2015 جىلى قاراشا ايىندا قازاقستان تاريحىندا تۇڭعىش رەت «قايىرىمدىلىق تۋرالى» زاڭ قابىلداندى. زاڭدى قۇجاتتا قايىرىمدىلىق – قايىرىمدىلىق كومەك كورسەتۋگە جانە ىزگىلىك قاجەتتىلىكتەردى قاناعاتتاندىرۋعا نەگىزدەلگەن، فيلانتروپيالىق، دەمەۋشىلىك جانە مەتسەناتتىق قىزمەت، سونداي-اق كىشى وتانعا قولداۋ كورسەتۋ تۇرىندە ەرىكتى، وتەۋسىز نە جەڭىلدىكتى شارتتارمەن جۇزەگە اسىرىلاتىن الەۋمەتتىك پايدالى قىزمەت ەكەندىگى، قايىرىمدىلىق باعدارلاماسى – قايىرىمدىلىق كومەكتى جۇزەگە اسىرۋ مەرزىمدەرى مەن ءتارتىبىن قامتيتىن شارالار جۇيەسى ەكەنىدىگى، قايىرىمدىلىق ۆولونتەرى – قايىرىمدىلىق ۇيىمىمەن نەمەسە پايدالانۋشىمەن قازاقستان رەسپۋبليكاسىنىڭ ازاماتتىق زاڭناماسىنا سايكەس جاسالعان شارت نەگىزىندە ءوز تاجىريبەسىن، ارنايى داعدىلارىن، ءبىلىمىن، يكەمىن، جەكە بايلانىستارىن قولدانۋ ارقىلى قاراجات جيناۋعا قاتىساتىن جەكە تۇلعا بولىپ تابىلاتىنى انىق جازىلعان.

قوعامعا اسا قاجەت زاڭدى قابىلداۋداعى ماقسات – قايىرىمدىلىقتىڭ رۋحاني-ادامگەرشىلىك قۇندىلىقتارىن قالىپتاستىرۋ، قولداۋ جانە نىعايتۋ ارقىلى قوعامنىڭ ءوزىن-ءوزى ۇيىمداستىرۋىن دامىتۋعا جاردەمدەسۋ، قۇقىقتىق تۇرعىدا نەگىز قالاۋ بولىپ تابىلادى. سەبەبى قايىرىمدىلىقتىڭ بەيبىتشىلىكتى، دوستىق پەن قوعامدىق كەلىسىمدى، حالىق بىرلىگىن، رۋحاني مادەنيەتتى، وتباسىنىڭ قوعامداعى بەدەلى مەن ءرولىن نىعايتۋدا، سونداي-اق انا بولۋدى قورعاۋ، بالالار مەن جاستاردى پاتريوتتىققا تاربيەلەۋدە، ازاماتتار مەن قوعامنىڭ ماتەريالدىق، مادەني-ءبىلىم الۋ قاجەتتىلىكتەرىن قاناعاتتاندىرۋدا كورسەتەتىن رولى وتە زور. قايىرىمدىلىق كومەكتىڭ قامتيتىن اياسى وتە كەڭ.

جەكە تۇلعادان تارتىپ زاڭدى تۇلعاعا دەيىن، قوعامنىڭ بار سالاسىن، جابايى تابيعاتتى دا قامتيدى. ونىڭ ىشىندە الەۋمەتتىك جانە مەديتسينالىق مەكەمەلەرگە، ەتنومادەني بىرلەستىكتەرگە، مادەنيەت پەن ونەر، ءبىلىم بەرۋ، عىلىم، سپورت ۇيىمدارىنا جانە قازاقستان حالقى ءۇشىن مادەني-تاريحي ماڭىزى بار وبەكتىلەرگە، سونداي-اق كورسەتىلگەن سالالاردىڭ دامۋىنا ۇلەس قوسقان جەكەلەگەن قايراتكەرلەرگە قايىرىمدىلىق كومەك كورسەتۋ; تابيعاتتى پايدالانۋدى جاقسارتۋ، قورشاعان ورتانى قورعاۋ، جانۋارلار دۇنيەسىن جانە وسىمدىكتەر الەمىن قورعاۋعا قايىرىمدىلىق ءىس-شارالارى جۇزەگە اسىرىلادى.

