اقتوبەنىڭ ىرعىز جانە شالقار اۋداندارىندا ءۇش اۋىلدا جارىق جوق. قازىرگى كەزدە قۇلاعان باعانالاردى قايتا ورناتۋ جۇمىسى اياقتالىپ قالدى.

ىرعىز اۋدانىندا جانىس بي، شەڭبەرتال اۋىلدارى جانە شالقار اۋدانىنىڭ تۇمالىكول اۋىلىندا جارىق جوق.

جانىس بي مەن شەڭبەرتال اۋىلدارىندا 12 ادام، 4 ارنايى تەحنيكا جۇمىلدىرىلدى.

«اۋىلداردى رەزەرۆتەگى جەلىگە قوسامىز. جانىس بي اۋىلىنداعى ىشكى جەلىلەردى قايتا تەكسەرىپ شىعىپ، كەشكە ەلەكتر توگىن بەرمەكپىز. شالقاردىڭ تۇمالىكول اۋىلىندا 10 ادام، 4 تەحنيكا جۇمىلدىرىلعان. وندا 42 باعانا قۇلاعان. ءبارى قايتا ورناتىلدى. اۋىلدارداعى الەۋمەتتىك نىساندارعا گەنەراتور قوسىلدى. ال حالىق جارىقسىز وتىر. جوندەۋ جۇمىسىنا اۋا رايى كەرى اسەر ەتتى. جەل كۇشەيگەن كەزدە كرانمەن جۇمىس ىستەۋ قاۋىپتى. باعانالار ورناتىلعانىمەن، سىمىن تارتۋ قيىندىق تۋعىزدى»، - دەدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ ءبولىم باسشىسى نۇربەرگەن بەكەەۆ.

ايتا كەتەيىك، جانىس بي جانە شەڭبەرتال اۋىلدارىندا شامامەن 1200, ال تۇمالىكول اۋىلىندا 200-گە جۋىق ادام بار.

ەسكە سالساق، ءساۋىر ايىنىڭ ورتاسىنان اقتوبەدەگى بىرنەشە اۋىلدا جارىق ءسونىپ قالدى.

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ ءبولىم باسشىسى نۇربەرگەن بەكەەۆتىڭ ايتۋىنشا، جالپى وبلىس بويىنشا ەلەكتر جەلىسىنىڭ 74 % توزعان.

Abai.kz