قارجى ءمينيسترى ەرۇلان جاماۋباەۆ ەكس-پرەزيدەنت نۇرسۇلتان نازارباەۆتىڭ تۋعان-تۋىسىنىڭ كەدەندەگى زاڭسىزدىقتارعا قاتىسى بار-جوعىنا جاۋاپ بەرىپ، بۇرىنعى مەملەكەت باسشىسىنىڭ اتىن اتاماي, «باستى بەنەفيتسيارلاردى ءوزىڭىز اتادىڭىز» دەپ تۇسپالدادى. ونىڭ سوزدەرىنەن كەدەن بەكەتتەرىندەگى «سۇر سحەماعا» نازارباەۆ اۋلەتىنىڭ قاتىسى بار ەكەنىن انىق بايقاۋعا بولادى.

قارجى ءمينيسترى كەدەندەگى زاڭ بۇزۋشىلىقتاردان 50 ملرد وندىرىلگەنىن حابارلادى.

«ول قۇقىقبۇزۋشىلار كىمدەر؟ قاراجات كىمنەن ءوندىرىلىپ الىندى؟» دەگەن سۇراققا «ول جەردە بىرنەشە ەكونوميكالىق وپەراتور بولدى. ءسىز سوڭعى بەنەفيتسيارلاردى ءوزىڭىز اتاپ ءوتتىڭىز»، - دەدى مينيستر.

ەرۇلان جاماۋباەۆ كەدەندەگى زاڭبۇزۋشىلىقتار تۋرالى مالىمەتتەردىڭ بارلىعىن قۇقىق قورعاۋ ورگاندارى بىلەتىنىن ايتىپ، جۋرناليستەردى سوندا سىلتەدى.

«ول جەردە ارنايى توپ، نەگىزىنەن قۇقىق قورعاۋ ورگاندارى جۇمىس ىستەدى. ولاردىڭ ءىس-قيمىل الگوريتمى، جۇمىسى، تەرگەۋ شارتتارى بار. ەگەر ولار وسى تارماقتاردى اشسا، ءوتىنىش جىبەرىڭىز. ورگاندار بىزگە ايتپايدى»، - دەدى جاماۋباەۆ.

2022 جىلعى قاڭتار وقيعاسىنان كەيىن پرەزيدەنت توقاەۆ كەدەندىك ايماقتاردى جەمقورلىق جايلاعانىن ايتىپ، ءتارتىپتى قالپىنا كەلتىرۋدى تاپسىرعان.

بىلتىر 1 اقپاندا «دوستىق» جانە «التىنكول» كەدەن بەكەتتەرىنىڭ باستىقتارى ەرلان ومىرزاقوۆ پەن مالىك شاۋلەنوۆ ورنىنان الىندى. سول كۇنى قازتاگ اگەنتتىگى «ىقپالدى وتباسىعا» قاتىسى بارلاردىڭ فيرمالارى قىتايدان، بىرىككەن اراب امىرلىكتەرىنەن جانە تۇركيادان كونتراباندالىق تاۋارلار تاسىپ وتىرعان دەگەن اقپارات تاراتتى.

14 اقپاندا ءۇش اپتا ىشىندە قازاقستان مەن قىتاي شەكاراسىندا تەكسەرۋلەر بويىنشا سەگىز قىلمىستىق ءىس قوزعالعانى بەلگىلى بولدى.

3 مامىردا باس پروكۋراتۋرا كەدەن سالاسىنداعى زاڭسىز سحەمالاردان كەلتىرىلگەن زالال 165 ملرد تەڭگە دەپ كورسەتتى.

2023 جىلعى 2 اقپاندا قارجى مونيتورينگى اگەنتتىگى (قمق) الماتى وبلىسىنداعى «Eurotransit nur Zholy» جشس قاتىستى تەرگەۋدىڭ اياقتالعانىن حابارلادى. ۆەدومستۆونىڭ مالىمەتىنشە، اتالعان زاڭدى تۇلعا قىتايدان قازاقستانعا جۇك تاسىمالدايتىن جالعىز وپەراتور بولا وتىرىپ، بۇل قىزمەتتىڭ قۇنىن زاڭسىز كوتەرگەن.

قازاقستاندىق جۋرناليست دميتري شيشكيننىڭ ايتۋىنشا، اتالعان فيرما قايرات شارىپباەۆپەن ونىڭ جۇبايى داريعا نازارباەۆامەن بايلانىسى بار.

Abai.kz