قايىرىمدىلىق تۋرالى زاڭدا قايىرىمدىلىق جاساۋشىلار مىنانداي ساناتتارعا بولىنگەن: قايىرىمدىلىق جاساۋشى – قايىرىمدىلىقتى جۇزەگە اسىراتىن ادام، فيلانتروپ جانە (نەمەسە) دەمەۋشى جانە (نەمەسە) مەتسەنات جانە (نەمەسە) كىشى وتانعا قولداۋ كورسەتەتىن ادام. قايىرىمدىلىق كومەك – پايدالانۋشىعا قارجىلىق جانە (نەمەسە) ماتەريالدىق جاعدايىن جاقسارتۋ ماقساتىندا جاسالاتىن جاردەم. ول جەكە تۇلعانى الەۋمەتتىك قولداۋ تۇرىندە; دەمەۋشىلىك كومەك تۇرىندە جۇزەگە اسادى. جارعىلىق قىزمەتىن قولداۋ ماقساتىندا كوممەرتسيالىق ەمەس ۇيىمعا "سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى" قازاقستان رەسپۋبليكاسىنىڭ كودەكسىنە (سالىق كودەكسى) سايكەس ايقىندالاتىن وتەۋسىز نەگىزدە بەرەتىن مۇلىك بولىپ تابىلادى.

قازاقستانداعى قايىرىمدىلىق زاڭىنىڭ قابىلدانۋى قايىرىمدىلىق جۇمىستارىنىنىڭ جاندانۋىنا ۇيىمدارمەن جەكەلەردىڭ قايىرىمدىلىققا ات سالىسىپ، قوعامدى ىزگىلەندىرۋگە مىقتى سەرپىن بەردى.

قازىرگى كۇنى قازاقستاندا ۇلكەن قايىرىمدىلىق قورلار تۇراقتى جۇمىس ىستەيدى. ولاردىڭ قاتارىندا مەتسانت بولات وتەمۇراتوۆ قورى بار. قوردىڭ مۇراتى – دەنساۋلىق ساقتاۋدى، ءبىلىم مەن مادەنيەتتى دامىتۋعا ىقپالداسا وتىرىپ، قازاقستانعا بۇگىن جانە بولاشاقتا ادامدار ءومىر ءسۇرۋى ءۇشىن جاقسى مەكەنگە اينالۋعا كومەكتەسۋ. قوردى قۇرۋ يدەياسىن قوردىڭ قۇرىلتايشىسى بولات وتەمۇراتوۆقا ۇسىنعان. سونداي-اق «ايالا» قايرىمدىلىق قورىن اتاۋعا بولادى. قوردىڭ ميسسياسى – قازاقستان رەسپۋبليكاسىندا قايىرىمدىلىق مادەنيەتىن جانە ءداستۇرىن دامىتۋ. قور قىزمەتىنىڭ نەگىزگى باعىتتارى دەنساۋلىق ساقتاۋ جانە ءبىلىم بەرۋ سالاسىنداعى مەملەكەتتىك بالالار مەكەمەلەرىنە كومەك كورسەتۋ بولىپ تابىلادى. قازاقستانداعى قايىرىمدىلىق ىستەرى زاڭدى تۇلعالارمەن عانا جۇزەگە اسىپ تۇرعان جوق.

ەرىكتىلەردە ۇلكەن كۇشكە اينالعان. قايىرىمدىلىق ءىسى جالدى قوعامدىق ميسسياعا اينالدى دەسەكتە بولادى. وعان دالەل رەتىندە جىل سايىن الىپ بارىلاتىن «مەكتەپكە جول» اكتسيالارىن، توتەنشە جاعدايلار كەزىندەگى كوپ بولىپ كومەك بەرۋدى ايتۋعا بولادى. قازاقستانداعى قايىرىمدىلىق ىستەرى ەل اۋماعىمەن عانا شەكتەلىپ وتىرعان جوق. وزگە ەلدەرگە دە قانات جايۋدا. وعان ناقتى مىسال رەتىندە سوعىستان زارداپ شەگىپ جاتقان ۋكراينا حالقىنا كورسەتىلىپ جاتقان گۋمانيتارلىق كومەكتەردى. تۋىسقان تۇركى ەلىندە بولعان جەر سىلكىنىس كەزىندەگى مەملەكەتتىك كومەكتەن تىس ەرىكتى ازاماتتار كورسەتكەن قايىرىمدىلىق كومەكتەردى اتاۋعا بولادى. جۋرناليست نۇربەك بەكباۋ باستاماشى بولىپ «100 كيىز ءۇي» قايىرىمدىلىق جوباسىن ءساتتى جۇزەگە اسىردى. پرەزيدەنت توقاەۆ تۇركياعا ساپارلاي بارعاندا ەردوعان قازاقستانعا توتەنشە جاعدايدا كورسەتكەن كومەگى ءۇشىن العىس ايتتى.

قايىرىمدىلىقتىڭ قوعامعا دا، ەلگە دە ۇلكەن قايتارىمى بار. بۇل ىزگى ءداستۇر ارى قاراي جالعاسىن تاۋىپ، ەل ەڭسەسىن كوتەرۋگە ات سالىسا بەرەتىنىنە سەنىم مول.

Abai.kz