استانا قالاسىنىڭ اكىمى

يمانعالي تاسماعامبەتوۆتىڭ نازارىنا!

استانا قالاسىنىڭ اكىمى

يمانعالي تاسماعامبەتوۆتىڭ نازارىنا!

بۇگىندە استانانىڭ كوشەلەرىمەن ساياباقتارىندا ءجۇرۋ نەمەسە كوشە بويلاپ سەرۋەندەۋ دەگەننەن قوhقاتىن بولدىق. سەبەبى،  كوشەگە جانە بەلگىلى نىساندارعا جارىق بەۋ ءۇشىن تارتىلعان  ەلەكتر جەلىلەرىنىڭ ادام ومىرىنە قاۋىپتى جاعدايدا تۇرعاندىعى. قالاي  ەكەنىن بىلمەيمىن، باس قالانى جارىقپەن قامتاماسىز ەتەتىن مەكەمە ءوز ىسىنە سوڭعى ۋاقىتتاردا جاۋاپسىز بولىپ بارا جاتقان سىڭايلى. مۇنى اشىق -شاشىق تۇرعان توق كوزدەرىنەن انىق اڭعارۋعا بولادى. سوڭعى كەزدەرى بۇل ىسكە جاۋاپتى ورىن ءتىپتى دە نەمقۇرايلى قارايتىن بولعان سىڭايلى. ولاي دەيتىنىم، كوشەلەرگە جارىق بەرىپ تۇراتىن باعانالاردىڭ تومەنگى جاعى اشىق جاتىر. اپاتتى جاعداي  ورىن العان كەزدە عانا اشىلىپ، قايتادان سول ورىنىنا مۇقيات بەكىتىلىپ قوياتىن قاقپاق اتىمەن جوق. ونى بىرەۋ الىپ كەتتى دەپ ويلاساڭ،  جۇقا عانا قاڭىلتىردىڭ كىمگە كەرەگى بار؟  ال الگى قاقپاق تۇراتىن تەسىكتەن سىرتقا قاراي سالاقتاپ تۇرعان توك سىمدارىنىڭ ءبىرى ارنايى لەنتامەن ورالسا، ەندى ءبىرى ءتىپتى اشىق تۇر. العاشقىدا سالاقتاپ تۇرعان سىمداردىڭ بىرەۋگە زالالى تيمەسىن دەپ ىشىنە قاراي يتەرىپ كىرگىزبەك بولىپ بەكىنگەن ەدىم. بىراق اشىق تۇرعان توكتى ۇستاماق تۇگىلى قاسىنا بارۋعا قورىقتىم. ءسويتىپ، سول ماڭداعى جارىق بەرۋشى باعانالاردىڭ، باسقالارىنىڭ دا جاي-كۇيىن بىلمەك بولىپ ءبىرازىنىڭ تۇبىنە ءۇڭىلدىم. سويتسەم مەن باقىلاعان باعانالاردىڭ تەڭ جارتىسىنىڭ جاعدايى ءماز بولماي شىقتى. ول ول ما،  جاياۋ جۇرگىنشى جۇرەتىن ارنايى جولدىڭ ءۇستىن كەسىپ كەلەسى باعاناعا قوسىلىپ تۇرعان ەلەكتر جەلىسىن  كورگەندە راسىمەن دە قورقىپ كەتتىم.  مۇنداي سوراقىلىق قاردان تازارعان استانانىڭ كەز كەلگەن كوشەسىندە كوزگە تۇسەدى.  كەيبىر كوشە جيەگىندەگى جاسىل جەلەكتى الاڭقايلارعا  جارىق بەرەتىن باعانالار اتىمەن جوق.  قايدا كەتكەنى بەلگىسىز، تەك ورىنىندا اشىق-شاشىق قالىپ قويعان ەلەكتر جەلىلەرى عانا كوزگە تۇسەدى. ەڭ سوراقىسى سول، الگى سىمدار ارقىلى كەلەسى باعاناعا توك كوزى تارتىلعان.

