25 ساۋىردە تۇرىك رەسپۋبليكاسىنىڭ انكارا قالاسىندا ەلدەگى جەر سىلكىنىسىنىڭ سالدارىن جويۋ كەزىندە قۇتقارۋ بولىمشەلەرىن باسقارعان توتەنشە ۆەدومستۆولاردىڭ وكىلدەرى ماراپاتتالدى.

ماراپاتقا يە بولعان 80-نەن استام ەلدىڭ وكىلدەرى اراسىندا قازاقستاننان توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمباەۆ تا بار، ول ءزىلزالا سالدارىن جويۋعا كومەك كورسەتكەنى ءۇشىن مەدالىمەن ناگرادتالدى. مەملەكەتتىك ناگرادانى تۇرىك رەسپۋبليكاسىنىڭ پرەزيدەنتى رەجەپ تايىپ ەردوعان تابىس ەتتى.

«باۋىرلاس تۇرىك حالقىنا تاعى دا كوڭىل ايتامىن. ادامداردىڭ ءومىرىن قۇتقارۋعا قاتىسقان بارشا حالىققا، قۇتقارۋشىلار مەن ديپلوماتيالىق كورپۋسقا ريزاشىلىعىمدى بىلدىرەمىن! ءبىز تۇركيا حالقى جاقىن ارادا تابيعي اپاتتىڭ سالدارىن جەڭەدى دەپ سەنەمىز!» - دەپ يبراگيم كۇلشىمباەۆ اتاپ ءوتتى.

تۇركيانىڭ ءۇش وڭىرىندە ىزدەستىرۋ-قۇتقارۋ جۇمىستارىن جۇرگىزۋ باستالعاننان بەرى قازاقستان تجم قۇتقارۋشىلارىنىڭ كۇشتەرى 7 ادامدى قۇتقاردى.

قازا تاپقان 88 ادامنىڭ، ونىڭ ىشىندە 10 بالانىڭ دەنەسى شىعارىلدى. قازاقستاندىق قۇتقارۋشىلار قولمەن، سونداي-اق ينجەنەرلىك تەحنيكانى، اۆاريالىق-قۇتقارۋ جابدىقتارىن، شانتس اسپاپتارىن تارتا وتىرىپ، 250 مىڭ تەكشە مەتردەن استام ۇيىندىلەردى بولشەكتەدى.

ايتا كەتەيىك، پرەزيدەنت قاسىم-جومارت توقاەۆتىڭ جارلىعىمەن تۇركيادا ىزدەستىرۋ-قۇتقارۋ جۇمىستارىن جۇرگىزگەن ماماندار دا مەملەكەتتىك ناگرادالارمەن ماراپاتتالدى.

6 اقپاندا تۇركيانىڭ وڭتۇستىك-شىعىسىندا جانە سيريانىڭ سولتۇستىگىندە جويقىن جەر سىلكىنىسى بولدى. ەپيتسەنترى تۇركيانىڭ كاحرامانماراش پروۆينتسياسىنداعى پازاردجيك اۋدانىندا ورنالاستى. اتالعان ەلدە سوڭعى مالىمەت بويىنشا، 46,1 مىڭنان استام ادام قازا تاپتى، 26 مىڭنان استام عيمارات قيرادى. قۇلاعان نىساندارعا قاتىستى ءىس بويىنشا 247 ادام تۇتقىندالدى.

Abai.kz