپۋتاتتىق ساۋال جولداپ، 14 زاڭ جوباسىنىڭ ۇيىتقىسى بولدى.

«بيۋدجەتتىڭ اتقارىلۋى تۋرالى ەسەپتەر، مينيسترلەردى تاعايىنداۋ جانە باسقا دا ماڭىزدى ماسەلەلەردى تالقىلاعاندا «اق جول» وزگەشە پىكىرىن ايتىپ، داۋىس بەرگەندە ۇكىمەتتى ۇدايى قولدامادى. پارلامەنتتە جۇمىس ىستەگەندە ءبىز بيلىك تاراپىنان جىلدار بويى كەدەرگى قويىلىپ كەلگەن بىرقاتار ماڭىزدى باستاما كوتەردىك. پرەزيدەنت قاسىم-جومارت توقاەۆتىڭ تىكەلەي تاپسىرماسىمەن ءبىز 2012 جىلدان باستاپ ۇسىنعان «پارلامەنتتىك وپپوزيتسيا تۋرالى» زاڭ قابىلداندى، «اق جول» پارتياسى 2014 جىلدان بەرى ۇسىنىپ كەلە جاتقان «جەكە تۇلعالاردىڭ بانكروتتىعى تۋرالى» زاڭ قابىلداندى، وكم جانە ققت مونوپولياسى جويىلدى، ءبىز 2017 جىلدان بەرى ولاردىڭ زاڭسىز ەكەنىن بىرنەشە رەت كورسەتكەن ەدىك»، - دەدى پارتيا باسشىسى.

سونداي-اق، پرەزيدەنت 1 قىركۇيەكتەگى جولداۋىندا «اق جول» 2011 جىلدان بەرى كوتەرگەن سالىقتاردىڭ سارالانعان مولشەرلەمەلەرىن ەنگىزۋدى، وتاندىق كاسىپورىنداردى مەملەكەتتىك ساتىپ الۋلاردا قولداۋدى تاپسىردى، ءبىز ونى 2015 جىلدان باستاپ تالاپ ەتىپ كەلدىك، «كاپيتالدى قايتارۋ تۋرالى» زاڭدى ازىرلەۋدى «اق جول» پارتياسى 2013 جىلدان بەرى تالاپ ەتىپ كەلدى جانە تاعى باسقالارى بار.

«2019 جىلى «اق جول» پارتياسى ۇلكەن وزگەرىستەر بولاتىنىن، بىراق ولاردى باسقارۋ ماڭىزدى ەكەنىن ايتتى. ءبىزدىڭ باعدارلاما وسىنداي ناقتى وزگەرىستەرى بار ۇسىنىستاردان تۇرادى. ءبىز ونىڭ پرەزيدەنت توقاەۆتىڭ ۇستانىمىمەن ۇندەس ەكەنىن كورىپ وتىرمىز، ول جاقىندا جاڭا رەفورمالار پاكەتىن ۇسىناتىنىن ايتتى. «اق جول» پارتياسى وزگەرىستەر جاي عانا ادەمى ءسوز ەمەس، ناقتى ىستەر بولۋى ءۇشىن ءوز ۇلەسىن قوسادى»، - دەدى ازات پەرۋاشەۆ.

«تاڭداۋ جاساۋدان جالىقپايىق»

«قازاقستان حالىق پارتياسى» بولسا قاراپايىم ادامداردىڭ، ونىڭ ىشىندە كوپ بالالى انالار مەن بالالار، جاستار جانە جاس وتباسىلاردىڭ قۇقىقتارىن قورعاۋعا اسا ءمان بەرمەك.

