ستامبۋلدا قاقتىعىس كەزىندە قازاقستان ازاماتىنا وق ءتيىپ، جاراقات الدى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى.

«18 ساۋىردە ىستانبۇلداعى قر باس كونسۋلدىعىنا ءبىزدىڭ ازاماتتان قوڭىراۋ كەلىپ ءتۇستى، ول وزىنە وق تيگەنىن حابارلادى. كونسۋل دەرەۋ زارداپ شەككەن ازاماتقا بارىپ، ونى جەرگىلىكتى اۋرۋحاناعا جەتكىزدى. مەديتسينالىق تەكسەرۋدەن ءوتتى، وتا جاسالادى دەپ كۇتىلۋدە. قازىر جەرلەسىمىزدىڭ جاعدايى تۇراقتى»، - دەدى ايبەك سمادياروۆ.

بەلگىلى بولعانداي، وتانداسىمىز جاراقات العان كەزدە قاسىندا ايەلى بولعان.

«الدىن الا مالىمەتتەر بويىنشا، وتانداسىمىز جەرگىلىكتى ازاماتتار اراسىنداعى اتىسقا كەزدەيسوق تاپ بولعان. ول وزدىگىنەن كەتىپ بارا جاتقاندا وق تيگەن. بۇگىندە پوليتسيا وقيعانىڭ ءمان-جايىن انىقتاۋ ءۇشىن تەرگەۋ جۇرگىزىپ جاتىر»، - دەيدى ۆەدومستۆودان.

Abai.kz