بۇگىن جيگۋلي دايراباەۆ ءماجىلىس وتىرىسىندا سوتتالعان ۇلدارى تۋرالى مالىمدەمە جاسادى. دەپۋتات بالالارىن كىناسىز دەپ سانايدى.

«ارداقتى ارىپتەستەر! الدىمەن سىزدەرگە ريزاشىلىعىمدى بىلدىرگىم كەلەدى. بالالارىما بايلانىستى تۋىنداعان ماسەلە بويىنشا كوبىڭىز دەپۋتات، ارىپتەس رەتىندە قولداۋ كورسەتىپ جاتىرسىزدار. مورالدىق جاعىنان ادىلدىك تانىتىپ، قۇقىقتىق جاعىنان ساۋاتتىلىق بىلدىرگەندەرىڭىزدى جوعارى باعالايمىن. بالالارىمدى كىنالى دەپ ەسەپتەمەيمىن. ولار ادىلدىك ءۇشىن كۇرەسەدى. اپەللياتسيالىق سوتقا جۇگىنىپ، ابىرويىن قورعاۋعا مۇددەلى. ەندەشە مەن نە ءۇشىن ماجىلىستەن كەتۋىم كەرەك؟ اۋىل تۇرعىندارى، شارۋالار، ءوزىمدى سايلاعان «اۋىل» پارتياسى ماعان ۇلكەن ءۇمىت ارتىپ وتىر. كوپتەگەن وتكىر ماسەلەلەردى قولعا الىپ، جۇمىس ىستەۋىم كەرەك»، – دەدى دەپۋتات.

بىلتىر پرەزيدەنت سايلاۋىنا تۇسكەن جيگۋلي دايراباەۆتىڭ ەكى ۇلىنا قاتىستى الاياقتىق بابىمەن ءىس قوزعالعان. تاراز قالاسى №2 سوتى سۋبسيديالاردى ۇرلاۋ تۋرالى ءىس بويىنشا ۇكىم شىعاردى. قىلمىستىق كودەكستىڭ 190-بابى 4-بولىگى 2-تارماعى الاياقتىق، ياعني ادامدارمەن الدىن الا ءسوز بايلاسۋ ارقىلى اسا ءىرى مولشەردە بوتەننىڭ مۇلكىن جىمقىرۋ نەمەسە الداۋ نەمەسە سەنىمدى تەرىس پايدالانۋ جولىمەن بوتەن مۇلiككە قۇقىقتى يەمدەنۋ بويىنشا 4 ادامعا قاتىستى قىلمىستىق ءىس قارالعان. ونىڭ ەكەۋى دايراباەۆتىڭ ۇلدارى – كاسىپكەرلەر مارات دايراباەۆ جانە ديدار مولداقالىق.

ولار مەملەكەتكە 550 ميلليون تەڭگەدەن شىعىن كەلتىرىلدى. دايراباەۆتىڭ ەكى ۇلى شارتتى تۇردە 5 جىلعا سوتتالدى.

«اۋىل» پارتياسىنىڭ توراعاسى ورالموۆ مەيرامباي اسكەربايۇلى پارتيالاسىنىڭ سۇتتەن اق، سۋدان تازا ەكەنىن، سونداي-اق مىقتى مامان ەكەنىن ايتىپ، اتالعان جايت ونى دەپۋتاتتىق مانداتتان ايىرۋعا نەگىز بولا المايتىنىن العا تارتتى. ج.دايراباەۆ بولسا، ۇلدارىن ەس بىلەتىن ازاماتتار دەپ، قوعامداعى نارازىلىقتى اركىمنىڭ جەكە پىكىرى دەپ بىلەتىنىن جەتكىزدى.

«وعان ءمىن تاعا المايمىز.. ول مانداتىن تاپسىرمايدى. مەن فراكتسيانىڭ مالىمدەمەسىن ايتىپ وتىرمىن. ونىڭ ابىرويى بار، ارى تازا. ءبىزدىڭ پارتيامىزدىڭ فرونتمەنى. سوندىقتان، فراكتسيا رەتىندە پوزيتسيامىز وسىنداي»، - دەدى اناس باقتىقوجاەۆ ءماجىلىستىڭ كۋلۋارىندا.

ايجان تەمىرحان

Abai.kz