قازاقتاندا كەزەكتى قۇرلىق اسكەرلەرىنىڭ دايىندىعىن ارتتىرۋ ماقساتىندا بيىل وقۋ-جاتتىعۋلار ءوتىپ جاتىر. ۆزۆودتار جاتتىعۋى جاۋىنگەرلىك دايىندىقتى جەتىلدىرىپ قانا قويماي، بولىمشەلەردىڭ ءىس-قيمىلىن ۇيىمداستىرىپ، بايلانىسىن دامىتۋعا كومەكتەسەدى. ساربازدار تاكتيكالىق تاپسىرمالاردى جىلدام ورىنداپ، شارا جوعارى دەڭگەيدە ءوتىپ جاتىر.

جاتتىعۋ كەزىنە ساربازداردىڭ بەرىلگەن تاپسىرمالاردى جىلدام ورىنداۋىنا قاتتى نازار اۋدارىلادى. ۋاقىت ەداۋىر بولىگى دە سوعان جۇمسالادى. تاكتيكالىق، تاكتيكالىق-ارنايى جانە اتىس دايىندىعى، سونداي-اق جاۋىنگەرلىك ماشينالاردى جۇرگىزۋ بويىنشا نورماتيۆتەر تاپسىرىلادى.

اسكەريلەرگە مارش جاساۋ، تىرەك پۋنكتتەرىن قامتاماسىز ەتۋ، جاۋىنگەرلىك تارتىپپەن ساپقا تۇرۋ، ۇرىستا قورعانۋ جانە شابۋىل جاساۋ سىندى ناقتى ءىس-قيمىلدار ۇيرەتىلەدى.

جاۋىنگەرلىك اتىستارى نەمەسە باقىلاۋ ساباقتارىنان كەيىن ۆزۆودتاردى ۇيلەستىرۋ اياقتالادى. ۆزۆودتاردىڭ جاۋىنگەرلىك اتىستارى ۆزۆودتىڭ ۇرىستا، توسقاۋىل بەكەتىندە، كۇندىز دە، تۇندە دە نە ىستەۋى كەرەگىن ۇيرەتەتىن تاكتيكالىق دايارلىقتىڭ ءبىرى رەتىندە جۇرگىزىلەدى. وڭىرلەر بويىنشا اسكەر قۇرامدارىنىڭ ءار باعىتتا كورسەتە بىلگەن جاتتىعۋ ناتيجەلەرى ولاردىڭ دايىندىقتارى جاقسى ەكەنىن كورسەتتى.

مىسالى، جامبىل وبلىسى «ايشا ءبيبى» پوليگونىنداعى ۆزۆودتار ۇيىماستىرىلىپ، مينااتقىش ەسەپتوپتارىنىڭ قۇرامىنداعى ارتيللەريستەر اتىس تاپسىرمالارىن ءساتتى ورىنداپ، نورماتيۆتەرىن جاقسى تاپسىرىپ شىقتى.

«وڭتۇستىك» وڭق 5-ءشى مەحانيكالاندىرىلعان قۇراما ارتيللەريا شتابىنىڭ باستىعى مايور فەليكس ۋشاكوۆتىڭ ايتۋىنشا، ارتيللەريستەردىڭ جاۋىنگەرلىك دايارلىعىنىڭ اجىراماس بولىگى بولىپ سانالاتىن دالا جورىقتارى تەوريالى تۇرعىدان ءوتىپ، تاجىريبەدە پىسىقتالعانى اسا ماڭىزدى. قىستى كۇنى جاتتىعۋلار وتكىزۋ وڭاي ەمەس، دەگەنمەن بۇل مينااتقىشتاردىڭ ءىس-قيمىلدارىن شىڭداپ، قاجەتتى ماشىقتى مەڭگەرىپ شىعۋىنا كومەكتەسەدى.

ال «جەتىسۋ» وقۋ-جاتتىعۋ پوليگونىندا دەسانتتىق-شابۋىلداۋ بريگاداسىنىڭ ساربازدارى اتىس دايىندىعى اياسىندا وق اتۋدى باسقارۋ داعدىلارىن شىڭدادى. ولار قوزعالىستاعى جاۋىنگەرلىك ماشينالاردان اتىستى ورىندادى. ودان بولەك، بەيتانىس جەرلەردە ۇرىس جۇرگىزۋ تاكتيكاسىن شىڭداۋعا دا كوڭىل ءبولىندى.

اياگوز گارنيزونىنداعى «مايلين» پوليگونىندا تانك بريگاداسىنىڭ اسكەري قىزمەتشىلەرى اتۋ ماشىعىن مەڭگەرۋدى وتكىزىپ جاتىر. مۇندا بولىمشە كومانديرلەرى ۇرىستى ۇيىمداستىرۋ مەن جۇرگىزۋ ارقىلى ۆزۆودتاردى باسقارۋ داعدىلارىن دامىتادى.

جاۋىنگەرلىك دايارلىقتىڭ وسى كەزەڭىندە بولىمشەنىڭ تاكتيكالىق قيمىلى، سونداي-اق ۆزۆودتاردىڭ اتىسپەن تويتارىس بەرۋ ناتيجەلەرى باعالانادى.

Abai.kz