كەشە، 30 ءساۋىر كۇنى، وزبەكستان رەفەرەندۋم وتكىزىپ، وسك ونى زاڭدى دەپ تانىدى.

وزبەكستان ورتالىق سايلاۋ كوميسسياسىنىڭ توراعاسى زاينيددين نيزامحوجاەۆتىڭ ايتۋىنشا، حالىقتىڭ 84 پايىزدان استامى رەفەرەندۋمعا قاتىسىپ، سايلاۋعا قاتىسقانداردىڭ 90,21 پايىزى  وزبەكستاننىڭ جاڭا كونستيتۋتسياسىنىڭ جوباسىن قولداعان ەكەن.

جاڭا كونستيتۋتسيا پرەزيدەنتتىڭ وكىلەتتىگى بەس جىلدان جەتى جىلعا دەيىن ۇزارتۋ، ءولىم جازاسىنا تىيىم سالۋ، ەل ازاماتىن شەت مەملەكەتكە ەكستراديتسيالاۋعا تىيىم سالۋدى قاراستىرادى. كونستيتۋتسيانىڭ جاڭا رەداكتسياسى قازىرگى پرەزيدەنت شاۆكات ميرزيەەۆتىڭ قاتارىنان ءۇشىنشى مەرزىمگە سايلانۋىنا دا مۇمكىندىك بەرەدى.

2016 جىلى پرەزيدەنت بولعان ميرزيەەۆ 2021 جىلى قايتا سايلانعان. وزبەك پرەزيدەنتى جەتى جىل ىشىندە اينالاسىن «سەنىمسىزدەردەن تازارتتى». كەزەكتى سايلاۋ 2026 جىلى وتۋگە ءتيىس ەدى، بىراق رەفەرەندۋمنان سوڭ كەزەكتەن تىس سايلاۋ بولاتىنى جانە شاۆكات اكانىڭ باسىم داۋىسپەن جەڭەتىنى اڭعارلى جانعا ايتپاسا دا تۇسىنىكتى دۇنيە.

مۇنىڭ ناتيجەسىندە ميرزيەەۆ كەم دەگەندە 2030 جىلعا دەيىن وتىرعان ورنىن سۋىتپاۋعا مۇمكىندىك الادى. كىشى قىزى ءبىلىم بەرۋ مينيسترلىگىندە باسقارما توراعاسى، ۇلكەن قىزى اقپارات جانە كوممۋنيكاتسيالار اگەنتتىگىنىڭ ديرەكتورى بولىپ وتىرعان الپىس التىداعى ساياساتكەر ديكتاتۋرانىڭ بارساكەلمەس ارالىنا اتتاندى ما، الدە وزبەك اعايىندى شىنىمەن ۇشپاققا شىعارماق پا؟

Abai.kz