«ادامدى العا جەتەلەيتىن دە، ومىردەن تۇڭىلدىرەتىن دە – سەنىم. ەڭ الدىمەن قۇدايعا، سوسىن وزىمىزگە سەنەمىز. بىراق، وزگەگە سەنبەيمىز، ويتكەنى ونى جوعالتىپ الدىق. قازاق حالقى سوعىستى دا، اشتىقتى دا كوردى. قابىرعاسى قانشا قايىسسا دا تۇڭىلمەدى. وزگە ەلگە كەتىپ قالىپ نەمەسە مەن ءۇشىن بارلىعى شەشىلىپ قويعان دەپ ۇيدە وتىرۋ قيىن ەمەس. مەن دە سولاي ەتە الار ەدىم. الايدا، مىنە ساعات 20:00-دە اۋىرىڭقىراپ قالعان ءبىر جاستان اسقان بالامدى تاستاپ، حالىق الدىنا شىعىپ تۇرمىن. ەرىككەننىڭ ءىسى مە؟ ايەل الدىمەن وزگەنى، سوسىن بارىپ ءوزىن ويلايدى، اسىرەسە انا. ميتينگىگە شىعىپ جۇرگەن انا، بالا باعىپ وتىرۋدىڭ ورنىنا جۇمىس ىستەپ جۇرگەن انا. ۋاقتىلى زەينەتكە شىعا الماي، بالاسىنا ماسىل بولىپ وتىرعان انا قانشاما. ءوز باسىم ۇلىم اسكەردەن امان ورالسىن، بالالارىم كۇندەلىكتى ناپاقاسىن ويلاماي عالىم بولسىن، ەلگە ەڭبەگى ءسىڭسىن دەپ تىلەيمىن»، - دەدى «قازاقستان حالىق پارتياسىنىڭ» مۇشەسى وكسانا اۋباكىروۆا. پارتيا وكىلى 63 جاسقا دەيىن جۇمىس ىستەمەي، ايالى اجە بولىپ، پاراساتتى ۇرپاق تاربيەلەگىسى كەلەتىنىن ايتتى.

«بۇل – مەنىڭ عانا ەمەس، بارلىق انانىڭ تىلەگى. ءبىز استانانىڭ ماڭىنداعى اۋىلدا تۇرامىز. گاز جوق، ول تۇگىلى سۋ دا جوق. كۇندەلىكتى سۋىن تاسىپ ىشەتىن حالىقتان نە سۇرايمىز؟ ەرەكشە قاجەتتىلىگى بار ادامدار، سال بالالار، اۋتيست، ولاردى ويلاپ جاتقان ادام بار ما؟ اتا-اناسى بار اۋرۋ بالالار قالاي بولعاندا دا قوعامعا قوسىلۋعا مۇمكىندىك الادى. ال، اتا-اناسىز بالالار دالادا قالىپ جاتادى. ميى بولسا دا، ءتىرى ولىك. ولاردىڭ اراسىندا مۇمكىن ەينشتەين بار شىعار؟ ايتپاقشى، ەينشتەين اۋتيست بولعان. ولاردى ويلاعان ەل اعاسى بار ما؟ «ويتەمىز، بۇيتەمىز» دەپ، «ۇيدەي بالەنى شەشەمىز» دەپ، كەيىن حالىقتىڭ اۋزى قۋ شوپپەن سۇرتىلەدى. بۇگىن مەن ۇلكەن سەنىممەن الدارىڭىزعا شىعىپ وتىرمىن. «ويان، قازاق» دەگەلى 118 جىل بولىپتى، ايتا-ايتا جاۋىر بولدى. ءوز تاڭداۋىمىزدى جاساۋدان جالىقپايىق»، - دەدى ول.

«مەملەكەت باسشىسى ساياسي رەفورمالار جوسپارىن جاريالادى، ەلىمىزدە ادام قۇقىقتارى جونىندەگى ۋاكىل، كونستيتۋتسيالىق سوت پايدا بولدى. ساياسي پارتيالاردى تىركەۋ شارتتارى وزگەرتىلدى، ەكى جاڭا پارتيا قۇرىلدى. پارتيالىق ەمەس ازاماتتارعا سايلانۋعا كونستيتۋتسيالىق قۇقىق قايتارىلدى، ەلدىڭ جۇزدەگەن ازاماتتارى ءبىر مانداتتى وكرۋگتەر بويىنشا ءماجىلىس پەن ماسليحاتتارعا ءوز كانديداتۋرالارىن ۇسىندى. «قازاقستان حالىق پارتياسى» قاراپايىم ادامداردىڭ، كوپ بالالى انالار مەن بالالاردىڭ، جاستار جانە جاس وتباسىلاردىڭ قۇقىقتارىن قورعايدى. بۇل – كەنشىلەر مەن مەتاللۋرگتەر پارتياسى، ءبىزدىڭ ارتىمىزدا ميلليونداعان جۇمىسشى تۇر»، - دەپ ءسوزىن تولىقتىردى «قازاقستان حالىق پارتياسىنىڭ» مۇشەسى.

