اۋعانستانمەن ساۋدا ىنتىماقتاستىعى نىعايا تۇسپەك. مۇنى پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين مالىمدەدى.

سەرىك جۇمانعارين ۇكىمەت وتىرىسىنان كەيىن باق وكىلدەرىنىڭ قويعان سۇراعىنا: «ءبىز اۋعانستانمەن ىنتىماقتاسامىز، ساۋدانى دامىتامىز. ەكىجاقتى ساۋدا 1 ميلليارد دوللاردى قۇرايدى»، – دەپ جاۋاپ بەردى. ونىڭ ايتۋىنشا، بۇل ازەربايجانمەن، تۇركىمەنستانمەن جاسالعان ساۋدامەن سالىستىرعاندا ايتارلىقتاي كوپ ەكەن.

«اۋعانستانمەن ەكىجاقتى ساۋدادا بيداي، ۇن، كۇنباعىس مايى باسىمدىققا يە. نەلىكتەن بۇل مۇمكىندىكتەن باس تارتۋىمىز كەرەك؟ بۇل، سايىپ كەلگەندە، ءبىزدىڭ مەملەكەتىمىزگە پايدا اكەلەدى»، – دەدى ۆيتسە-پرەمەر.

سونداي-اق، مينيستر اۋعانستاندا ساۋدا ءۇيى اشىلىپ، وعان ارنايى وكىل تاعايىندالاتىنىن حابارلادى. «رەسمي وكىل جۇمىستى ۇيلەستىرۋگە جاۋاپتى، ويتكەنى اۋعانستاننىڭ اۋماعى ۇلكەن ءارى ءارتۇرلى. ەندى ەكىجاقتى ساۋدانى دامىتۋدا نارىقتى زەردەلەپ، جەرگىلىكتى كاسىپكەرلەرمەن تانىسۋ قاجەت. اۋعان كاسىپكەرلەرىن وسىندا شاقىرىپ، بيزنەس-فورۋم وتكىزگىم كەلەدى. ولارعا ءبىزدىڭ مۇمكىندىكتەرىمىزدى كورسەتكەن ءجون»، – دەدى سەرىك جۇمانعارين.

Abai.kz