اتىراۋ قالاسىنىڭ اۋاسىن لاستاعان ەكى كاسىپورىن تەكسەرىلىپ جاتىر. بۇل تۋرالى ەكولوگيالىق رەتتەۋ جانە باقىلاۋ كوميتەتى توراعاسىنىڭ مىندەتىن اتقارۋشى ايدار ابدۋاليەۆ ايتتى، دەپ حابارلايدى Ulysmedia.kz.

«وتكەن اپتادا اتىراۋ وبلىسىندا بىرقاتار وقيعا (ەكولوگيالىق) بولدى. قورشاعان ورتانىڭ لاستانۋ سەبەبىنىڭ ءبىرى – اقجايىق تابيعاي رەزەرۆاتىنداعى ءورت. ەكىنشىسى – اتىراۋ مۇناي وڭدەۋ زاۋىتىنداعى ء(اموز) اپات. ءدال سونداي اپات «KPI» وندىرىسىندە دە تىركەلدى. اتىراۋدىڭ اۋاسىن كۇكىرتسۋتەكپەن لاستاپ تۇرعان نەگىزگى كوزدەر – جۇرت «تۋحلايا بالكا» جانە «كۆادرات» دەپ اتاپ كەتكەن نىساندار. جەل وسى نىسانداردا بۋلانعان شىعارىندىلاردى قالاعا جەتكىزگەن. ەكولوگيا دەپارتامەنتى سىنامالار الىپ، كۇكىرتسۋتەكتىڭ نورمادان اسىپ كەتكەنىن انىقتادى»، - دەدى ايدار ابدۋاليەۆ.

ايتۋىنشا، ماتەريالدار اتىراۋ وبلىسى بويىنشا سانتياريالىق-ەپيدەميولوگيالىق قاداعالاۋ باسقارماسىنا جولدانعان.

ال، اتىراۋ مۇناي وڭدەۋ زاۋىتىندا 8 ساۋىردەن بەرى تەكسەرۋ ءجۇرىپ جاتقانى بەلگىلى بولدى. ەگەر تەكسەرۋ قورىتىندىسى بويىنشا بۇزۋشىلىقتار انىقتالاتىن بولسا، مينيسترلىك زاۋىت جۇمىسىن توقتاتۋ جونىندە سوتقا جۇگىنبەك.

KPI كاسىپورنىنداعى جوسپاردان تىس تەكسەرۋ كەزىندە گازدىڭ اۋادا رۇقساتسىز ورتەنگەنى انىقتالعان. بۇل فاكتى دە تەكسەرىلىپ جاتىر.

ايتا كەتەيىك، بۇدان بۇرىن اتىراۋدىڭ اتموسفەرالىق اۋاسىندا كۇكىرتتى سۋتەگى شەكتى نورمادان 20 ەسەگە ارتقانى ءمالىم بولعان.

Abai.kz