«مادەنيەت تۇرعىسىنان ىرگەلى وزگەرىستەر كەرەك»

پىكىرسايىس بارىسىندا «Respublica» پارتياسىنىڭ توراعاسى ايداربەك قوجانازاروۆ ءوز جۇمىستارىنىڭ وزەگى بولاتىن نەگىزگى باعىتتاردى اتادى.

«بۇگىنگى تاڭدا ەلىمىز ۇلكەن داعدارىستا تۇر دەپ ايتقىمىز كەلەدى. بۇعان دەيىنگى پىكىرتالاستا پارتيامىزدىڭ تەڭ توراعاسى بۇل تارۋالى جاقسى ايتتى. ەل بيۋدجەتىنىڭ شىعىس بولىگى 21 ترلن تەڭگە بولسا، سالىق تۇسىمدەرى 17 ترلن تەڭگە بولىپ وتىر. سوندا ەلىمىزگە 4 ترلن تەڭگە تۇسپەي جاتىر. قازىر بانكروت الدىندا تۇرعانىمىزدى، داعدارىستا ەكەنىمىزدى مويىنداۋعا بولادى. ءبىزدىڭ كوماندا، پارتيانىڭ تەڭ توراعالارى – داعدارىستى ەڭسەرىپ ۇيرەنگەن مەنەدجەرلەر. مىسالى، رۋسلان بەردەنوۆتى الساق، «ەۆروفارمدى» نولدەن باستاپ كوتەردى. دينارا شۇكىجانوۆانى الساق، كەرەكسىز ەتىپ تاستاعان ديزەل زاۋىتىن ايگىلى «اگروماشحولدينگكە» اينالدىردى. قازىر ول زاۋىت ءتۇرلى تراكتورلار مەن كومبايندار قۇراستىرىپ وتىر. مەن دە قۇلدىراپ بارا جاتقان اگروحولدينگتى 5 جىلدىڭ ىشىندە ەلىمىزدەگى №1 اگروحولدينگكە اينالدىردىم»، - دەدى «Respublica» پارتياسىنىڭ توراعاسى.

ونىڭ سوزىنشە، بۇگىنگى تاڭدا بيزنەس-ورتانى جاقسارتۋ باعىتىندا وتە ماڭىزدى وزگەرىستەر ەنگىزەتىن ۋاقىت جەتتى.

«ءبىز ءارىبىر ازاماتىمىز ەركىن بولعانىن قالايمىز. ەركىن ادام دەگەن كىم؟ ەركىندىكتىڭ ءمانى دەنىڭ ساۋ، ءبىلىمىڭ، مادەنيەتىڭ بولعانىندا. سوندىقتان، ءبىز ءوز باعدارلامامىزدا ءۇش نەگىزگى ءبولىمدى بەلگىلەپ الدىق. ءبىرىنشى ءبولىم ءبىلىم بەرۋدى قامتيدى. ول ءۇشىن بىزگە ءبىلىم بەرۋ جۇيەسىن اۋىلدا دا، قالادا دا ادىلەتتىلىك تۇرعىسىنان تەڭەستىرۋ قاجەت. ەكىنشى ءبولىم – دەنساۋلىق ساقتاۋ جۇيەسىن جاقسارتۋ. بىزگە سكرينينگتەر اياسىن كەڭەيتىپ، اۋىرىپ ەم ىزدەمەي، الدىن الاتىنداي جۇيە ەنگىزۋ قاجەت. اۋرۋ تونبەي تۇرىپ، ۇلت ساۋلىعىنا جۇمىس ىستەۋىمىز قاجەت. سونداي-اق، مادەنيەتىمىزدى وڭداۋ قاجەت. وتكەندە ءبىرىنشى تەلەۆيزيالىق پىكىرسايىستى كوردىم. ءبىزدىڭ، ءتىپتى ساياسي دەڭگەيدەگى مادەنيەتىمىز وسىنداي بولسا، ۇلتىمىزدىڭ مادەنيەتى تۋرالى نە دەۋگە بولادى؟ بىزگە مادەنيەت تۇرعىسىنان ىرگەلى وزگەرىستەر كەرەك جانە ءبىز مادەنيەت ءتىلدى دامىتۋدان قالىپتاساتىنىن كورىپ وتىرمىز»، - دەدى ايداربەك قوجانازاروۆ.

