سولتۇستىك قازاقستان وبلىسىنىڭ شاعىن وزەندەرى مەن سەرگەەۆ سۋ قويماسىندا ەرنەۋىنەن تاسىپ توگىلگەن سۋدىڭ دەڭگەيى تۇسە باستاعانىمەن، بوگەتتەن تومەن ورنالاسقان گيدرولوگيالىق بەكەتتەردە سۋ كوتەرىلىپ جاتىر.

سولتۇستىك قازاقستانداعى سەرگەەۆ سۋ قويماسى 5 ساۋىردەن باستاپ تاسىعان ەدى. 8 ءساۋىر كۇنى بوگەت ارناسىنان اسقان سۋدىڭ بيىكتىگى 196 سم-گە جەتىپ، ەڭ جوعارى كورسەتكىش تىركەلدى. بۇل 2020 جىلعى كورسەتكىشپەن تەڭ.

«قازگيدرومەت» رمك سقو فيليالىنىڭ مالىمەتىنشە، قازىر سۋ قويماسىنىڭ ەرنەۋىنەن توگىلگەن سۋدىڭ بيىكتىگى – 145 سم.

ەسىل وزەنىنىڭ سالالارىندا سۋ قايتىپ، ال سەرگەەۆ سۋ قويماسىنان تومەن ورنالاسقان گيدرولوگيالىق بەكەتتەردە، كەرىسىنشە، سۋ دەڭگەيى كوتەرىلىپ بارادى. ماسەلەن، پوكروۆكا ەلدى مەكەنىنىڭ ماڭىندا ءبىر تاۋلىكتە 139 سم، نوۆونيكولسكوە ەلدى مەكەنىنىڭ ماڭىندا 275 سم كوتەرىلدى.

تاسقىن سۋ وبلىس ورتالىعىنا دا جەتىپ قالدى. پەتروپاۆل سۋ قويماسىنداعى بەكىتپەلەردى اشقاننان كەيىن قالا ماڭىنداعى گيدروپوستتا ءبىر تاۋلىكتە سۋ دەڭگەيى 136 سم جوعارىلادى.

ەستەرىڭىزدە بولسا، سولتۇستىك قازاقستاندا سوڭعى رەت اۋقىمدى سۋ تاسقىنى 2017 جىلى بولدى. ول كەزدە سەرگەەۆ سۋ قويماسىنىڭ ارنادان اسىپ توگىلگەن سۋدىڭ دەڭگەيى 338 سم جەتكەن ەدى.

Abai.kz