قوعام اراسىندا «اۋىل» پارتياسىنىڭ قوس دەپۋتاتىنا قاتىستى ماسەلە قىزۋ تالقىلانىپ جاتىر. ەكەۋى دە بىلتىر قازاقستان پرەزيدەنتتىگىنە ۇمىتكەر بولعان. ازاماتتىق بەلسەندىلەر ءبىرىن دەپۋتاتتىق مانداتتان ايىرۋ ءۇشىن پەتيتسيا جاريالاسا، ءبىرىن جاۋاپتى ورىندا وتىرۋعا مورالدىق حاقىسى جوق دەپ ايىپتايدى.

ماجىلىسكە بارا سالا باسى داۋعا قالعان قاراقات ابدەن پرەزيدەنتتىكە ۇمىتكەر بولعان كەزىندە دە شەت ەل ازاماتتارىنا تۇرمىسقا شىققان قازاق قىزدارىنا سالىق سالۋ تۋرالى ايتقان ەدى. ول ءماجىلىستىڭ العاشقى وتىرىسىندا دا وسى ايتقانىن قايتالادى. بۇدان كەيىن بەلسەندىلەر ق.ابدەن قر كونستيتۋتسياسىنىڭ 39-بابىن بۇزدى دەپ نارازىلىق ءبىلدىردى. بۇعان كەرى دايەك كەلتىرىپ، دەپۋتاتتى جاقتاعان ازاماتتاردىڭ دا قاراسى از ەمەس. سوڭعى شەشىمدى قاراقات ابدەن مەن «اۋىل» پارتياسى ايتادى. ال كوزى اشىق، كوكىرەگى وياۋ، ويلى وقىرمان اتالعان جايدىڭ اق-قاراسىن ءوزى انىقتاي جاتار.

قوعام تاراپىنان قارسىلىققا ۇشىراعان ەكىنشى دەپۋتاتتىڭ ەسىم-سويى – جيگۋلي دايراباەۆ. بۇل ازامات تا بىلتىرعى پرەزيدەنت سايلاۋىنا تۇسكەن. سول كەزدە ونىڭ ۇلدارىنا قاتىستى الاياقتىق بابىمەن قىلمىستىق ءىس قوزعالعانى تۋرالى اقپارات تاراعان بولاتىن. جاقىندا تاراز قالاسى №2 سوتى سۋبسيديالاردى ۇرلاۋ تۋرالى ءىس بويىنشا ۇكىم شىعاردى. قىلمىستىق كودەكستىڭ 190-بابى 4-بولىگى 2-تارماعى الاياقتىق، ياعني ادامدارمەن الدىن الا ءسوز بايلاسۋ ارقىلى اسا ءىرى مولشەردە بوتەننىڭ مۇلكىن جىمقىرۋ نەمەسە الداۋ نەمەسە سەنىمدى تەرىس پايدالانۋ جولىمەن بوتەن مۇلiككە قۇقىقتى يەمدەنۋ بويىنشا 4 ادامعا قاتىستى قىلمىستىق ءىس قارالعان. ونىڭ ەكەۋى دايراباەۆتىڭ ۇلدارى – كاسىپكەرلەر مارات دايراباەۆ جانە ديدار مولداقالىق. ول تۋرالى اقپاراتتى Abai.kz سايتىندا بۇعان دەيىن جاريالادىق. «اۋىل» پارتياسىنىڭ توراعاسى ورالوۆ مەيرامباي اسكەربايۇلى پارتيالاسىنىڭ سۇتتەن اق، سۋدان تازا ەكەنىن، سونداي-اق مىقتى مامان ەكەنىن ايتىپ، اتالعان جايت ونى دەپۋتاتتىق مانداتتان ايىرۋعا نەگىز بولا المايتىنىن العا تارتتى. ج.دايراباەۆ بولسا، ۇلدارىن ەس بىلەتىن ازاماتتار دەپ، قوعامداعى نارازىلىقتى اركىمنىڭ جەكە پىكىرى دەپ بىلەتىنىن جەتكىزدى.

Abai.kz