«زاڭسىز بايلىققا جول بەرمەۋ قاجەت»

«جالپىۇلتتىق سوتسيال-دەموكراتيالىق پارتياسى» پرەزيدەنتتىك-پارلامەنتتىك باسقارۋ جۇيەسىن ەنگىزە وتىرىپ، حالىق پارلامەنتىن قۇرۋدى ۇسىندى.

«ءبىزدىڭ ماقسات – حالىقتىڭ تۇرمىستىق جاعدايىن جاقسارتۋ. سوندىقتان دا، ءبىز سايلاۋعا ءتۇسىپ جاتىرمىز. ءبىزدىڭ ەل سوتسيال-دەموكراتتاردىڭ يدەياسىنا مۇقتاج. سوندىقتان، ساياسي رەفورمالاردى جالعاستىرۋ كەرەك. ازاماتتار ءۇشىن قاجەتتى زاڭدار قابىلداۋ قاجەت. ءبىزدىڭ ۇسىنىستارىمىز – پرەزيدەنتتىك-پارلامەنتتىك باسقارۋ جۇيەسىن ەنگىزۋ. حالىق پارلامەنتىن قۇرۋ. سەناتتى تارقاتۋ. جەمقورلىقپەن جۇيەلى تۇردە كۇرەسۋ. تەرگەۋ جۇرگىزىپ، ەلدەن ۇرلانعان جانە وفشورلارعا جاسىرىلعان قاراجاتتى ەلگە قايتارۋ. تابيعي قازبالاردى وڭدەۋ جانە ولاردى ەكسپورتتاۋدى مەملەكەت قاراماعىنا قايتارۋ»، - دەدى «جالپىۇلتتىق سوتسيال-دەموكراتيالىق پارتياسى» استانا قالالىق فيليالىنىڭ توراعاسى نۇرلان اۋەسباەۆ پىكىرسايىس بارىسىندا.

ودان بولەك، سوتسيال-دەموكراتتار ءار ادامعا الەۋمەتتىك قولداۋ كورسەتۋگە ۋادە بەرىپ وتىر.

«ازاماتتاردىڭ ءومىر ستاندارتىن قابىلداۋ قاجەت، ياعني زەرتتەۋ جۇرگىزىپ، ارنايى باعدارلاما ەنگىزگەن دۇرىس. باعدارلامادا ادامداردىڭ نەگىزگى قاجەتتىلىكتەرى ەسكەرىلەدى. ءبىز ءۇشىن كەلەسى سۇراقتار ماڭىزدى: تەگىن ءبىلىم بەرۋ جانە مەديتسينا. مەكتەپتەر، اۋرۋحانالار باسقا دا الەۋمەتتىك نىساندار سالۋ. تۇرعىن ءۇي باعدارلامالارىن قايتا قاراپ جەتىلدىرۋ. سونىمەن قاتار، اۋىلدىڭ جاعدايىن جاقسارتۋ كەرەك. جەمقورلىق پەن وليگارحتارمەن كۇرەستى جالپى ۇلتتىق دەڭگەيگە كوتەرۋ. شەنەۋنىكتەردىڭ مىندەتتى تۇردە دەكلاراتسيا تاپسىرۋى. زاڭسىز بايلىققا جول بەرمەۋ. نەسيە پايىزدارىن تومەندەتۋ. ەنەرگەتيكا نىساندارىن جانە كوممۋنالدىق كاسىپورىنداردى مەملەكەت قاراماعىنا قايتارۋ. سونداي-اق، سايلاۋالدى باعدارلامامىزدا ەلدەن زاڭسىز شىعارىلعان قاراجاتتاردى قايتارۋ بويىنشا ۆەدومستۆوارالىق كوميسسيا قۇرامىنا ءبىزدى ەنگىزۋدى تالاپ ەتىپ وتىرمىز. بۇل ارنايى زاڭمەن رەتتەلۋى قاجەت»، - دەيدى ول.

Abai.kz