«قوعامدىق باقىلاۋ تۋرالى» زاڭ جوباسىندا نازارباەۆ زياتكەرلىك مەكتەپتەرى مەن نازاربەۆ ۋنيۆەرسيتەتىنىڭ جۇمىسىنا قوعامدىق باقىلاۋ ورناتۋ تۋرالى نورمالار ەنگىزىلۋى مۇمكىن. بۇل تۋرالى ءماجىلىستىڭ الەۋمەتتىك-مادەني دامۋ كوميتەتىنىڭ توراعاسى اسحات ايماعامبەتوۆ ايتتى.

«مۇنداي تۇزەتۋدى زاڭ جوباسىنا دەپۋتاتتار ەنگىزىپ جاتىر. بىزدە اۆتونومدىق ءبىلىم بەرۋ ۇيىمدارى بار. سونىڭ ىشىندە نازارباەۆ زياتكەرلىك مەكتەپتەرى مەن نازارباەۆ ۋنيۆەرسيتەتى وسى ماسەلەلەردە زاڭمەن قامتىلۋى كەرەك دەگەن تۇزەتۋ ەنگىزىلىپ وتىر. ونى جۇمىس توبى قارايدى. مىسالى، «سامۇرىق-قازىنانىڭ» دا الەۋمەتتىك ماسەلەلەرگە قاتىستى سۇراقتارى قوعامدىق باقىلاۋعا الىنۋى كەرەك دەگەن تۇزەتۋ ۇسىنىلىپ وتىر»، - دەدى دەپۋتات.

ايتۋىنشا، دەپۋتاتتار بۇل تۇزەتۋدى قوعامنىڭ سۇرانىسى بويىنشا ۇسىنىپ وتىر.

«اۆتونومدى ءبىلىم بەرۋ ۇيىمدارىنىڭ اشىقتىعى بويىنشا، جالپى قوعامدىق باقىلاۋ ماسەلەسى ماڭىزدى بولعانىن بىلەسىزدەر. قوعامدا كوپ سۇراقتار كوتەرىلدى. دەپۋتاتتار سونىڭ نەگىزىندە ۇسىنىس ەنگىزىپ وتىر. قاجەت بولسا، قوعامدىق باقىلاۋ ورناتىلادى. ويتكەنى، اۆتونومدى ءبىلىم ورىندارى دەگەنىمىزبەن، ولار دا بيۋدجەتتەن قارجىلاندىرىلادى عوي. دەپۋتاتتار بيۋدجەتتەن كەتىپ جاتقان قاراجاتتىڭ تيىمدىلىگى بويىنشا، باسقا دا قوعامدىق باقىلاۋدى جۇرگىزۋگە مۇمكىندىك بولۋ كەرەك دەپ وتىر. ءبىزدىڭ جۇمىس توبى وسىنىڭ ءبارىن قاراپ، جاقىندا نۇكتەسىن قويىپ، ەكىنشى وقىلىمعا ازىرلەيدى»، - دەدى اسحات ايماعامبەتوۆ.

Abai.kz