الماتى وبلىسى پوليتسيا دەپارتامەنتىنىڭ بۇرىنعى باسشىسى سەرىك كۇدەباەۆ ستامبۋلدا جۇرگەن جەرىنەن ۇستالدى. بۇل اقپاراتتى باس پروكۋراتۋرا راستادى.

ەسكە سالايىق، قاڭتار وقيعاسىنا كۇدىكتى دەپ تانىلعان كۇدەباەۆتىڭ ەلدەن قاشىپ كەتۋىنە بايلانىستى 3 ساۋىردە حالىقارالىق ىزدەۋ جاريالانعان بولاتىن.

كۇدەباەۆ 23 ناۋرىز كۇنى بىشكەك قالاسىنداعى ماناس حالىقارالىق اۋەجايىنان تۇركيانىڭ ىستامبۇل قالاسىنا ۇشىپ كەتكەن.

ۇقك توراعاسىنىڭ ورىنباسارى – شەكارا قىزمەتىنىڭ ديرەكتورى ەرلان الداجۇمانوۆ سەرىك كۇدەباەۆتىڭ مەملەكەتتىك شەكارانى رەسمي وتكىزۋ پۋنكتتەرى ارقىلى ەمەس، تاۋلار اراسىمەن قاشۋى مۇمكىن دەگەن جورامال ايتقان جانە بۇل ىسكە قىرعىز رەسپۋبليكاسىنىڭ مەملەكەتتىك ورگاندارى دا كىرىسكەنىن ايتتى.

قاڭتار وقيعاسىنان كەيىن ءىستى بولعان كۇدەباەۆقا قىزمەتتىك وكىلەتتىگىن اسىرا پايدالاندى دەگەن ايىپ تاعىلعان.

كۇدەباەۆتىڭ سوتى بيىلعى جىلدىڭ قاڭتارىندا باستالدى. پروكۋرور ونى 9 جىلعا باس بوستاندىعىنان ايىرۋدى سۇرادى.

10 ناۋرىزدا سەرىك كۇدەباەۆ اۋرۋحاناعا تۇسكەنى، سوت وتىرىسى كەيىنگە شەگەرىلگەنى حابارلاندى. سودان كەيىن سوت پروتسەسى بىرنەشە رەت كەيىنگە قالدى. ول كەزەكتى سوت وتىرىسىنا كەلمەگەندىكتەن، سۋديا سەرىك كۇدەباەۆتى سوتقا ءماجبۇرلى تۇردە جەتكىزۋ جونىندە قاۋلى شىعاردى.

Abai.kz