سولتۇستىك قازاقستان وبلىسىندا 3 ناۋرىز بەن 25 ءساۋىر ارالىعىندا تۇرعىنداردان بانكروتتىققا قاتىستى 630 ءوتىنىش ءتۇستى، ونىڭ 427-ءسى كەرى قايتارىلدى، دەپ حابارلايدى وڭىرلىك كوممۋنيكاتسيالار قىزمەتى.

سقو بويىنشا مەملەكەتتىك كىرىستەر دەپارتامەنتى بەرەشەكپەن جۇمىس باسقارماسىنىڭ باسشىسى گۇلنار قادىربەكوۆانىڭ ايتۋىنشا، 3 ناۋرىزدان باستاپ ازاماتتاردان بانكروتتىققا وتىنىشتەر قابىلداۋ باستالدى، قازىردىڭ وزىندە رەسپۋبليكا بويىنشا 47,7 مىڭنان استام ءوتىنىش كەلىپ ءتۇستى، ونىڭ 7,9 مىڭى قارالىپ جاتىر.

«وتىنىشتەردىڭ 94% ەلەكتروندى ۇكىمەت پورتالى – eGov.kz ارقىلى ءتۇستى، قالعانى E-salyq azamat موبيلدىك قوسىمشاسى ارقىلى قابىلداندى.

سقو بويىنشا 25 ساۋىرگە دەيىن 630 ءوتىنىش كەلىپ ءتۇستى، ونىڭ ىشىندە 91 ءوتىنىش قابىلداندى، 427-ءسى كەرى قايتارىلدى. قازىرگى ۋاقىتتا 112 ءوتىنىش قارالىپ جاتىر. وتىنىشتەردىڭ جارتىسىنان استامى پەتروپاۆل قالاسىنا تيەسىلى – 349, سونداي-اق قىزىلجار اۋدانىنان – 63, ايىرتاۋ اۋدانىنان – 52, مۇسىرەپوۆ اۋدانىنان 24 ءتۇستى»، - دەيدى گۇلنار قادىربەكوۆا.

«قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىق تۋرالى» زاڭنىڭ تالاپتارىنا سايكەس 15 جۇمىس كۇنى ىشىندە مەملەكەتتىك كىرىس ورگاندارى ءوتىنىش بەرگەن ازامات تۋرالى مالىمەتتەردى تەكسەرەدى.

«بانكتەر، ميكروقارجى ۇيىمدارى جانە/نەمەسە كوللەكتورلىق اگەنتتىكتەر الدىنداعى بورىش 5,5 ملن تەڭگەدەن – 1600 اەك اسپاۋعا ءتيىس. قارىزداردى تولەمەۋ مەرزىمى 12 ايدان اسۋى كەرەك. مۇلىك، ونىڭ ىشىندە نەكەدە الىنعان اۆتوكولىك، پاتەر، ءۇي، ۋچاسكە، بانكتەگى دەپوزيت جانە تاعى باسقاسى بولماۋى قاجەت. تاعى ءبىر شارت – قارىزدار بويىنشا بانكتەرمەن جانە ميكروقارجى ۇيىمدارىمەن رەتتەۋ ءراسىمى جۇرگىزىلۋى ءتيىس»، - دەيدى باسقارما باسشىسى.

بانكروت دەپ تانۋعا ءوتىنىم بەرگەن، بىراق شارتقا ساي كەلمەيتىن ازاماتتارعا 1414 سەرۆيسىنەن تەلەفون ارقىلى سوتتان تىس بانكروتتىق ءراسىمىن قولدانۋدان باس تارتۋ تۋرالى حابارلاما جىبەرىلەدى. مۇنداي جاعدايدا سوتتان تىس بانكروتتىق كريتەريلەرىنە سايكەس ءوتىنىشتى 3 ايدان كەيىن قايتا بەرۋگە بولادى.

Abai.kz