VII شاقىرىلىمداعى ەكس-دەپۋتات بەرىك دۇيسەنبينوۆ 2022 جىلدىڭ جەلتوقسانىندا ءماجىلىس وتىرىسىندا مالىمدەمە جاساپ، پايدالانىلماي جاتقان اۋىل شارۋاشىلىعى جەرلەرى مەملەكەتكە قايتارىلىپ جاتىر دەگەنگە سەنبەيتىنىن، وڭىرلەردەگى جەرلەردىڭ باسىم بولىگى اكىمدەرگە تيەسىلى ەكەنىن ايتتى.

بەرىك دۇيسەمبينوۆ «وسكەمەنگە بارساڭىز، جەردىڭ ءبارى دانيال احمەتوۆتىكى، ال پاۆلودارعا بارساڭىز باقاۋوۆتىكى. استانانىڭ ماڭايىندا ومىرزاق شوكەەۆتىكى. ونى ايتۋعا ءبارى قورقىپ وتىر» دەگەن ەدى.

بۇگىن استانادا وتكەن قازاقستاننىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەيتىلگەن وتىرىستان شىققان شقو اكىمى دانيال احمەتوۆ ەكس-دەپۋتاتتىڭ مالىمدەمەسىنە «جالا» دەپ جاۋاپ بەردى،-دەپ جازدى Halyq-uni.

بۇل – جالا. مەندە ءبىر شارشى مەتر جەر جوق. سوندىقتان ول كىسىگە مەن ەشتەڭە ايتا المايمىن. نەگە؟ سەبەبى، ول كىسىنىڭ دەپۋتاتتىق مارتەبەسى بار. (قازىر بەرىك دۇيسەمبينوۆ دەپۋتات ەمەس). بىراق ونىڭ (ايتقان) ءسوزى مادەنيەتسىزدىك بولدى. وسكەمەندەگى جەردىڭ ءبارى ماعان تيەسىلى دەپ ايتۋ ساندىراق. بۇل اقپارات ناقتىلانباعان. سوندىقتان شىعىس قازاقستان وبلىسى اكىمدىگىنىڭ ءباسپاسوز قىزمەتى مەن جەر قاتىناستارى كوميتەتى ءتيىستى اقپاراتتى بەردى، - دەدى وبلىس اكىمى.

بۇعان دەيىن Halyq Uni دەپۋتاتتىڭ مالىمدەمەسىنە قاتىستى رەسمي ساۋال جولداپ، وعان شقو جەر قاتىناستارى باسقارماسىنىڭ باسشىسى نادەجدا ميحەيليس جاۋاپ بەرگەن ەدى. نادەجدا ميحەيليس جەر قاتىناستارى جونىندەگى وبلىستىق ۋاكىلەتتى ورگاننىڭ باسشىسى رەتىندە تۇسىنىكتەمە بەرىپ، اقپاراتتى جوققا شىعاردى.

Abai.kz