قىزىلوردا وبلىسىنىڭ بىرنەشە شەنەۋنىگى جارتى ميللياردتان استام قاراجاتتى جىمقىردى دەگەن كۇدىككە ءىلىندى.

قىزىلوردا وبلىسى بويىنشا سىبايلاس جەمقورلىققا قارسى قىزمەت قىلمىستىق كودەكستىڭ 189-بابى 4-بولىگى، 2-تارماعى بويىنشا جاڭاقورعان اۋداندىق ءبىلىم ءبولىمىنىڭ باسشىسى مەن بۋحگالتەرىنە قاتىستى قىلمىستىق ءىستى تەرگەپ جاتىر.

ولار ءبىلىم بەرۋ مەكەمەلەرىندە قىزمەت ەتپەيتىن تۇلعالاردىڭ ەسەپ-شوتىنا ەڭبەكاقى تۇرىندەگى قارجى اۋدارىپ، 543 ميلليون تەڭگە سوماسىندا بيۋدجەت قاراجاتىن جىمقىردى دەگەن كۇدىككە ءىلىندى.

قىزىلوردا قالاسىنىڭ مامانداندىرىلعان تەرگەۋ سوتىنىڭ سانكتسياسىمەن كۇدىكتىلەر قاماۋعا الىندى.

قىلمىستىق پروتسەستىك كودەكسىنىڭ 201-بابىنا سايكەس تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.

كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ارقايسىسى كىناسىز دەپ ەسەپتەلەدى.

وبلىستىق ءبىلىم باسقارماسى باسشىسى مەيرامبەك شەرماعانبەتتىڭ ايتۋىنشا، بۇل اقپارات ورتا جانە ارناۋلى ءبىلىم بەرۋ مەكەمەلەرىنىڭ 2020-2021 جىلدارداعى جانە 2022 جىلدىڭ ءبىرىنشى جارتىجىلدىعىنداعى ەڭبەكاقى تولەۋدەگى زاڭسىزدىقتىڭ ناتيجەسىندە تۋىنداعان.

Abai.kz