الماتىدا زيراتتاردى بۇزۋ وقيعاسى جيىلەپ كەتتى. ءتۇستى مەتالل ىزدەگەندەر قورشاۋلاردى، ەسكەرتكىشتەردى جانە تاعى باسقالاردى الىپ كەتەدى. بۇل تۋرالى ەۆرازيا بىرىنشى تەلەارناسى حابارلادى.

ونى تۋعان-تۋىستارىنىڭ بەيىتىنە زيارات ەتۋگە كەلگەن قالا تۇرعىندارى كورىپ، ۆيدەوعا ءتۇسىرىپ العان. ولاردىڭ پايىمداۋىنشا، مۇنداي توناۋ اۋماقتى باقىلاۋدىڭ جەتكىلىكسىزدىگىنەن بولىپ وتىر. ال بۇل ماسەلەنى رەتكە كەلتىرۋگە بەينەباقىلاۋ كامەرالارى كومەكتەسەر ەدى. زيرات باسشىلىعى بولسا، ءار بەيىتتى كۇزەتە المايمىز دەپ وتىر.

نەگىزىنەن زيراتتى كۇتىپ ۇستاۋ قىزمەتىن «مامانداندىرىلعان جەرلەۋ قىزمەتتەرى كومبيناتى» اتقارادى. بىراق قازىر جەكە مەكەمە كۇزەتىپ وتىر.

سەرىكتەستىك بەيىتتەر، قورشاۋلار، ەسكەرتكىشتەر سياقتى مۇلىكتىڭ ساقتالۋىنا جاۋاپ بەرمەيدى. جەرلەۋگە بولىنگەن ۋچاسكەنىڭ شەكاراسىنداعى بەيىت قۇرىلىسى – تۋىستارىنىڭ نەمەسە ولاردى قۇرعان مەكەمەلەردىڭ مەنشىگى، - دەيدى «قالانىڭ جەرلەۋ قىزمەتتەرىنىڭ مامانداندىرىلعان كومبيناتى» جشس ديرەكتورىنىڭ ورىنباسارى.

سونىمەن قاتار كومپانيا كەيىنگى جىلدارى ۆانداليزم فاكتىلەرى شىنىمەن دە جيىلەپ كەتكەنىن راستادى. زيرات قىزمەتكەرلەرى قىلمىسكەرلەردى ءبىر ەمەس، بىرنەشە رەت وقيعا ورنىنان ۇستاعان كورىنەدى. بىراق ولار ماسەلەنى شەشۋ ءۇشىن ءتۇستى مەتالل قابىلداۋ پۋنكتەرىنە باقىلاۋدى كۇشەيتۋ كەرەك دەپ ەسەپتەيدى.

Abai.kz