بۇگىن ۋچاسكەلەردە داۋىس بەرۋ جەرگىلىكتى ۋاقىت بويىنشا ساعات 07:00-دەن 20:00-گە دەيىن جۇرگىزىلەدى. ۋچاسكەلىك سايلاۋ كوميسسيالارى جەرگىلىكتى ۋاقىت بويىنشا ساعات 20:00-دە داۋىس ساناۋدى، داۋىس بەرۋ ناتيجەلەرى تۋرالى حاتتاما جاساۋدى باستايدى.

قازاقستان ازاماتتىر ءومىر سۇرەتىن شەت مەملەكەتتەردە 77 سايلاۋ ۋچاسكەسى اشىلعان. ۋاقىت بەلدەۋىنە بايلانىستى كەيبىر شەت مەملەكەتتەردە داۋىس بەرۋ بىزدەن ەرتە باستالادى. شەتەلدەگى سايلاۋ ۋچاسكەلەرى: ەۋروپا، ۇلىبريتانيا، رەسەي، اقش، قىتاي، كورەيا، ءۇندىستان سىندى بىرقاتار مەملەكەتتە اشىلدى.

بۇل جولى داۋىس ساناۋ پروتسەدۋراسى ۇزاققا سوزىلادى. سەبەبى بيۋللەتەندەر سانى ادەتتەگىدەن كوپ. بىراق، زاڭ بويىنشا داۋىستاردى ساناۋ 12 ساعاتتان اسپاۋى ءتيىس. داۋىستاردى ساناۋ بارلىق سايلاۋ ۋچاسكەلەرىندە تاڭعى 8:00-دە اياقتالادى.

رەسپۋبليكالىق ماڭىزى بار قالالاردا (استانا، الماتى جانە شىمكەنت) داۋىس بەرۋ ءتورت بيۋللەتەن بويىنشا سانالادى. ونىڭ ەكەۋى پارلامەنت ءماجىلىسى دەپۋتاتتارىن سايلاۋ جانە ەكەۋى – ءماسليحاتتار بويىنشا. ال 17 وبلىستا داۋىس بەرۋ بەس سايلاۋ بيۋللەتەنى بويىنشا وتپەك. ونىڭ ەكەۋى ءماجىلىس بويىنشا، ەكەۋى – وبلىستىق ءماسليحاتتار بويىنشا جانە بىرەۋى – اۋداندىق نەمەسە قالالىق ماسليحات بيۋللەتەندەرى.

قر كونستيتۋتسياسىنا سايكەس، پارلامەنت ءماجىلىسى ارالاس سايلاۋ جۇيەسى بويىنشا وتەدى. ءماجىلىس 98 دەپۋتاتتان تۇرادى. بىرىڭعاي جالپىۇلتتىق سايلاۋ وكرۋگى اۋماعى بويىنشا، ياعني پارتيالىق ءتىزىم بويىنشا ءماجىلىستىڭ 69 دەپۋتاتى، ءبىر مانداتتى اۋماقتىق سايلاۋ وكرۋگتەرى بويىنشا – 29 دەپۋتات سايلانادى.

بۇگىن 12 ملن-عا جۋىق ازامات تاڭداۋ جاسايدى. الدىن الا تۇرعىلىقتى جەرى بويىنشا 11 970 406 سايلاۋشى انىقتالدى.

ءماجىلىس سايلاۋىن بايقاۋعا 41 شەت مەملەكەت پەن 12 حالىقارالىق ۇيىمنان 793 بايقاۋشى رەسمي تىركەلدى.

سايلاۋ كۇنى 45 مىڭنان استام پوليتسەي قوعامدىق ءتارتىپتى قامتاماسىز ەتەدى.

Abai.kz