قازىر كۇن جىلىندى، الدا جاز كەلە جاتىر. بەتىن اۋلاق قىلسىن. دالادا بەيقام ويناپ جۇرگەن بالا ابايسىزدا توكقا ءتۇسىپ قالىپ جازاتايىم بالەگە ۇشىراپ جۇرسە قايتەر ەدىك.  كىنانى توق ءجۇرىپ تۇرعان سىمدى ۇستاعان بالاعا ما، الدە ونى جونگە كەلتىرمەي وتىرعان قۇزىرلى ورىنعا  قويامىز با؟ وسى ءبىر كەلەڭسىزدىكتى جونگە كەلتىرمەسەك استانا اتىمىزعا سىن.

ءسوزىمىز دالەلدى بولۋ ءۇشىن استانا كوشەلەرىن جاياۋ ارالاپ، قالا تۇرعىندارىن سوزگە  تارتتىق. كەلەڭسىز جاعدايلاردى سۋرەتكە دە ءتۇسىرىپ الدىق.

اينۇر، جاس انا:

- مەن كۇندەلىكتى جۇمىستان كەيىن ەكى بالامدى سەرۋەندەتۋگە دالاعا شىعامىن. كەيدە بالالار اشىق تۇرعان توك كوزدەرىنە ءتۇسىپ قالاما - دەپ قورقاتىنىم راس.  نە دەگەنمەن بالالارىمدى ەلەكتر باعانالارىنان الىستا ويناتامىن.  نەگىزى  اشىق قالعان توك كوزدەرىن جاۋىپ قويسا الدەقايدا قولايلى بولار ەدى.

باقىتگۇل، جاس انا:

- قازىر بالالاردى نەدەن قورىساڭ ولار كەرىسىنشە سول دۇنيەگە اۋەس بولا بەرەدى. قازىر اۋلالارداعى بالالار وينايتىن الاڭقايلاردىڭ بارلىعىنا جارىق بەرىلگەن. كەيبىر جارىق بەرەتىن باعانالاردىڭ ەتەك جاعى اشىق تۇرادى. سول جەرگە بالالار قولىن سالىپ، توققا ءتۇسىپ قالاما دەپ قاتتى قورقامىن. سوندىقتان بالالاردى ويناتۋعا شىققان بالالارىمدى كوزدەن تاسا قىلماۋعا تىرىسامىن.

گۇلجان، قالا تۇرعىنى:

- مەن ۇنەمى جاياۋ جۇرگەندى ۇناتامىن. توك كوزىنىڭ اشىق تۇراتىن جاعدايلارى قالانىڭ كەز كەلگەن جەرىنەن ۇشىرايدى. ءتىپتى سوڭعى كەزدەرى كوبەيىپ بارادى.  تەك جارىق بەرۋشى باعانالار عانا ەمەس، ادامدار كوپ جۇرەتىن جەرلەر مەن ايالدامادان دا مۇنداي كەلەڭسىزدىكتەردى كورۋگە بولادى. ەندى ۇكىمەت پەن قالا باسشىلىعى بۇعان ءمان بەرمەسە تۇرعىنداردىڭ وزدەرى ابايلاپ جۇرۋگە تۋرا كەلەدى، باسقا امال جوق.

گۇل-زادا اجەي:

- قازىر قالادا كەز كەلگەن جەر ەلەكترمەن جابدىقتالعان. اشىق قالعان ەلەكتور جەلىلەرىنىڭ ءجيى كەزدەسەتىنى دە شىندىق.  مەن نەمەرەلەرىمدى ەرتىپ سەرۋەنگە شىققاندا ولارعا ۇنەمى ەسكەرتىپ وتىرامىن. اشىق قالعان توق كوزىنەن الىس جۇرىڭدەر دەپ. دەگەنمەن ولار بالا عوي، ويناپ ءجۇرىپ وقىس بولاما دەپ تە قورقامىن.  باسقا كوشەلەردى بىلمەيمىن مىناۋ ءبىزدىڭ باراەۆ كوشەسىنىڭ كەز كەلگەن جەرىندە اشىق تۇرعان جەلىنى  كورۋگە بولادى. قازىر ءتىپتى وعان كوز ۇيرەنىپ كەتتى. دەگەنمەن رەتكە كەلتىرىپ قويسا جاقسى بولار ەدى.

ازىرلەگەن

بەردىبەك حابايۇلى

Abai.kz